士別三日，刮目相看，喺餐廳食飯正想埋單之際，撞返個好耐冇見嘅舊朋友，但我哋以前真係太熟，所以我坐返低陪佢食埋個鴨腿湯飯。
我朋友已經係一間Event公司老闆，早排結咗婚，買咗層萬景峯，啱啱換咗架車，唔係想表達佢好威，講到尾都係樓奴車奴，但我的確睇住佢由窮小子去到今日事業有成，仲見證過佢失戀嗰陣意志消沉，因為佢個舊女友我都識。
試過3個人出去食飯，一般人可能諗下食乜，睇下天氣好唔好，再唔係望下條街啲靚仔靚女，不過佢舊女友好特別，係睇街邊啲車靚唔靚、咩牌子、值幾錢，問題係佢根本冇車牌，其實林寶堅尼定係Honda都唔關你事啦。
我朋友好愛佢，為咗兩個人嘅將來，甚至長時間打兩份工，點知有一次佢同舊女友講：「我努力緊架喇，而家都有兩萬零蚊一個月。」
當年喺現場嘅我親耳聽住佢舊女友咁答：「唓，你做兩份工先有兩萬零蚊之嘛，如果要打兩份工我多過你啦。」
我搵唔到任何詞彙去形容呢句說話，淨係覺得呢種價值觀好扭曲，點解一個人咁努力都要被奚落？
後來舊女友都係嫌佢窮，買個LV包包都話要儲兩個月錢，最終分手收場，然後同咗個富二代一齊，都係啲玩玩下又樣衰衰嗰type，冇計啦，佢擇偶個排序係錢行先，咩志氣呀、理想呀、骨氣呀...全部排到好後，可惜同富二代嘅戀情都係冇米粥，兜兜轉轉仲未有著落，想泊個好碼頭尚需努力。
我朋友可能唔記得呢個舊女友喇，因為佢老婆都幾靚幾賢淑，兩個人做Event公司認識，由同事開始，當時我朋友仍然係窮小子，但佢好有志氣，一早規劃好點樣儲客，點樣儲本錢，後來自己搞咗另一間Event公司，而家未算好富有，但一定唔窮。
其實一個人生出嚟嗰陣好窮，並唔係佢嘅錯，足球比賽都唔係一落後就完場啦，最後佢擺脫貧窮，先至係最重要嘅結果。
有志氣嘅人未必一定發達，但好少會窮到最後。
鴨腿湯飯 在 【三分鐘食譜】冬瓜陳皮鴨腿湯飯｜Chinese style duck soup rice 的八卦
阿晨#nomadsyhui #冰鮮鴨#冬瓜陳皮 鴨腿湯飯 #鴨#duck完整食譜可到「浪廚阿晨」Patreon專頁：(免費)https://www.patreon.com/posts/40663563想知道更多 ... ... <看更多>