因為疫情關係，同一位朋友嘅飯局一而再，再而三咁延期，不過都好嘅，呢排窮呀！
我呢位朋友份人幾nice幾搞笑，唯一問題就係佢嘅「凡勃倫效應」，總之咩都覺得愈貴愈好，之前幾次同佢食飯都係過千蚊落樓，同女仔食就話抵啫，兩條麻甩佬食就有點兒那個。
對上一次我哋喺酒店食上海嘢，兩條友埋單差唔多三千蚊，雞絲粉皮得一細pat放落一隻大過我個頭嘅碟上面，佢話：「好好食呀！啲麻醬特別香，真係香過出面！」
我：「屌！咪又係雞絲粉皮！」
「吖你真係唔識食！」
然後另一道醉雞就放落個細壺度，份量少到呢......
「嘩，啲酒好香呀！」
我：「屌！咪又係醉雞！」
「好食過出面㗎！」
其實冇分別囉ok？
由於我都識佢女友，有次聽佢女友透露：「嗰次行屯市，個中庭做緊行李箱特賣場，佢睇中咗個喼打算買，一問個價錢係四折就即刻放返低，佢話咁平一定有問題喎，要買返正價嗰啲，隔兩日我買返呢個四折嘅喼畀佢，問佢收咗5000，佢話呢個正價靚好多，個轆都行得順啲。」
呢啲例子係冰山一角，我呢位朋友買所有嘢都覺得愈貴愈好，最貴就最好，減價就一定有伏。食飯係咁，買喼係咁，買西裝係咁，買任何嘢都係咁。佢同我係同一個髮型師，有次佢話自己揀嗰支電髮水係成個salon最貴，叫我之後去電一定要揀呢隻：「特別正㗎！冇咁傷頭髮。」
之後我問個髮型師有咩分別？係咪真係好啲？髮型師答我：「冇分別㗎，一樣嘅，唔同包裝之嘛，老細話一隻標貴啲，一隻標平啲，一定會有人揀貴嗰隻喎！」
呢種現象喺心理學上稱為凡勃倫效應（Veblen effect），會對奢侈品同埋名牌不問因由地信任，會認為愈貴嘅嘢就代表愈好，要展示畀人睇自己有消費同埋經濟能力，某程度上係由自卑感引發出嚟嘅炫富行為，即係好似較早前某品牌出咗個手袋，繡咗女明星中文名上去嗰啲呀，所以有唔少商家會用呢招針對上層消費者嘅心態。
有時我哋見到好貴嘅嘢會問：「嘩，買咗識飛㗎？」佢唔識飛，不過幾貴都真係有人會買，例如我呢位朋友。
當然，唔係一定貴就代表唔抵嘅，有啲product同service係一分錢一分貨，但不包括接近三千蚊嗰餐上海嘢，同埋本身可以四折買到嗰個喼。
雞絲粉皮 在 【廚神到你家】阿爺廚房｜涼拌雞絲粉皮｜食譜｜李家鼎 ... 的八卦
【阿爺廚房5】涼拌 雞絲粉皮 有沒有人跟小編一樣，很喜歡吃涼拌 雞絲粉皮 ？這次鼎爺將原隻雞手撕，加入少許雞皮提升香味！鼎爺更教大家處理粉皮和調較醬 ... ... <看更多>