【龔成問答信箱】（Q17001-Q17020）
Q17001：
老師請教下,一間公司係一開始發行股票個下己經=向股東借左錢，之後股價一直升係咪都係市場投資者零和遊戲（有人賺有人蝕）
如果係咁問題來了，就算一間公司個市值升幾倍又如何？實際間公司係唔會有錢入落袋
（因為公司只係發行股票個下用上市價錢向股東借錢，日後就算股票爆升，市值爆升都係投資者一買一賣，有人輸有人賺？？）
咁市值升股價升對公司有咩幫助？
唔知你明唔明我意思
龔成老師：
公司發行股票，就是原有股東將部分股票的比例賣出，這並不是一個借錢的概念。
例如有人想搞一間食店，自己出資$200萬，叫朋友入股，佢地出資$100萬，股東資金就有$300萬。這間食店就可以利用這些資金去發展，當賺了錢後，就會將部分盈利派出（股息）。
當業務做得好，食店的價值就會提高。
至於所謂的市值，就是如果有一個平台，比這些股東賣出佢地的股票，就會出現成交價，即是佢的朋友將手持股票再賣比其他人，當股票不斷買買賣賣，就會不斷有成交價，這就是「股價」。（股市，就是一個二手市場，股民與股民之間的買賣）。
至於食店，可以完全唔理會這股價，自己保持繼續營運。
如果業務做得好，企業價值向上，賺錢的人就會多過輸錢的人，這並不是一個零和遊戲。
當市值不斷上升，股東們的身家都會上升，同時在食店的層面，可以更易得到企業融資，有利公司發展。
總之，你要在「企業」層面去理解，而不是「股價」層面，唔好行錯左方向。
------------------------------------------------
Q17002：
你好，想請教一下，如果想儲錢收息，請問1038是優質股嗎？應否趁低吸納？
龔成老師：
長建（1038）有質素，這股可以長線投資。不過全球經濟差，對佢都會有一定的影響，所以中短期股價會較一般，但長期來說，這股仍是正面的。
增長力不算好強，但收息可以，有長線投資價值，現價合理。
------------------------------------------------
Q17003：
龔SIR 你好，近期睇緊你三本書，獲益良多，有幾隻股票想徵詢你的意見，希望你能回答，感謝
3383 雅居樂，2019年5月除淨前11.1入左, 連埋啱啱今年5月應該收左3次息, 請問此股是否應該繼續持有？還是放手離場？
我見佢近年全年派息都很高，但派完息股價就一直尋底，是否大落後？
66 港鐵，現價好像處於低位，是否可入，但社會運動會否有影響？
1038 長建見大行都唱好，見李嘉誠都有增持長實，是否對長和業務還有信心，現可入嗎？謝謝你 !
龔成老師：
雅居樂集團（3383）是內房股，有規模及品牌，質素是有的，但同時存有風險，中國樓市近年持續向上，佢的盈利自然向好，但如果樓市逆轉，就會對佢地造成打擊。
佢的負債唔少，以及近年股價已上升好多，這刻的值博率變得較少。當負債高時，盈利就會「放大」一樣，因為當中企業用了財務槓杆，好景時好好賺，逆轉時股價大跌。
這股不是不可投資，但就要控制注碼，如果你持貨較多，可賣少少，如不多，持有都可以。
港鐵（0066）現價合理，分注投資可以，這股可以長線持有的。
長建（1038）有質素，可投資，之前李生增持長和系，就是間接買了長建。佢當然對用整個系有信心，同時認為買入價不差，現價其實都可以分注投資，長線持有無問題。
------------------------------------------------
Q17004：
你好，請問麗珠醫藥 1513 入得過嗎？
龔成老師：
麗珠醫藥（1513）業務不差的，生意都有一定的增長，但就不是高增長類別，相信之後只能平穩增長。以佢股價上升的程度，其實有點多。
現價在合理區中上部，投資價值雖然仍有，但不能說好高，最好等回翻D先入。
------------------------------------------------
Q17005：
阿sir你好，我一直有睇開你既專頁，學到好多理財知識，謝謝你。
想問下，如果想買388，合理區域係幾多？現價買會否高追？
但本人睇好之後會有好多中資新興經濟股黎港上市帶動388上升，望能回覆，謝謝
龔成老師：
港交所（0388）是好優質的股票，不過現時略貴，你預跌10%會較為合理。如果現價入，不是不可，你可以小小地入一注先，之後等回10%先正式入。又或者用月供的模式，都是可以的。
這股長遠正面，可長線，只是買入價平貴的問題。
------------------------------------------------
Q17006：
Hello成哥，想請教一下點睇966中國太平呀？
龔成老師：
中國太平（0966）業務不算差，但增長力有下跌的情況，加上投資市場較為波動，都會對佢的盈利產生影響，從而令股價上落較大。
其實現價都有投資值博率，大終處合理區中下部，但這股在行業中始終唔算好大規模，加上股價較波動，因此唔建議太大注。
------------------------------------------------
Q17007：
hi sir, 家母買315已佔股票組合中20% 2萬股 平均價較高，你覺得大唔大機會上返去 同埋佢好想溝貨 溝1萬股 你點睇?
