[那些年，我在浸會大學捱到畢業的戇鳩事］
話說母校近期爆咗穫咁撚杰嘅嘢，好多同學都上水出嚟分享返好多當年喺讀書時嘅戇鳩嘢，搞到小弟塵封咗將近八年嘅回憶都一下子返晒嚟，一於同大家分享吓。
第七位：食餿3年
講住啲minor嘢先啦，話說母校當年（而家唔知仲係咪），有3個canteen，新can舊can Hall can三分天下。當中新can就係出晒名嘅餿can，仲記得第一次入去朝聖嘅時候食到gap gap聲，滾水公仔麵＋有殻炒蛋真係永恆經典。Hall can因為冇住過hall ，所以就冇咩點食過（一直覺得喺浸大住hall本身已經係戇鳩），但根據浸大山神嘅分享，Hall can後來變成著名嘅虫Can，搞到班同學仔要食虫抗議。至於舊can，算幫襯得最多，螢光汁撈意粉係一時傑出之選，唯一可以encore嘅，應該就係得燒味飯喇。
係呀，就係因為3can出色水準，我當年已經培養出返學帶飯嘅良好習慣，後來離家出走那兩年，白𤆥意粉我都食得津津有味，浸大3can嘅鍛練都可謂功不可沒。
第六位：「師兄，唔知你有冇興趣幫吓學校嘅發展？」
係呀，當年母校有份part time，就係水一班入世未深嘅freshman，放咗學之後，好似做銀行cold call咁，俾張list你，逐個逐個跟住打，打去搵返啲校友捐錢救助學校。
而最仆街嘅係咩呢？就係為咗令件事包裝得好啲，佢會安排你打返去俾啲同系嘅師兄師姐，叫你打去嘅時候問佢多啲有關career path嘅嘢，同佢哋好似熟落咗之後，就可以借機問「係呢，師兄，其實呢排學校都有新嘅發展，唔知你有冇份參與呢？」
成份工，有part time錢收之餘，仲有人同你做返個career sharing，好荀㗎。
直到有位師姐同我講，「師弟，你知唔知呢行個行頭其實好窄㗎咋，你打咁多呢啲滋擾電話呢，真係會影響你之後條路㗎！」我就如夢初醒，冇再做呢份咁荀嘅工喇！
第五位：屈穎妍與趙心樹
呢兩位人物就梗係經典啦！
屈氏婦人今日已經成為咗建制第一健筆啦，想當年佢喺課堂上面分享佢喺大陸採訪如何不畏強權，為求揭發真相，連坐監都唔驚，講嘅時候臉不紅氣不喘，今日諗返，真係人唔笑，狗都吠！好記得當年仲因為佢，難得地一堂都冇走過，佢後來仲派咗個A俾我添。今日望住呢個A，我真係好似阿Sa張cap圖咁覺得好嘔心呀！
至於趙心樹，大家可能唔記得咗，當年梁振英唐英年爭做特首，作為一個傳理學院嘅院長，佢好叻豬咁偷步公佈民調，幫唐英年造勢，結果搞到自己成為傳媒追訪嘅對像，而當年已經畢咗業入咗行嘅我，就係其中一個追捕佢嘅記者。
而呢位院長，為咗躲避傳媒，連日足不出門，後來更加因為行蹤咁啱被小弟同同事捕捉度，而喺城門河條單車徑拔足狂奔，仲要跑跑吓唔夠氣俾記者，即係我追到，你諗吓，成件事幾撚戇鳩幾撚夢幻呢？
第四位：普通話
想當年，普通話都係畢業條件，但係我哋比較幸福嘅，就係可以去讀個non credit嘅course搞掂佢。所以當年最緊要嘅係咩呢？唔係去揀自己鍾意嘅科去讀，而係點撚樣都要去reg咗呢個non credit嘅普通話先，reg到咪一天光晒囉，三年都reg唔到，一係就燃燒3個credit同GPA去讀呢科明益某類同學嘅科目（就好似啲人去英美留學讀中文屈GPA咁），一係就defer重頭嚟過。那怕你GPA爆4 ，唔讀普通話就冇得你畢業。
第三位：全人教育
