便衣警員許浩成撲跌黃之鋒 警察慰問：先生你有無事呀？
（GoPro第一身視覺 + 慢鏡重溫）
今日喺大埔接受傳媒訪問，講講下見到政府架開篷巴士駛過，，咁梗係想跑去同高官請願示威，結果一轉身就被個便衣警員從後熊抱推到我跌落地，話說當佢一個反手推我落地之後，仲好意思問我：「你有無事呀，有無受傷？」，比你推完落地唔通答你無事？推完你扮關心你真係夠曬無恥。
其實呢，如果我衝出馬路警察阻止都預左，但估唔到轉個身都被警察搞成咁，但最奇怪既係唔知點解就被星島同商台記者寫成「黃之鋒有意衝出馬路」，當時我一轉身就被警察咁招呼法，你又知我係想衝出馬路既，好心如果想寫我衝馬路影響交通乜乜乜，作為新聞從業員都至少問我兩句求證下先啦，問都唔問就寫到我九成九想衝出馬路，真係只可以寫個服字。
好老實講，當時得我一條友根本無可能衝出馬路，我轉身一刻只係想去馬路旁邊嗌口號，等班落區唔落車既高官明白，無論你用千軍萬馬無盡警力阻止示威者，我地都會用盡一切方法去表達否決政改既訴求，落區唔應該只係歌舞昇平，更重要既係學懂面對反對聲音。
好講返點解會有依條影片，話說過往一直好難搵返慈母對示威者使用暴力既證據，就算旁邊有攝記都好難影到，因為警察多數會用人牆擋住攝影師既鏡頭，警察點樣對待示威者，包括問候你祖宗十八代、拳打腳踢使用暴，最後都係會不了了之……
所以吸收經驗以後，今次特登問學民同學仔借左部私伙GoPro，正所謂有片有真相，你地警察有部隨身攝錄機，我地都有部GoPro攝錄機掛喺背囊帶到影住你地點樣招呼我，雖然依條片唔係影到d咩特別野，但我肯定往後學民去得行動，企最前既一定會帶曬GoPro，保障我地行動者之餘，亦都要喺七黑警仲未被檢控既日子，繼續掀露你地班黑警點樣使用暴力。