果時我以為高位是合理位， 佢信左我，其實我有冇做錯d咩? 有咩可以改較善
Thanks sir
我知道佢流動數據冇乜大影響 主要係手機銷售同數據漫遊下跌
但我最估唔到佢營運成本居然升左 而香港電訊居然控制到成本 令我對數碼通好失望
我又諗與其溝貨不如用筆錢買其他較優質既股仲好 但佢唔想有個蟹貨係到
同埋我見佢舊年 手機銷售成本仲大過佢 手機收入 其實佢係咪為左搶流動數據生意 賤價賣手機 令到佢數據條數靚仔d
龔成老師：
如果已佔比去到20%，就唔好再加注。這只會增加當中的風險。
數碼通電訊（0315）不是無質素，但佢有兩類賺錢模式，第一是月費，第二是賣電話，過往剛剛出智能手機時，佢賣電話好好賺。
不過，近年市民換機的力度已減慢，這當然會影響佢盈利。佢要上翻高位，並不容易，暫時只能平穩增長。
另外，當佢生意因為這原因出現下跌時，成本佔比當然會高左，而香港電訊（6823）業務是較多在月費的。
同時，數碼通電訊業務在賣電話的比例較多，而香港電訊則較少，月費部分較多，因此會令香港電訊的穩定性較數碼通好，股價會較穩定，風險度較低。
檢討翻，第一，兩股之間，對較年長人士來說，香港電訊會較適合。第二，估值沒有絕對的，當大環境改變，生意轉弱，估值都會改變，所以估值要考慮「將來」。第三，唔應該溝貨。
這股不是無得守的，業務不是無質素，但市場認為增長力已不及過往，都不敢比佢好高的估值。暫時耐心小小，唔好加注。
------------------------------------------------
Q17008：
老師，你好，小弟今年40，一家四口，2個孩子為幼稚園及小學階段，我為家中支柱，要供樓，月薪＄46k。
之前為月光族，直至近幾個月發覺如此下去不行。現每月給太太儲＄5k，自己儲＄3k。
最近自己已儲了＄10k，想月供股票於老師常推薦2800，每月儲現金＄1k，供$2k。
長遠想20年後有穩定收息來源。想請教老師意見。
龔成老師：
你這年齡，仍是可以儲蓄，投資增值的，因此點都要儲少少錢。
如果你現時現金唔多，你最好先儲多少少現金先，因為你有家庭，風險度不能太高，因此宜先有一些現金備用，到你認為足夠，就可以開始月供。
你每月供$2000盈富（2800），可以的，同時儲$1000現金。你可以長期進行，慢慢都能累積到一定的財富。
------------------------------------------------
Q17009：
你好，經濟始終有衰退一日，你會看某些指標，如債息等，來預測而賣出股票避險嗎？
還是不預測，即使大跌市也逢低買，待估值過高再賣，這樣會不會賺少很多？
這是我近排很糾結的問題，感謝成哥賜教
龔成老師：
對，經濟一定有差的時候，但差完後，又會好翻。
翻睇過往的歷史，如果我地是長線投資，在經濟差的時候買入優質股，回報會大得驚人，因此，我會比較建議在經濟差時，分注買入優質股，長線投資。
分注買的原因，是由於無人能成功預測經濟幾時會真正好轉，所以，最好是分注入以平衡風險。
當然，有些人會因為擔心經濟差，所以這刻先賣出股票，不過，成功預測是十分難，這刻賣出，未必能買翻，因為經濟具體是否這甚差？又或就算經濟差，股市是否一定差？這都是難估的。
因此，我會建議分注買優質股，但要同時留有現金，以對應經濟的不確定性。
------------------------------------------------
Q17010：
龔sir你好，首先多謝你一直的指導，有少少問題想請教成哥。
小弟現年27歲，每月收入30K，可儲14K，現金存款有40萬，現時每月會用$6000月供三隻股票，盈富，煤氣，領展各2000$。餘下就等待時機入手股票。
現在希望5年後可以買樓，請問如果這個組合有沒有需要改善的地方，和有沒有機會在5年後成功買樓??謝謝。
龔成老師：
其實你現金較多，可以增加盈富（2800）的月供金額至$6000，餘下兩隻各$2000。長期進行。
原理就是加大翻你的股票比例，你有5年時間，可以好好用這段時間進行投資，要置業絕對是無問題的。
你可以有效動用現時持有的現金，就算動用$20萬都可以，當然，並不是一次過用，而是方向是可以投資增值，慢慢把握適當時機去動用。
