《激戰》中嘅經典對話
「放下屠刀 立地信耶穌」
之程輝救香港
—
太歲：「你癲夠未？」
「我都唔明你打嚟做乜！」
—
賤輝：「太歲。」
「我同你呢個年紀，仲有嘢需要人明咩？」
「阿齊為咩事去打，我都識同佢講，
你最緊要記得自己為咩上台啊！」
—
太歲：「果條o靚仔嚟架！個o靚仔無知咋！」
—
賤輝：「喂...佢無輸到啊...
佢做到佢想做嘅嘢架。」
—
太歲：「咁你又為乜啊！」
—
賤輝：「我攞帶嘅時候，
以為個世界係我架。
原來世界都唔等人嘅，
我唯一做到嘅，都比我自己出賣埋啊...」
—
太歲：「我同你講啊...打MMA死得人架。」
—
賤輝：「我呢廿幾年...乜都無做過啊...
我唔想到熄燈果陣，
我連一件值得記得嘅事都無啊...」
—
太歲：「我驚你步條o靚仔後塵啊！」
—
賤輝：「我仲有嘢輸咩？唔緊要啦！
贏又好輸又好，啲嘢都番唔到嚟喇。」
「其實我同阿齊都係一樣咋嘛，
都係想為自己，做番一件事。」
—
連日降雨，哲人相繼去世，荒謬嘅政治事件一件連接一件，當香港已經唔再似係熟悉嘅香港嘅時候，愛香港嘅人究竟愛緊啲咩呢？係愛緊果層未乾枯嘅記憶？係愛緊果啲無法實現嘅幻想？好想寫啲嘢去紀錄呢種感覺，但又唔知寫咩好，正如喺現今嘅社會氣氛之下，好多人都想做啲嘢，但完全唔知可以做啲乜，無力感好似滲透喺全身每一毫升嘅血淚裡面，人無處可逃。
—
然後打開電視，又播緊《激戰》，情節啱啱去到太歲同賤輝嘅呢段對話，我終於知道我想講啲咩。
—
一個社會可以點樣改變呢？係咪不斷埋怨，不斷麻醉自己，然後身處嘅地方就會自己變好呢？人嘅際遇尚且要靠個人努力去改變，而社會嘅際遇就係社會中人嘅共業。
—
《激戰》入面嘅程輝四十八歲，後生曾經做過拳皇風光過，但因為一時嘅貪心斷送咗自己嘅前途，虛度廿年嘅光陰，唔知做緊咩。而因為打拳嘅關係，總算可以喺姜皓文介紹果間健身中心度教師奶跳減肥舞。四十八歲，仲可唔可以改變？
—
然後賤輝遇到林思齊，彭于晏好想激勵自己嘅爸爸，好想向爸爸同世界證明自己，所以佢踏上咗MMA嘅舞台。後生仔總係一股衝勁，而呢股衝勁令佢差啲粉身碎骨，比安志杰打到差啲成為植物人。
—
林思齊嘅受傷，反而成為咗賤輝嘅動力，佢好想好似後生仔一樣，上擂台去證明自己嘅價值。然後，姜皓文勸賤輝唔好打，原因係驚佢會步林思齊嘅後塵，而年齡咁大風險就更加高。
—
其實喺呢個社會都係一樣，太歲嘅角色就係極大多數一般嘅人嘅睇法，某啲嘢前車可鑑，「死得人」架喎，所以寧願埋沒自己，都唔會去做佢心底裡認為值得去做嘅事。後生仔行動力最高，因為包袱細，但佢哋嘅付出亦好大，有人坐監，有人被捕，有人被打，有人被拎走權利，有人成為「過街老鼠」，付出嘅係無可限量嘅前途。
—
咁一個社會改變嘅關鍵係啲咩？係程輝。呢種人經歷過社會嘅風雨，有歷練，有視野，但偏偏大多缺乏行動嘅心同勇氣。因為佢哋覺得，自己都過咗半生人，點解仲要去冒險？學太歲咁，安安份份教拳教到老，退休做廢老UNUN腳咪好囉，點解仲要主動去輸啲嘢。
—
四十八歲，或者五十歲，遲唔遲呢？其實呢個年紀先係你最能夠掌握人脈、財富、知識嘅時間，換言之就係你最能夠影響社會嘅一個階段。咁快就想收山？你可能仲有五十年要捱，你可能仲有自己嘅後代、後後代、後後後代，喺呢片土地上面仲有你嘅親人、情人同埋朋友。
—
程輝嘅前半生可能做咗好多壞事，但亦唔代表喺當下佢唔可以做任何一個正確嘅決定，《論語》有句說話就幾傳神：「朝聞道，夕死可矣」，意思係只要喺死之前參透到應該要做啲嘢，咁你就無悔今生。《激戰》入面彭于晏啟發咗張家輝要奮勇向前，全力去做你認為係正確嘅事，後生仔倒番轉影響中年人。
—
唔好再做隨風擺柳，知道打拳有利可圖，贏錢就叫張家輝再打MMA嘅姜皓文。香港嘅程輝們，你哋又搵到香港嘅彭于晏未呢？為自己，為你身處嘅地方，做番啲嘢。
跳減肥舞 在 實測外國爆紅的減肥舞！跟著跳一週我瘦了XXkg? !輕鬆減重的 ... 的八卦
各位…要不要我們繼續跳一個月看看會不會有什麼驚人效果！！再跟我分享 ▻▻EMMA老師的 減肥舞蹈 ：https://youtu.be/J4Ce-okhwvo然後在影片裡我用 ... ... <看更多>