pnd荔枝角的八卦，Yahoo名人娛樂都在討論

嘩，你做咩食到成嘴白粉呀？唉，被你發現PND偷食...勁多粉嘅芒果糯米糍添，雖則PND鍾情勝記芒果王貪佢糯米糍外皮0感特薄，但唔使過海，一試無妨呀。

呢家小店唔易去，正正喺長沙灣同荔枝角中間，星期一至五逢12:00、18:00開賣，售完即止，嘩，好彩經過一場又哀又篩，店主終於肯俾我買2個走，又要靠運，又睇彩數，有無真係咁犀非之利？

PND下午去到，見到啲靚女們戴住手套左包右包，榴槤（星期二供應）有、水蜜桃（星期一供應）有，當然仲有芒果糯米糍。糯米皮仲有益力多味、朱古力味同綠茶味，不過PND買唔到～T.T 唯有飲杯$15楊枝金露頂住檔先啦

綠茶芒果糯米糍$11粒，好長呀，唔同一般嘅橢圓形狀，隻手掌咁大，總長都有12cm，拎上手都feel到有重量。咬開糯米糍，先係食到一大片芒果肉（咦唔係好夠甜喎，同志仍需努力囉），糯米糍綠茶味好清新但唔係好出味，唔係濃厚，唔算太夾。皮厚薄適中，好軟糯又煙韌。

王孖記菓子
電話：55929088 聽講，訂50件以上先接受預訂
星期一至五 08:30-20:00（糯米糍12:00、18:00開售）
星期六 08:30-15:00
星期日及公假休息
#PND荔枝角 #PND小食 #PND港式 #PND外賣
@荔枝角青山道475A號地下A舖

台灣菜，最掛住，最地道嘅食物：肉燥飯、珍珠奶茶。離開超多人嘅旺角，散步去太子開飯心情仲好！

有一位嚟自台灣嘅好媽媽，絕對係太子旺角附近居民嘅福氣呢～大約40個座位嘅小店，店面企理，坐得舒適，牆上仲有台灣明信片做裝飾。PND一坐低，店員就送上熱茶，問我：要唔要飲啲野？真係幾warm呢！

呢間小店嘅選擇都幾多，有好味又抵食嘅肉燥飯套餐，有令人回味嘅三杯雞，有酥炸雞扒，好啦，一於同朋友share食哂佢～仲有多款夏日特飲添

一落完單就有得食嘅《招牌滷肉飯套餐》$45包飲品，嘩，個飯真係幾大碗，飯多肉多，入口幾香，免治豬五花肉幾入味，有豉油香，食得出仲有紅蔥頭同蒜粒，加埋滷蛋同椰菜，感覺幸福！

賣相好吸引嘅《三杯雞套餐》$68，夾起入口，唔～雞脾肉件件厚切，食落好嫩滑呀。味道比較輕手，不過杏鮑菇就吸收哂啲醬油香，都幾好送飯呀。

仲有好排住嘅《香酥炸豬排》，點解揀豬排？因為PND偏愛炸得好嘅豬扒，果然口，呢度炸功唔錯！豬扒炸漿唔太厚，但調得入味同口感鬆脆，肉質夠鬆化。

其實我最鐘意《皮蛋豆腐》，尤其呢度嘅醬油，係自家煮製，甜甜地好濃郁，豆腐、皮蛋碎，拌上少少嘅蕃茄碎，加埋醬油，非常夾調！ 《布丁奶茶》有好多好多橙黃色又Q軟嘅布甸，茶嘅奶、糖同茶味啱啱balance～真係幾好味呀！

好媽媽台灣館
電話：23303330
星期一至五11:30-16:00；18:00-22:30
星期六、日、公假 11:30-22:30
#PND太子 #PND台灣菜 #PND小食
@太子荔枝角道100號金鳳樓地舖

尋日係立夏，講真，夏天一到，只要潮友唔係喺冷氣房，走過邊度嘅浮華大地都係立夏緊～咁焗，刨冰、仙草、芋Q唔少得啦！

潮友推介呢間甜品好味，小店有大約10個堂食，綠色世界加埋白色吧櫈，都幾清新！

每款甜品都已有詳細嘅介紹，店式沙冰、刨冰、台式飲品都有，唔使$30就要雙手捧起咁大碗嘅份量，幾抵食！有潮友曾經話呢度芋圓唔太好味，原來，亮點在嫩仙草、芋Q！

7 3 唔一定等如 21「7 3 其實可以等如芋Q架！」PND講緊芋Q嘅芋頭對麵團嘅比例！😳 芋圓嘅芋頭對麵團嘅比例係3:7；長長紫紫嘅芋Q則係7:3，芋味更重！

除咗啖啖狂啜滑嘟嘟嘅嫩仙草，當然仲有黑糖刨冰$28，食落唔會死甜，啖啖透心涼，加埋珍珠、芋Q、金薯⋯⋯勁有口感！

黑丸嫩仙草
電話：9689 6313
星期一至日: 13:00-00:00
#PND太子 #PND台灣菜 #PND甜品
@太子荔枝角道57號榮光大廈地下B-2舖
鳴謝 潮友？推介（見字wtsapp，無咗你個chat）