你可以考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。
另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q17011：
龔sir你好，小弟22歲，出社會工作剛滿一年了。一年前向你請教過 初買股票 同 財富分配既技巧，一直銘記在心 付諸實行，宜家有少少成績，謝謝龔sir的教導
除了一直進行的月供，亦在最近跌市入了不少平貨。最近想檢視一下自己既財富組合。
小弟月入$20000，家用$5000，個人消費$4000，MPF$1000，餘下$10000作買股票同儲蓄。
現持有$75,000現金同$240,000股票 (按市值計)：
現金 $75000 (佔總資產比例24%)
-
2800 盈富 $71000 (佔所有股票30%)
0066 港鐵 $41000 (佔所有股票17%)
1928 金沙 $36000 (佔所有股票15%)
0012 恒基 $9000 (佔所有股票4%)
1972 太古 $20000 (佔所有股票8%)
0014 希慎 $25000 (佔所有股票11%)
0823 領展 $7000 (佔所有股票3%)
1211 比亞迪 $31000 (佔所有股票13%)
現時正準備咁樣分配 每月$10000儲蓄：
0027 銀娛 $2000 月供
1211 比亞迪 $2000 月供
1810 小米 $2000 月供
留現金 $4000
明白月供組合唔應該成日轉，但早前跌市買了不少地產類平貨 可能稍多，但我都盡量控制<30%持貨水平。
另外有感自己可以逐步加大潛力股比例。
同埋趁個市升返少少，儲返啲現金。
1177 同 1448有留意，但打算跌到合理區先開始慢慢入。
所以月供組合會半年檢視一次，希望可以逐步減少地產股比例，增加潛力股比例，逐步儲多啲現金，建立一個更平衡組合。請問龔sir覺得以上分配如何？
另外想請教老師防守方面。公司有提供醫療保險，但沒有人壽保險。
人壽保險算係保障家人，請問你建議如果健康正常、初入社會既年輕人，應該一畢業就開始買人壽保險，還是等日後開始有家庭負擔時先開始供人壽會更好呢？
謝謝龔sir悉心回覆！
龔成老師：
現時你持有的股票，都是有質素的，可以持有，現金比例無問題，但最好唔好用得太急，因為經濟有風險，投資市場會有潛在波動，你要有一定的現金在手先得。
至於地產類，如果你已經有不少，就停止增持，不過不用賣出，因為都是有質素的。
至於增加潛力股，可以的，你上述的組合比較穩陣，但潛力度不算強。你可以睇機會去增加，但就唔好急。
其實你整個組合都不差，無論持股，現金比例等，大方向無問題，只是一些小調整就得。
有關於保險方面，最重要是睇你的需要，每個人不同的。我地理財，要攻守兼備，而保險就是防守類的項目，人壽可以買，原理是轉嫁一些風險到保險公司，但不用買過多。
------------------------------------------------
Q17012：
近期見我早前(19年10月1日)分析過的1317股價大跌，於是查找19年年報及2020中期報告，看看這次下跌會否是一個合理機會。
中期報告:純利2.62億元，按年跌7.9%
其實主要業務收入，毛利，毛利百分比是比上年同期為高，純利減少為其他收益及虧損(金融資產公平值及物 業、校舍及設備以及投資物業的變動 )等不影響主要業務的數字。因此，這不算是核心影響。
不過，學生平均學費有下跌跡象(17學年38.6千元，18學年37.2千元，19學年35.3千元)，均是因併購校收取的學費較低的學校所致。這點亦證明了楓葉教育開始不再屬於高速發展型，增長百分比或須少少向下調。
跌勢相信為疫情影響，明顯是中短期問題。而且[學費主要於每個學年開始前收取](年報2019)，加上本身沒有債務過多的問題，有信心所以資金可以應付疫情問題
雖然公司有不少野心繼續擴張，因為競爭者不少，楓葉的市佔率其實不高(4%)
而貿易戰及國策都有可能影響到其發展。保守起見，推自市盈率都要少少向下調。總的而言，基本面上沒有問題，但發展速度或有所回落。
