呢對係我結婚嗰陣用嘅公仔。我知，一定會有人問點解唔係小熊維尼；根據阿太日常嘅講法，係因為佢睇過晒啲維尼結婚公仔之後都揀唔啱，反而覺得呢款最靚；除咗維尼之外，佢都鍾意史迪仔嘅，所以最尾就揀咗史迪仔同「史迪乸」(阿太自創嘅名稱，人哋其實叫Angel呀)呢對嘞。
===== 我係同伍家謙一樣咁有型嘅分隔線 =====
鏡頭一轉，轉咗去幾個月前嘅超聲波房，醫生揸住部機喺阿太個肚度郁嚟郁去。
醫：「嗱，見到嘞......呢個就係bb個菇菇嘞，仔嚟㗎。」
太：「嘩，乜佢而家得咁細粒都已經有咁大個菇菇㗎嗱？」
我(心諗啫)：「冇計，遺傳。」
醫：「至於另外一個......唔......佢轉咗身未係好睇到......」
我(都係心諗)：「一樣㗎啦應該。」我已經想像緊佢兩條友未來會點抽法。我每次見親個friend嗰兩個仔都係打緊MMA嘅。
醫：「咦，呢個女仔嚟㗎喎！」
吓？？？！！！
小生命嘅來臨係上天恩賜，孖胎係意外驚喜；到知道係一男一女嘅時候，嗰種興奮我真係唔識形容。諗都冇諗到阿太叻成咁，真係太辛苦太辛苦妳喇。
之前講過，我哋叫肚入面嘅小生命做小怪獸s。而家再準確啲講，佢哋係怪獸仔同怪獸女呀；史迪仔同史迪乸都係怪獸嚟，對結婚公仔而家仲放喺電視櫃上面；好快，真正嘅怪獸仔女就會嚟陪佢哋喇！
#當知道呢個消息嗰一刻
#我其實想即刻喺超聲波房入面跳舞
#孖的
#他孖的
#他們孖的
#小怪獸s
#怪獸仔
#怪獸女
#辛苦阿太喇
我挨之：www.instagram.com/vinceng88
太ig：www.instagram.com/ahtaidailylife
