好耐未試過攰成咁，上次有呢一種感覺，應該已經係十一月嘅時候，本來聽朝要出去見到大家，應該養足精神，但到到呢一刻我都仲未做晒國際媒體嘅訪問。
趁有少少空檔時間，講吓呢排擺街站之外，平日做緊啲咩，圖入面就係一部份日常回覆電郵嘅工作。
自從上個星期四國家安全法殺到之後，國際媒體突然將香港擺喺鎂光燈之下，今年本來香港已經淡出國際記者嘅眼球，點不知呢條法例真係讓到所有國家捲入嚟關注到底發生乜嘢事，從英美紐加澳德意法日韓台，到土耳其伊朗挪威丹麥比利時嘅記者，尤其上個星期五，同埋國歌法二讀前嘅今日。
一種全日瘋狂做訪問，全日講英文多個講中文，不斷去應對世界各地記者，從報紙文字訪問，到電台主持問問題，以至係到電視台晚間新聞直播，全球咁多個時區一齊湧過嚟，每一個鐘都會至少有七、八封電郵來往嘅節奏，根本就係同全球時區競賽，爭分奪秒務求比到一個搶眼球嘅講法同埋敘述嘅內容，俾佢用嚟出新聞報道香港。
做訪問期間，雖然用時間又用精神，但都係一個好好嘅段練，會充分體會到唔同國家對於香港形勢嘅認知差異，或者要好努力係極有限嘅時間裏面用佢哋理解到嘅脈落框架，去講述當今香港嘅抗爭形勢，同埋其實好多民主國家都會有嘅國家安全發大家覺得咁合理，點解香港有國家安全法就好似世界末日咁樣，要解釋真係一啲都唔容易。
會有英國媒體記者問我到底聽日兩會係咪已經完（正常國際記者其實上網睇一睇根本都知道個答案啦），會有韓國記者問我其實星期日示威咁順利點解要擔心國家安全法（非常懷疑佢係咪唔知道星期日有出水炮車催淚彈），又會有國際電台問我點解要質疑國家安全法明明你哋應該對香港法官有信心（好明顯佢唔知道國家安全法係有機會將香港人帶到去中國大陸法院受審），更加唔好講一大堆問點解要破壞商店、攻擊途人、私鳥等都拆咗大半年，我到上星期都仲解答緊七一佔領立法會係咪違反非暴力原則會失去民意支持⋯⋯

雖然做訪問真係做到好攰，每15分鐘一個訪問咁樣排，連續排五六個鐘真係有種而家已經虛脫嘅感覺（一陣間凌晨2:00仲有另一個訪問…… ），但我都好清楚知道，呢個就係我嘅崗位，我所要擔當嘅角色，當好多隱姓埋名低調冒着生命危險嘅前線手足，大家用盡所有辦法希望落街聚人嘅時候，我更加要喺任何一個國際媒體，為蒙面嘅手足辯護，為佢哋嘅行動去說明本來具有嘅正當性。
場運動差唔多一年時間，和勇不分嘅體現，唔應該只係一個口號，無論幾攰幾辛苦疲勞都好我都好想每次訪問可以謹慎、精準、到位咁，係冇講柒嘢嘅情況之下，話到比世界聽香港發生乜嘢事，乜嘢為之香港面對嘅人道災難，點解我哋覺得一國一制嘅來臨唔係危言聳聽，點解香港嘅中學生會不惜面對三五工年監禁都要去捍衛所相信嘅自由，而家喺監獄裏面已經有不知幾多戰友坐緊、拘捕嘅人數比起香港目前嘅在囚人士仲要多⋯⋯
關於聽日嘅行動，大家都心知肚明，一定唔會有2019年6月12日咁大規模，國際嘅輿論關注亦都未去到呢一個位，但其實由2020年5月21日至今不足一星期嘅形勢醞釀，我知道好多好多好多手足無論自己身位崗位係乜嘢，都好想煲得起埸抗爭，重新燃點起整場運動。記得上年坐完監出返嚟嘅時候，我成日都自嘲，我係嗰啲就算蒙晒面，啲人望我背脊都認到我前面嘅人，更加唔好講因為有警察總部嘅禁足令，其實自己街頭上做到嘅嘢真係有限。
但，我都知道自己嘅優勢可以係邊度貢獻付出，無論聽日結果喜出望外，抑或未如人意，甚至係最壞嘅狀況大家有種一網打盡玩完嘅感覺，喺公共輿論以至到國際民意戰上，我都會盡我一切嘅努力途徑，由六七年前大家累積俾我國際上面嘅網絡，盡可能去推動世界各地嘅傳媒，目標係令到所有報紙，一揭開國際版都要報道緊香港嘅抗爭，先可以令到我哋盡可能增加議價籌碼，面對呢一條唔知幾時正式香港執行嘅國家安全法，有一線生機。
各位前線手足放心，無論聽日結果係點都好，無論覺得係解釋行動源由定包底解畫定係乘勝追擊，輿論戰上我都會盡可能谷，要最大化大家喺任何行動上有嘅付出，轉換成為實質嘅政治籌碼，比北京知道武漢肺炎完咗之後，我哋都仲繼續拉鋸到。兩日後，已經係歐盟成員國嘅外交部長會議，仲有亞洲已經有國家元首關注一國兩制嘅執行狀況，同埋基本法到底發生乜嘢事，同時間我兩個鐘前先同美國參議員視像會議，希望我哋可以將個雪球滾得比反送中運動更加大；國際線，我哋國際戰線手足一定要交到成績出嚟。
————————
儘管拉人封艇，取締眾志不再是空談，留一口氣，點一盞燈，拜托大家幫忙延續國際戰線血脈：https://bit.ly/DemosistoBackup（是次籌募以美金結算）
香港立法會議員人數 在 香港立法会议员马逢国：新选举制度将扭转立法会乱象 - YouTube 的八卦
订阅频道，获取更多精彩：https://bit.ly/2GzuCVG 回忆起过去一段时间 香港立法会 出现的乱象，港区全国人大代表、 香港 立法会议员马逢国仍印象深刻。 ... <看更多>