為咗培育全地球最全面嘅人才，浸會大學，會要你讀好撚多莫名奇妙嘅嘢，例如會有科叫大學中文嘅嘢，教你何謂主謂賓；有科叫大學英文嘅嘢，教你去做practical skill；每個人都一定要去讀3個credit宗教哲學，所以我就無啦啦走撚咗去禪修；明明你係文科底，要去讀一科完全唔知噏乜鳩嘅science；要強制上兩個體育course我都當對身體有益，但係要聽夠8個唔知請啲乜人返嚟講，又卡撚住你時間表害你reg唔到科嘅講座（ccl)先可以畢業，就真係火都嚟。
基本上頭兩年，有大半嘅credit都唔係讀緊本科或你自己想讀嘅嘢，你以為大個仔讀大學終於可以自由啲？其實你仲慘撚過讀中學！為咗去聽個講座，拖又唔敢拍，part time又唔敢返，上莊都要成班約埋一齊入去聽talk時開會。
第二位：若IT亦是成人班必修一課
除咗要讀好多9唔搭8嘅科目外，所有浸大人，都要去修讀一科叫IT嘅課程，先可以畢到業。
呢個IT課程，教會你嘅，就係點樣去用一個呢個世代已經冇咩人再會用，叫Netscape Navigator嘅瀏覽器去上網認識世界；同埋點樣喺用完Microsoft Office完三寶之後，將你要嘅嘢駁去電腦室，再將佢打印出嚟，將虛礙嘅文字變成實物，好撚神奇㗎！
上完之後，我絕對相信班上會培育出一個Steve Job又或者Mark Zuckerberg，未來可以改變人類科技生態，一定得㗎哈姆太郎，你話係唔係呀？
第一位：健腦操
講真，呢單嘢唔係一位怨念甚深嘅同學提起，我一早就唔記得。就好似低俗喜劇入面嘅杜汶澤屌完騾仔，會blackout一樣，健腦操呢單嘢，就係足以令你連記都唔想記起絲毫嘅終極柒事。
所謂嘅健腦操，根據嗰位同學嘅憶述，就係：「做一啲好似跳結他他老伯舞步咁撚柒嘅動作，聲稱可以健腦，但毫無科學根據，同食撚左瀨尿牛丸考試一百分一樣咁撚周星馳。」
係呀，一班成功跨過咗A Level咁撚慘痛嘅考試、被普遍認為係社會未來棟樑嘅大學生，第一日返到大學，就係要集體做埋啲咁撚屌嘅嘢。跟曹永廉又跳又唱三字經，你都仲可以認識吓中國博大精深嘅文化，健腦操，真係衰撚過西洋菜街啲大媽舞，絕對係由外到內再到返外咁撼動你弱小嘅心靈。
浸大山神好好彩，未見識過，我哋當年如果偷走唔做，係會畢‧唔‧撚‧到‧業！！！
香港偉大詞人黃霑先生講過，「鳩勃起而硬；柒勃起而軟。應起而不起為笨柒；不應起而又起係戇鳩。」有得揀都仲入浸大嘅，就係笨柒（想當年我同班有個同學A Level 3條A，好多都坐底有支火箭），入咗浸大而捱到畢業嘅，就係戇鳩。
想當年，我哋就係咁戇鳩鳩捱到去畢業。到今日，終於有班後生仔好似國王的新衣入面個醒目𡃁仔咁，發現到成件事本身有幾戇鳩，肯出嚟對抗荒謬，去做我哋當年應該要做但又冇諗過要做嘅嘢，所以，我真係諗唔到有咩唔撐嘅理由囉。
IG: runawaywhen25
http://instagram.com/runawaywhen25
career path中文 在 career path - 生涯（職涯）路徑 - 國家教育研究院雙語詞彙 的相關結果
出處/學術領域, 英文詞彙, 中文詞彙. 學術名詞 管理學名詞, career path, 職涯路徑. 學術名詞 心理學名詞, career path, 生涯（職涯）路徑. 學術名詞 ... <看更多>