【想溝女定為國為民？辛棄疾《青玉案•元夕》】
#詞三首
#晚安宋詞
#DSE雞精
#DSE範文
繼上篇講完蘇洵嘅《六國論》之後，今日繼續同大家討論下《詞三首》其中之一，辛棄疾嘅《青玉案•元夕》啦。
▍首詞主旨想講乜？
「你有一種好特別嘅氣質，係出邊d女仔冇。冇錯就係仙氣。」仙氣！係仙氣啊！
好明顯，成首詞重點係「眾裏尋他千百度；驀然迴首，那人卻在、燈火闌珊處。」相信無睇過成段詞嘅人，都有機會聽過呢一句，因為真係好出名。例如話，大陸嘅搜尋引擎百度之所以叫百度，就係沿於呢一句。
辛棄疾首先描寫左一個元宵節夜晚嘅盛況，講到城市燈火通明，煙花飛舞如繁星、如雨下，音樂無處不在嘅奢華盛況，然後係後半段描寫一位孤高、脫俗，係熱鬧中甘於寂寞嘅女子。
前段嘅元宵佳節盛況，其實係用嚟反襯後段嗰位不食人間煙火嘅女生，有幾咁「仙氣」，幾咁脫俗，有出邊啲女仔無嘅氣質——但你以為辛棄疾係想溝女嗎？少年你太膚淺了。
表面上，呢首詞主題係溝女，但古時文人又點會下下溝女？實際上，首詩都係講政治……呢一位孤高嘅仙氣女子，其實就係代表左辛棄疾本人（好失望啊可？）。當時辛棄疾政治失意，但佢又唔想同其他人同流合污，於是借詞中女子，表達自己嘅高尚情操。
▍時代背景係乜？
以漢人角度嚟睇，辛棄疾出生嘅時代，中原北方已經落入外族侵略者手中，成為咗金國嘅領土。但係，失去左半邊江山嘅南宋，仍然一直不思進取，無明確對抗金國嘅方針。
詩人林升嘅〈題臨安邸〉寫道「暖風薰得遊人醉，直把杭州作汴州」，就係講南宋人甘於一夕安穩，失去左原有首都汴州，一日仍然擁有臨時首都杭州就安心，國力日衰但就沉迷於歌舞昇平，繁榮穩定，社會和諧，拒絕一切會激嬲金國嘅行為同人……結果係點，大家都知道了。
▍辛棄疾係邊個？
辛棄疾係南宋「豪放派」詞人，被尊稱為「詞中之龍」，亦同北宋嘅蘇軾合稱為「蘇辛」。雖然佢係漢人，但辛棄疾生於金國，不過佢自小受到反金歸宋嘅教育，一直視宋為「祖國」。日後，辛棄疾真係投奔左去南宋，希望為國效力，但因為「新移民」嘅身分，而一直唔被政府重用。
辛棄疾產量極多，全因官場失意，只好不斷寫詞宣洩情緒。《青玉案•元夕》就係其中代表作，反映辛棄疾對官場嘅失望，同佢孤高嘅理想。
辛棄疾詞作題材大多數圍繞反抗金國、恢復宋國山河、憂國憂民等等，之所以被視為「豪放派」，係因為辛棄疾雖然以詩詞聞名後世，但其實佢都識得打仗，佢年青時行軍打仗嘅戰鬥回憶，造就咗佢日後詞中豪放、戰鬥嘅元素；而滿腔報國熱情，但就被國家投閒置散、壯志未酬，亦令佢嘅詞帶有悲憤感覺。
▍重要句子（具背誦價值）：
咁短，成首背曬都輕鬆啦：
「東風夜放花千樹，更吹落、星如雨。寶馬雕車香滿路。鳳簫聲動，玉壺光轉，一夜魚龍舞。
蛾兒雪柳黃金縷，笑語盈盈暗香去。眾裏尋他千百度；驀然迴首，那人卻在、燈火闌珊處。」
▍小知識：
由黃偉文填詞、容祖兒演唱嘅作品《花千樹》，歌名其實就係嚟自辛棄疾《青玉案•元夕》第一句「東風夜放花千樹」。容祖兒《花千樹》嘅「遇過很多很多戀人 一朵花跟森林」，講述嘅就係茫茫人海中尋找真命天子／天女嘅困難，其實就同《青玉案•元夕》嘅表面意思不謀而合，尋找情人，就是「眾裏尋他千百度」。當然，《青玉案•元夕》嘅內在含意就深厚得多啦。
（如果覺得寫得好、對你有幫助既話，就不妨Share比你嘅DSE戰友啦！）
============================
"Oh Readly?" - Flip a page everyday.
#一班鐘意睇書又想荼毒大家睇書嘅90後
#多多指教
============================
有文學野想分享？
歡迎各位Reader Inbox我地🐱
dse範文 在 DSE中文十二篇範文(完整版） - YouTube 的八卦
DSE #中文十二篇範文#DSE中文#dse背範文#範文朗讀. ... <看更多>