PE推算修正為13-18，近5年平均每股盈利為0.1945，推算格價為2.52-3.5。加上10%BUFFER，2.3為合理底部，2元以下為便宜區。
謝謝
龔成老師：
「學生平均學費有下跌跡象」這是最主要的原因，令這股出現下跌。
因為過往的市場睇法，是認為這股有理想的增長，這是一些「估值的基礎」，當市場發現佢的增長力，不及預期，甚至出現學費下跌的情況，就會將整個估值的模式作一些改變，這是一些較為核心的因素，令股價出現較長期的下跌。
因此，當我地進行估值時，都會有適當的調整。
而你的分析，方向都大致正確，而調低估值是合適的做法，估值都大致正確的。
------------------------------------------------
Q17013：
我發現你經營生意模式好似一啲大型醫美公司，會有好多優惠免費野送俾客人，例如你會免費答問題，而佢哋就將一啲平時好貴嘅野送俾你做，而且做完唔會有人hard sell
即使唔幫襯啲職員都會好好態度，結果啲客人就會更加願意俾更多嘅錢去買plan上堂等
我覺得真係佩服你可以搵咁多錢，又可以幫到人自己又賺到大錢，其實有咩行業可以apply呢樣野，例如其實我好想我自己的事業運用呢個模式，但我就諗唔到可以點做
龔成老師：
哈哈，可能係，但有時我都無好刻意建立，只是一步步做。
同埋，我由最初開始，到而家，都好堅持一個理念，我要幫到人，要給到一些實際的野大家，要對大家有真正的幫助，這是最首要的，只要我做到這點，我就能創造到我的價值，我自然就可以賺到錢。
所以，你第一樣野要想，就是「你能幫到人甚麼？」幫人解決那些問題？幫人在那方面有得著？人地要「需要」你，你才有價值，你可以多向這方向想想。
------------------------------------------------
Q17014：
龔成 你好,今天剛買了你的新書,才看到第二章我\立即令我想請教你,我34歲,儲蓄剛好一百萬,月入只有二萬八。
你覺得我應否先上樓?原來我計劃儲到約一百八十萬或二百多萬才計劃買樓
如果只得一百萬上樓我怕過不了銀行壓力測試,及又怕太少首期壓力大,求指教
龔成老師：
最重要的一點「供得起」。
你先要計翻，若果這刻入市，你的目標金額物業是多少，動用了首期後，每月要供多少，這些都是可以計到。《5年買樓4部曲》有教，坊間的銀行網站都有工具可以用。
如果你有可能過唔到壓力測試，反映你在「供得起」原則，有點勉強，你可以考慮買入較細金額的單位，又或儲到較多資金先買樓。
香港的樓市，有潛在下跌可能，因為香港經濟將會轉弱，現時樓價未跌，有可能是之前社運及疫情的購買力釋放，未能話「樓市向好」。
當經濟弱，樓市就會向下，這可能是你的機會，不過，香港樓始終「供不應求」，因此，樓價唔會大跌，當經濟正常翻，樓價更會向上。
------------------------------------------------
Q17015：
老師你好
我係2010買入一個價值188萬544單位！
現時可放售價520萬
我值唔值得搏一搏呢？
我現在已經組織了家庭！有小朋友！
求解答？萬分感謝
龔成老師：
如果你只有一個物業，我會建議你持有。
因為你總有自住的需要，這是你在生活上，根本所需的項目，你賣出後，無人知能否買得翻，到時你有可能面對樓價與租金不斷向上的風險。
因此，你保持這刻狀況，是最穩陣的做法。
------------------------------------------------
Q17016：
你好呀sir，我係你舊生，請問你有冇留意一個岩岩係美國上市既升降機OTIS呢？
我留意到呢個市場基本上係寡頭壟斷，而且OTIS係岩岩由UTC分拆，令管理層有好大既incentive，釋放佢既價值。
而佢既最大competitor Kone & Schindler 係相對小既市場上市，兩者都一直有唔錯既表現，P/E一直大約22－27x，我覺得都係一個值得參考既factor。
由於佢岩岩上市，financial data 唔多，EPS = $2.27 (2019), 其實我覺得會一直有增長，但係考慮埋近期疫情既影響，我以保守估計佢既估值 ＝ $2 * 22-27倍 ＝ ＄44－54
唔知呀sir你又點睇呢？thanks!!
