【近況Q&A】我好想貼多啲文同發多啲相but…… 與其話忙，不如話日程好密集，尤其是抱BB 就會空唔到對手出來。所以整理最近經常有親戚朋友問嘅問題，為關心我嘅人，喺度答一次 (◕ܫ◕)
Q：生BB 辛唔辛苦呀，要生兩個啵？
A：由於雙胞胎風險高，所以我被安排開刀生，咁我諗生一個同兩個嘅感覺冇咩分別呀。個手術好快，一個鐘就OK。（最好笑係我父母問：生兩個會唔會有兩個傷口？）
2. 傷口痛唔痛呢？
A：呢個問題醫護都經常問，而我都唔知點答…… 因為生完為有基本活動能力會食兩隻止痛藥，食咗就可以話唔太痛同郁到，不過同正常又差好遠，身體會好遲鈍好重好攰，一副外科手術病人樣。大約兩星期傷口溶線換到紗布時減藥，有返啲精神，行到吓路，但康復進度好慢，要真正內外復原、變返正常人，應該要幾個月。
3. 有冇請陪月照顧你同BB？
A：有呀，不過我哋當佢係通宵更褓母咁請來餵夜奶，日頭就由外母煮坐月餐，奶奶湊BB。早晚爸爸都會湊BB，啲手勢都係喺醫院學㗎。（我哋呢一代幾乎所有爸爸都識幫手湊BB呢）
4. 係咪餵人奶？夠唔夠奶呀？？
A：（呢個真係熱門問題，我feel到問嘅50%係關心，50%係八卦同獵奇）係呀，我入咗間愛嬰醫院，喺醫護協助下都幾順利同自然咁開始咗全人奶餵BB。不過講到夠唔夠奶，我諗應該答唔夠，因為我嘅製奶量足夠一個6個月大BB食，但我有兩個，佢哋初生加埋嘅飲奶量已經同我製奶量平手，所以為咗唔好咁辛苦追人奶，就俾佢哋喺夜晚食奶粉，順便令佢哋瞓得耐啲同幫助戒夜奶。
利申：我唔是Hardcore人奶媽，我明白人奶好處，亦認同奶粉優點；我覺得雖然而家興返人奶，但都無需勁踩奶粉，最緊要尊重媽媽嘅選擇，明白每個媽媽體質、BB表現、家庭配套都唔同。
5. 兩個初生BB 係咪好難湊呀？
A：都唔會嘅，我諗佢哋都算乖，雖然兩個習性稍有不同，有個成日鳩叫（真係好似雀仔咁～），但都食得瞓得疴得。分配好工時同岡位，我哋啲大人都有正常飲食作息。可能第日冇咗夜晚個褓母先會難搞啲。
6. 咁你有無乜需要呢？
A：問得好！唔駛買嘢咁麻煩，你封利是俾BB 我代收得嘞～（認真）
P. S. 估吓呢隻又係大定細？
