【十個開房的地址】
秋風起，扯衡旗。天氣開始轉涼之後，搭的士去開房嘅男女特別多，難怪九月份係最多人出生嘅月份。
不過搭得的士去開房，多數都好怕羞。最誇張見過有個女仔由上車到落車，都將個頭埋喺男方寬廣嘅胸膛上面，驚死畀人見到佢。女仔有矜持，畀司機知而家去畀人屌覺得怕羞都可以理解，但係好多男仔都鍾意用代號代替，偏偏我最怕去錯目的地，唯有迫佢承認去開房。
以下係一啲去開房嘅常見隱喻：
1.維記
呢個最正常，不過第一個同我講嘅乘客喺中環上車，同我講話去維記，很傻很天真的我問佢係咪去維多利亞公園，畀人質疑我係咪玩嘢。
2.登打士街百佳
朗豪坊附近一個女人跳上車吐出六個字，有街名就即刻開車，一開車就唔對路，乜登打士街有百佳咩？於是好傻咁問個客，究竟想去百佳定惠康⋯⋯
3.九龍塘
對好多人嚟講，九龍塘係開房代名詞，我地成日都笑人去九龍塘話人去開房。不過九龍塘其實好多住宅，上的士話去九龍塘，我真係要問究竟想去邊。
4.去有得開房嘅地方
呢句好似好清楚，但事實上係廢話。有得開房嘅地方實在太多，大佬你想去邊先？試過喺老蘭一帶，男方上車先問條女「我地去酒店啦好唔好？」，條女表示OK之後，男方話去港島香格里拉，所以，去邊真係要講清楚。香港大把地方扑嘢，問題係你有無錢，有無對手。
5.邊度有牀
同上面個case類似，不過懶係隱晦咁，氹到條女開房以為大個仔嘅大學生，話「邊度有牀去邊度」，車你去宜家家俬好唔好？見佢喺浸會大學上車，不禁同佢講：「佛光街好似有個地方幾出名。」
6.運動場
雖然扑嘢係幾大運動量，但一對男女打住車輪同我講：「師傅，載我地去運動場呀。」仲要發出啲呻吟聲示意，呢次我明去邊，但犯咗同一個毛病，唔講清楚去邊，載你地去紅磡體育館好唔好？
7.邊間時鐘酒店最遠？
喺旺角上車，一副好驚畀人見到嘅樣，首先叫我開車，然後問邊間時鐘酒店最偏僻。久唔久有遊客問去邊食、玩，但問去邊扑？Sorry，真係無乜推介。見佢地年紀輕輕，加上當日自己收入不佳，我畀兩個選擇佢：長洲東堤或元朗。佢。真。係。去。元。朗。
8.咩咩
「師傅我地想去咩咩呀。」呢個咩咩係一個代號，曾經代入為「搞搞」「愛愛」「做愛做嘅事」「扑扑」同「咩咩」，係最多人嘅選擇。不過都係嗰句，你去目的地做咩，唔使同我講嘅，你開房玩占卜都得㗎，最緊要有地址。正如搭的士去食飯，會唔會同司機講：「師傅我地想去食飯呀。」？
9.軒尼詩道幾多號
最危險嘅地方先係最安全嘅地方，有啲人會講時鐘酒店嘅完整地址，金巴利道幾多號、軒尼詩道幾多號、砵蘭街幾多號、律倫街幾多號⋯⋯呢個講法我最buy，乘客覺得隱晦、司機聽得清楚。不過事實上，熟路嘅司機一聽就知。
10.乜乜街間七仔
好多人都講話去時鐘酒店附近嘅便利店、食肆，不過落車直入開房，或者買啲嘢先上房，係比較隱晦嘅做法。買嘢上房我理解，話去7仔但直上嗰啲我真係笑出嚟。
其實開房好平常啫，邊使咁多顧慮。點都好，天氣開始凍，祝各絲打道路暢通，各巴打出入平安，注意安全，唔好搞出人命，好難養㗎。
#lazytaxi
#的士
#taxi
#我的你的紅的
