《香港地真係有好多「運動茄哩啡」，成日都扮哂運動健將》
尋日一名消防員喺拯救被困行山人士期間墮崖殉職，被困情侶俾大眾指責累死人，俾人質疑佢哋行山前無做足功課，高估自己行山經驗同能力，亦有人指責新假期要推高銷量，不停發放錯誤訊息，推介高難度行山路徑，令行山新手低估行山路徑嘅難度。有人話唔應該怪對情侶，意外無人想，佢哋都會好自責。係唔係意外，對情侶唔係蓄意都有錯，唔係謀殺都算誤殺，佢哋行山嘅錯誤決定間接殺死消防員。
運動其實真係要有運動品德...
我無意為運動pass 宣傳，我最近係join咗一個健身pass，個pass line up 咗全港好多健身室，dance room，瑜珈教室，健身pass原理好似手機無限data plan咁，一個月費，日日任玩。由於呢個月我日日玩，真係觀察到香港人嘅運動品德非常差...
香港人真係好鍾意no show又唔話畀人聽...
經常聽到外國餐廳點名批評香港人，book咗又no show，做運動都係一樣。經常見到register名單有十幾廿人，上堂個時又係得返一兩丁人，一個六個人嘅泰拳堂，最後得返我同教練one on one，真係攰到 hihi，好似曹星如連打12 rounds 唔俾停一樣。點解香港人咁鍾意臨時甩底，唔得閒就唔好book啦，臨時唔得閒有急事要 ot 嚟唔到，又唔通知人。我非常明白點解林鄭會話天水圍遠甩底唔去，林鄭係極具香港人甩底嘅慣性。
香港人極度鍾意遲到早走...
就算 register 咗，通常都遲到，可能香港人真係秒秒鐘幾百萬上落，但遲到都唔會拿拿臨換衫，教練叫佢遲嚟拉下筋先做運動，呢啲人又極有自信，完全唔拉筋就跟大隊做劇烈運動，做做下運動會抽筋同奶野咪就係咁囉。
一個鐘頭嘅健身班，去到45至50分鐘嘅時間，有啲同學就會自己先行散水，因為佢哋又要衝去洗手間，霸shower房，爭第一個沖涼，唔想完堂一大班人等沖涼，咁其實有咩咁趕呢？放工做運動，之後係唔係趕住去死？又要遲嚟，又要早閃，有無尊重教練？健身班最後嘅環節就係拉筋，呢班友做完運動又唔拉返筋，第日腰酸骨痛又要同教練呻。
香港人根本就唔係鍾意做運動 ，只係鍾意話畀人聽自己鍾意做運動...
香港人做運動，只係為咗影低做運動嘅相，好似黃子華棟篤笑話，而家啲人做愛唔係為咗做愛，而家啲人做愛係為咗拍低做愛嘅過程。有啲變態嘅女人，成日拎住個手機喺更衣室度自拍 ，問題係呢班自拍嘅女人影到人都唔理，大家做完運動個樣都好似啱啱喺地盤收工咁，又攰又樣衰。佢哋係急住喺自己啲汗仲喺塊面嘅時候，拍底放上網，show 俾人知，自己幾有做運動嘅熱誠。
有啲女人去做運動係當自己係小甜甜，教練係陳振聰...
明明一個好簡單嘅動作，教練已經講得非常清晰 ，呢個時候有啲女人就突變柔弱，柔弱過霍金，一定要教練行埋嚟專人指導佢，佢先肯完成動作。呢啲女人完全唔係做運動，佢哋係想喺運動堂入面，搵教練氹自己開心。以前我係唔信點解有啲男人會畀十幾萬，買California課程叫靚女幫佢拉筋，呢個世界真係有人久旱逢甘霖到呢個程度，要去做運動，喺教練身上尋找慰藉。
「運動茄哩啡」明明好資深，上勁多堂，都完全無進步過，完全無瘦過...
「運動茄哩啡」只係個咀做運動，當gym room係coffee shop，不停吹水，講嘅嘢毫無營養，又要大聲到幾乎隔離班都聽到。呢班「運動茄哩啡」好似以前pe堂，總有一兩個坐埋一邊傾偈傾成堂，完全唔郁。有次我上aerial yoga，個教練講instruction嘅時候，口水多過浪花嘅同學完全唔聽，試做又話唔知點做，要教練行埋嚟指導佢。佢哋真係好似茄哩啡，套套劇都有佢哋，但演技係完全無進步過。堂堂都見到呢班「運動茄哩啡」，堂堂都無進步架喎。
我唔明白，點解會掀起「顯示自己鍾意做運動」嘅熱潮...
好似只要影到相，show 到俾人睇有做開運動，就係生活好充實，生命有熱誠。我諗做運動要培養做運動嘅品格，你要學識一樣運動，首先你要認真學，尊重教練。 嗰啲行山不停自拍嘅所謂行山愛好者，嗰啲唔量力而為，唔聽教練指示，唔做足功課，又自覺唔會奶野嘅「運動茄哩啡」，你哋不如收手啦...
