約了朋友明晚吃飯，地點是皇仁舊生會。對，吃過的話便知道，皇仁舊生會其實是一間餐廳，位置就正正是在皇仁書院裏面。
皇仁舊生會好吃嗎？間嘢個格局就認真麻麻，但就如皇仁舊生這個 collective noun 一樣，雖然普遍其貌不揚，但都總算有點內涵。
很久之前出席過一個研討會，認識了一班朋友，甚是投緣，大家都玩得，久不久會 happy hour 和晚飯。群組有六人，除了我和兩位皇仁舊生，其他的都是女。
明晚的飯局，當然由這兩位舊生負責訂座。
「Hihi，」其中一個皇仁舊生說，「經理寫咗個菜單過嚟，你哋睇睇有咩唔食。」
隔咗幾分鐘，另一位皇仁舊生回答：「正呀，Marcus 你嘴刁，你覺得 ok 嗎？」
嘩，我屌，真係有人會睇得明？
「你哋唔好玩人啦，」一位貌似友板里惠的已婚女 banker 說，「呢啲鬼劃符，得你哋呢啲 QC 仔睇得明。」
可能是我的自卑感作祟，她那句「得你哋呢啲 QC 仔睇得明」，彷彿嘲笑緊我嘅學術水平。
我讀得書少，唔代表你可以欺負我。
「正呀，」我說，「睇到都流晒口水。」
「吓？你睇得明？」友板加了一個驚嚇 emoji。
「大概啦。」
「第一道菜寫乜？」皇仁舊生配一個奸笑 emoji。
紫羅炒鴿片蚌仁
鮑魚佛跳牆
桂花蠔
魚肚蝦乾浸時蔬
椒鹽陳皮中蝦
云爾腿蓉蒸斑球
潮式芋頭炒飯
腰果露湯圓
「寫晒畀你睇又點話？」
兩位皇仁舊生靜了，大概被其他女生給我的心心 emoji 淹沒了。
出嚟行，唔係講會考有幾多個 A 嘅，食腦㗎嘛。
On99，左上角有個電話，打去問咪知囉。
