#非廣告
嚟到 #孤毒遊東京系列 嘅最後一個Full Day。單拖出外對我嚟講，食飯係比較頭痛嘅一環；一條友，想試多幾款嘢又食唔晒，一個人坐喺度，隔離枱全部一大班人，又會覺得自己有啲奇怪。
嗱先旨聲明呀下，我唔係旅遊達人又唔係日本通；講到食呢，由細到大，幾乎只要係食物我就會擺入口，唔執著亦都冇要求，好又一餐唔好又一餐(好易養)嗰種；好味嘅很好，唔好味咪下次囉。所以千祈咪覺得奇怪：每次去日本，我一定會幫趁某一間喺香港有分店嘅牛肉飯連鎖店 - 係每一次都會食。
次次同人講，十個有八個嘅反應係：「吓？有冇病呀你？搭飛機去食啲香港都有嘅嘢呀？」又有人嫌太普通，話就算食呀，都起碼揀間香港冇㗎啦，點解唔去X屋啫？
第一，我鍾意食牛肉，第四，我鍾意食飯，所以牛肉飯呢家嘢真係開正我嗰瓣；作為牛肉飯忠實愛好者，當然間間都試過晒啦。經過幾次實驗之後，我依然堅持XX家比X屋好味 - 都係嗰句，口味嘅嘢真係好睇人。記得頭一兩次去日本嗰時候，我都同好多人一樣係藐佢嘅；不過細個嘅時候冇乜錢，玩到最後一日山窮水盡之際，喂幾百yen有咁大碗飯喎，簡直救命啦；一食，就鍾意到而家嘞。
話「香港都有啦」嘅朋友，應該就未試過喺日本食佢哋嘞；或者係食材問題，又可能係任何嘢喺輸出之後就一定有啲唔同，總之同平時食嘅完全係兩種口味啦：粒粒飽滿嘅日本米、渾圓性感嘅生雞蛋、一大碗香蔥，加起上嚟甚至比我嘅初戀更加詩情畫意；一嘢拮爆隻蛋，蛋汁慢慢流入熱辣辣嘅飯入面，用筷子輕輕撈下，夾起佢；米香、蛋滑、蔥爽，盡在口中 - 頂，我啱啱今朝食咗碗先出發去機場，寫到呢度竟然仲可以Feel到啲口水湧緊出嚟；佢好味嘅另一個原因，就係牛肉汁份量啱啱好。喺香港食，有時汁少得滯會唔夠味兼太乾：多過頭，又搞到成兜湯飯咁。
好彩阿太係同好，佢話以前飛日本嗰陣都成日食嘅。人大咗，有能力可以食價錢高少少嘅嘢；去得多，乜鬼隱世超邪惡彈牙拉絲綠茶爆汁紫薯焦糖文青打卡熱點都食過；試埋其他做法例如烤或者燒嘅牛肉飯，當然全部都好食啦，但我始終心繁呢碗喺香港似有還無、好多人眼中普通過普通嘅牛肉飯，每次都會留番一、兩個朝早去佢哋度開餐；特別係冬天嗰陣，一早食碗飯，成身暖笠笠。我鍾意食，並唔係咩條件反射呀食回憶呀想回味當年嘅味道呀嗰啲咁嘅嘢，完全唔關事，我係真係覺得佢好好食㗎！
講自己一個人食飯，日本真係多選擇，而且好食。今次我終於克服咗心魔，一條友去食日式燒肉；原來只要當周圍嘅人唔存在，個感覺係冇事嘅。而終極大佬就係單人匹馬去嗰啲女士們至鍾意嘅靚靚Cafe，咁朋友介紹話有款蛋糕好好食吖嘛，咁啱我喺嗰頭，咪行入去囉；坐低、叫嘢食叫嘢飲，之後枱高頭望下，周圍都係啲OL放工茶聚，成間舖除咗個待應之外，就得我一個麻甩佬，好在舊蛋糕好食杯茶好飲啫；今次之後，我覺得我對人生嘅體會已經昇華咗去另一個層次。昇到幾高？我諗七、八樓咁高左右啦；朋友仲話毒自去Cafe太濕碎，單拖去女僕Cafe先至夠勇敢 - Sorry，我諗我未夠Level。
最後一日，病況開始嚴重。由於呢幾日同人對話嘅機會實在少，喺好想講嘢又苦無對象嘅情況之下，自己同自己傾計嘅次數就不斷增多；我先發現劇集入面嗰啲人喺屋企同自己講：「咦？好肚餓添！等我煮個麵畀自己食先！」，原來都唔係唔合理嘅，我決定一陣返到嚟就要搵人瘋狂傾計。各位，香港見喇！
#毒不可耐
#孤毒的美食家
#孤毒的劣食家
麻甩佬普通話 在 “麻甩佬” 來啦🧔 原來這個詞源自一個美麗的誤會?《吓咩話》 ... 的八卦
2023年5月30日 ... <看更多>