【千字文慎入】
是咁的，小弟聽日將會正式返公司遞信辭職了。
尋日執屋時，見到一大堆四年半以嚟Fans寫畀我嘅信，內心充滿住唔捨得，加上有讀者竟然透過我朋友嘅朋友問我關於辭職嘅嘢，令我覺得我有必要喺度向大家詳盡交代我呢個決定。
點解我要咁作狀咁樣樣交代呢？首先，我呢個Facebook專頁由一開始改名為《空中飛傭》開始，我發表嘅內容就係同我嘅職業一脈相連嘅。既然我正職將唔會再係空少嘅時候，我覺得自己有必要同大家講清楚。有人話，其實你冇做空少都可以畫空少嘅嘢。的而且確，我見過好多空姐page，冇做空姐之後，都有繼續share航空嘅內容，讀者根本唔知佢有冇做。但係，我唔會咁做嘅原因係，我個page分享嘅好多都係我返工嘅真實故事，有時我返工發生一件趣事，我收工會急不及待畫出嚟同大家分享，甚至試過好多次放工，喺機場畫完upload完先返屋企。我並唔會為咗令個page繼續經營落去而「欺騙」讀者。更何況，過去五年，好多讀者係好似睇住傭仔呢個角色長大咁，所以我都願意將自己辭職同迷茫嘅心路歷程同大家坦然分享，有時大時大節或者去旅行，我都會寄postcards畀大家，好多見過好多次嘅讀者，其實已經變咗朋友咁。辭職咁大件事，你唔會唔同你朋友講呱？！真實，可能就係我個page嘅忠旨。
去返重點，點解我要辭職呢？原因係有幾個。首先，咁啱就係維記唔續我約。基於墨爾本航空航線將會今年2月初正式停辦，維記來往香港嘅航線只剩下悉尼，所以並唔需要咁多人手，而我，作為最先去膠流，並且留得最耐嗰批，就被選中地冇得留低喇。
然後好多人問，咁你做咩唔返去茄子航空呀？係咪佢都唔要你呀？咁就嚟到第二個原因。其實茄子航空嘅大門係永遠係我哋打開嘅，因為我哋只不過係去咗人哋公司膠流，所以由一開始去維記嗰刻起，我哋都知道終有一日係會返返去（好似灰姑娘一到12點就走咁）。而選擇辭職唔返去，亦都係我個人決定。咁點解唔返去呢？大家有睇開新聞都會明白公司嘅狀況，尤其尋日蘋果日報嘅報道，未來可能會裁員……另外，仲有一個比較重要嘅原因係，現時整個航空界嘅白色恐怖，返返去意味住我將會飛返好多大陸嘅航班。雖然我並唔係咩大作家，根本冇咩人識，但好歹都叫出過四本書，航空界嘅朋友可能都對我略有所聞，之前我第一間出版社有個作家朋友無那那失聯咗成日，我家人係無比咁擔心，都紛紛勸我唔好再做……雖然係咁，對於我一開始表態，我至今仍然係無悔。
嗯，以上我已經將我要辭職嘅原因一五一十交代哂了。有人會問，點解你唔直接去維記做呀？抱歉呢度真係有好多唔係做航空界嘅朋友，容許我解釋下。原因係維記澳洲航空係澳洲嘅航空公司，澳洲公司請返係澳洲本地有居民身份嘅人。即係好似香港嘅航空公司咁，招聘要求都要需要係香港永久居民，除非公司去外地進行招聘，特意要請某個國籍嘅人。所以，如果真係要被維記直接取錄，首先係要移民，做咗澳洲人，再apply，所以並唔係你哋諗得咁簡單嘅事。
好啦，又返返重點……點講呢……其實，辭唔辭職、做唔做空少，對於我嚟講，唔係我最唔捨得嘅事。我最唔捨得嘅，就係呢個page。講真，過去四年半，我擺得最多時間同心血嘅，並唔係空少呢份工，而係呢個page上面。好多時，人哋layover出去玩，我就匿喺酒店度畫畫；人哋放假去旅行，我就拎啲大假嚟畫月曆、擺年宵；人哋平時day off同朋友去飲飲食食，我就喺屋企寫聖誕卡畀你哋；去旅行，我啲朋友瞓緊覺，我就喺度寫postcards……呢個page，見證住由我2015年入職，到我2016年第一次出書，嗰時仲戴住口罩，到後來2018年第一次擺年宵，然後又攞獎，帶咗畀我好多回憶。而最重要嘅係，我竟然識咗你哋，有你哋咁錫我、做我讀者。呢個page有4萬幾個人follow，係由你哋每一個組成，去撐起咗我呢個page。唔怕同大家講，由於長時間擺咗喺呢個page度，我喺航空界係冇咩朋友㗎😭😭得你哋做我朋友㗎咋……嗚嗚……
最後，2月頭就係我last day，到時候我都會將《空中飛傭》嘅故事完結了。好似呢篇嘢第三段所講，呢個page同我嘅職業一脈相連嘅，既然冇做空少就咪鬼再叫空中飛傭啦……而我嘅去向，我仲未知㗎，如無意外應該會做失業大軍一排，總言之，有咩狀況更新，我都會第一時間話畀大家知嘅……好似呢篇嘢第七段所講，我認為呢個page好多人都見證住佢成長嘅，我覺得我並唔能夠自己話close就close咁自私，好似拋低咗一班睇咗我咁耐嘅fans唔理咁，同埋人大咗覺得溝通先係最好解決問題嘅嘅方法，所以想問大家意見認為呢個專頁如何是好呢？
1. 將呢個專頁唔再更新，然後開過第二個專頁講第二樣嘢；或
2. 將呢個專頁改名、轉型，分享日常或轉職後的生活，內容更廣泛，不限於漫畫及航空或某一個職業，可以拍片、文字、音樂等等；
3. 將呢個專頁唔再更新，從此再見了。
歡迎留言表達您哋意見。
喺呢度，我再次多謝過去四年半曾經like過空中飛傭、留過言、見過面、支持過我嘅朋友。
2020年，將會係充滿住改變同無限可能性嘅一年，我哋一齊要加油喔！
無論個page同我個人去向係點，1月20－28日我又用年假喺D2 Place搞《空中飛傭》最後一次嘅年宵，希望見到你哋啦！
day off漫畫 在 台湾漫画ヴォイスコミックシリーズ⑦_『Day Off』 - YouTube 的八卦
台湾漫画ヴォイスコミックシリーズ⑦_『Day Off』／毎日青菜＿台湾のBLがやってきた！部長との甘い日常【Taiwan Comic City】. ... <看更多>