龔成老師：
抱歉，無留意。
如果是寡頭壟斷，相信企業有一定的價值，但你最好研究下，佢點解可以寡頭壟斷，是法規、品牌、市場保護，還是甚麼原因。
因這是好重要的因素，決定了佢的優質，你要了解翻這優質能否一直保持。
另外，要睇翻市場發展，長遠的市場有否增長力。
至於估值方面，你都可以用這方法去進行，當然要考慮疫情因素而適度調低，最重要了解疫情影響是否大，對佢發展有無影響。
------------------------------------------------
Q17017：
你好，老師，我想問下我4.3時購入毛記葵涌2手，4000股，但已好耐沒有起色，請問仲應唔應該繼續持有，還是放棄呢?
龔成老師：
毛記葵涌（1716）業務有向下情況，加上你的買入價水平，我相信要上翻$1都不是易事。
如果持貨較多，要賣部分，可以等上翻少少先賣。
如果2手佔你組合不多，就守住先，當睇下有無突然的驚喜，但我相信這可能性並不大。
------------------------------------------------
Q17018：
成兄，想問你點睇牛熊證？因為我覺得呢類投機產品係可以俾人操控、所以風險好高。（如果買錯邊、就真係違背咗股神巴菲特rule no 1 , 輸咗本金）
Thx
龔成老師：
認同。
我20年前就有玩衍生工具，發現潛在成本好高，輸得多，就唔再玩。
後來我做銀行及證券行，見有唔少散戶玩衍生工具，基本上，絕大部分都是輸，當時我已好肯定，這類工具根本玩唔過！
------------------------------------------------
Q17019：
龔sir你好，本人41歲，月入4 萬，有7300股恒基地產，13000股煤氣，800股滙豐
現有現金$11萬，另外每月有3000 剩，現在唔會入貨，但來緊想係22000點時入5萬，有咩股可以介紹，謝謝
龔成老師：
第一，你較集中在這3股，其實應該增架盈富（2800）或其他股股，以平衡風險。第二，恆基（0012）與煤氣（0003）是同系，因此唔好再增持。第三，匯豐（0005）只是收息股，增長力有限，你要睇翻這股是否適合你。
你等22000先入貨，都可以的，但無論見唔見唔22000，長遠你都應該建立更平衡的組合。
如果你貨，你這年齡適合投資平穩增長股，可考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。
------------------------------------------------
Q17020：
你好，我想問一下你對hsbc的睇法，是否優質股，本人係41買入，謝謝你
龔成老師：
匯豐（0005）的賺錢能力，已經比過往弱左，同時增長力不及過往年代。質素仍是有的，但不是很高的類別。
這股可以視為收息股，但增長力就不強，唔好對股價有太大期望。要睇翻你，如單是收息，是否適合自己。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
factor二手 在 白色新車比較TCR ISP、SL7、PRINCE (已入手 ... - Mobile01 的八卦
既然能捏上去了剛發表的factor ostro 也有白色可以參考一下不過factor二手價很差要考慮一下. 0. 引言; 留言. 回報 連結 只看此人. 文章分享. ... <看更多>