一，近年一直有 practice mindfulness ，但好少同人提起。但同我熟嘅朋友都知，其實我可以好大火氣，而且一發不可收拾；往往可以鬧足十幾個鐘。
二，mindfulness practice 幫我更了解自己嘅情緒；其實，我哋除咗感受喜怒哀樂，更加可以選擇喜怒哀樂。
三，當然，唔係叫你見到死人冧樓嘅時候幸災樂禍，又或者對任何事都無動於衷。絕對唔係咁。
四，當你覺得自己情緒唔受控嘅時候，mindfulness 畀你知道自己其實係有選擇；極怒極喜極哀極樂，都係下意識嘅選擇。
五，重點係，越係識得內省自覺，就越可以問自己，點解會選擇某種情緒。
六，呢幾日，我都好想仔細咁形容自己嘅情緒？憤怒？恐懼？無奈？幾種感覺多少都有，但又唔完全正確。
七，Angst 德文本義就係 fear ，但中文好似譯做「焦慮」。對於呢個洋文字，我聽過最有意思嘅形容，就係「無以名之嘅恐懼」，又或者「唔知驚乜嘢所以更加驚」。
八，驚唔驚冇端端畀著制服嘅襲擊？驚，但明明佢哋九十幾丈遠。驚唔驚講得嘢多畀人封殺？驚。驚唔驚經濟會好差？仲有好多嘢都驚，但理性又同自己講，其實冇乜好驚。咁，仲驚唔驚？驚。驚咩？唔知。當然，呢種驚都有程度上嘅分別；重嘅就係焦慮症，輕嘅，就係焦慮。
八，至於憤怒，我亦都有同樣嘅體會。即係，對好多嘢都憤怒，多到一個點，有少少搞唔清楚憤怒嘅對象同根源。作為憤怒嘅專家，我都可以好肯定咁講，呢種複雜嘅憤怒，係好易會混合變成悲傷，即係好多人口中，心痛嘅感覺。
九，電話 phone in 節目，經常聽到有聽眾話「好痛心點解香港變成咁」，其實都反映咗以上所講嘅憤怒，以及「都唔知嬲邊個、嬲咩好」嘅感受。
十，「仲駛講？梗係黑警林鄭習近平啦！」其實對我哋大多數人，以上一干人等，平時都只不過係一個糢糊嘅概念，但係一有機會接觸得到嘅時候，所有積累嘅能量就爆發出來。
十一，反之，警察對市民嘅仇恨亦都一樣。Yes you read me right ，警察一樣仇恨香港市民。
十二，心理學到此為止，跟住我想講下搏弈論。
十三，話說，尋日中大校長以為自己同警察談判，但一轉頭警察就放彈。有人問我：「大學校長喎，唔係唔畀面下嘩。」
十四，錯晒。了解警察就知，佢哋從來都係唔會談判唔會妥協。警察談判專家只會勸人投降，唔投，就制服或擊殺，永無話一人行一步。
十五，所以中大校長嘅談判，其實無論咩結論，結果都係警察要控制場面，分別只係用幾大嘅暴力。
十六，警察係用行動去確立自己永遠都會控制場面，不惜代價亦不問手段，搏弈論裡面，呢個過程叫 signalling。
十七，透過 signalling 建立出來嘅認知，對任何 institution 而言，都係極珍貴嘅資本。所以，下次唔好咁豬，以為同警察可以有得傾條件。
十八，如果唔係經過呢個夏天，多數人其實係冇乜機會接觸警察。但當大家都親眼見到警察係乜嘢，之後無論係勇武抑或和理非，又會點對待警察？恐懼？仇恨？不信任？All of the above ！
十九，即係話，警察同市民都會不斷用行動去 signal 畀對方知，自己係一定誓死打到底。
二十，雙方嘅仇視不斷升級，香港一方面會長久咁淪為一個極權 police state 。有冇想像過，有朝一日大陸城市嘅自由，分分鐘多過香港？其實都有人識得話「今日新疆，明日香港」 呢個 worst case scenario 唔係冇可能。
廿一，另一邊廂，亦可以預見勇武行動升級，比現更令人難以置信嘅人事件。請恕我唔公開推測。但有一點可以肯定，幾百個甚至上千名極度憤怒嘅市民，足以癱瘓社會。
廿二，明事理嘅人都知道要 de-escalate ，但又苦無出路。唔通真係全民練習 Mindfulness ？今時今日，恐怕願意去靜靜地聽自己心聲嘅人，最終都係少數。
廿三，話雖如此，那怕世界只得一個人，都仍然值得時刻 mindful 咁生活。
廿四，從社會層面去睇，警民之間嘅矛盾、仇恨、同不信任，唔係簡單咁講可以用時間去解決。政府願意改革警隊，律政司作出檢控時畀人見到係公道公正，都可以 de-escalate。
廿五，好可惜，北京同特區傀儡，似乎唔會選擇呢條路。
廿六，或者，呢個就係點解我哋會覺得無奈。有人曾經講過，無奈唔係因為睇唔到答案，而係明知答案係乜，但又肯定有權勢嘅人會揀錯嘅選項。
mindfulness practice中文 在 【呼吸訓練】3分鐘呼吸空間練習 3-minute Mindfulness Exercise 的八卦
【呼吸訓練】3分鐘呼吸空間練習 3-minute Mindfulness Exercise ｜中大有晴Sunshine At CUHK ... CUHK Medical Centre香港 中文 大學醫院. ... <看更多>