【對不起，年輕人】
都成個月前嘅事。
原來已經成個月，焦慮壓迫下時間彈指即過。
當時已唔記得係第幾次遊行後，深夜去執啲仔走，其時無咁嚴峻，照做生意其實就好好搵。
成車黑衫上車後高談闊論，講食催淚煙，講應對戰術，講籌組屠龍小隊。我即屌：「你地咪咁啦，呢度公眾地方，你唔識我㗎，唔好亂講嘢。」
心急下表達得唔好，加上司機形象差，成班反屌：「乜嘢呀，阻到你呀。」
好彩一向袋住張遊行Poster喺門邊，即刻Show證咁攞出嚟：「我都有去遊行㗎，自己人呀，不過三十幾跑唔郁，咪後勤支援囉。」取得信任後再補充，「唔係個個司機都撐，但唔少司機有車Cam，有片有時間仲載埋你地返屋企，你喺車上講咁多，一報警你入硬㗎，除時坐十年，暴動呀。」
知道自己人後，氣氛融洽好多。當時大家都當講笑咁睇暴動罪，「五隻角落生物都告到暴動㗎」「班防暴郁手，咪就係暴動」。「唔俾着黑色衫行街咩」呢句反問，一個月前車廂內哄堂大笑，一個月後回想，情況係幾時開始急轉直下呢？
最記得少年一句戲言：「十年咋？我出返嚟先二十七歲，仲後生過而家嘅你啦大叔！」
當時大家笑得好暢快，大概係六月以來笑得最舒暢嘅一次，大家都明白兄弟爬山嘅重要，唔同人唔同崗位，最緊要不被捕不受傷。大肚腩大叔運物資，年輕人有心力前線自決。今時今日回想，只感到當中嘅悲涼。
四站四位年輕人，第一站時落車時我講過一句話，今日講多次：「屠龍小隊，大部分乘客我一生人只見佢一次，我唔要喺報紙見到你地，要見就街上見。萬一要監獄見，等我，我地會普選換個政府嚟救你。」
lazytaxi 在 lazytaxi - YouTube 的八卦
AboutPressCopyrightContact usCreatorsAdvertiseDevelopersTermsPrivacyPolicy & SafetyHow YouTube worksTest new features. © 2022 Google LLC ... ... <看更多>