最近睇左蘋果講別天神拉麵條片，睇完真係一額汗😓。開餐廳，一係個老闆本身識煮，一係你請個識嘅人返黎幫你搞掂個廚房。特別係別天神都叫做有幾間分店，有個會落手做野嘅集團行政總廚或者只係耐不久蒲下頭嘅顧問（老師傅）係好合理，好多餐廳酒樓都有一個咁嘅人，設計下菜單、做下管理、教下人、做下品質控制。但香港嘅拉麵店老闆，好多都只係單純嘅生意人，覺得「煮麵」好簡單，去日本買個名，入啲湯包寄黎香港，喺日本或者香港麵廠入啲拉麵。跟住請一班冇乜經驗嘅後生仔，以工廠式嘅方法，A+B=C咁去煮個麵出黎。蘋果條片，個拉麵店老闆連瀝水「湯切り」呢啲咁基本嘅野都要人教，都唔講佢中央工場入調味湯膽溝豬骨水，再送去分店加熱呢啲做法。呢種工廠式速食拉麵其實問題不大，日本本土都有好多呢種拉麵店，但用得呢種玩法，收費就應該貼地親民一啲。勝在老闆喺大是大非上有良知，加上為人虛心，上節目都好認真學習，希望真係可以改善品質，不負手足對佢嘅期望。好喇，其實今日唔係想講別天神，只係咁啱睇到新聞有感而發。
Tsuta蔦拉麵，東京本店喺2016年成為全世界第一間攞到米芝蓮一星嘅拉麵店（註：這點有爭議性），一直到2019年，連續4年都攞到一星（2020年攞唔到）。現時全世界只有三間拉麵店攞過星，另外兩間分別係「金色不如歸」同「創作麺工房鳴龍」，2間都拍過片，有興趣可以睇我嘅東京vlog。
Tsuta蔦拉麵嘅招牌菜係〈醬油味玉叉燒拉麵〉$149，湯頭有雞、蔬菜、蜆、魚乾，配搭自家原創醬油，再加上少少黑松露醬。飲落清爽得黎，帶有少許魚介嘅鮮味。黑松露醬亦會帶黎額外嘅香氣，不過我一向都唔鍾意松露醬或松露油唔自然嘅人工味道。湯頭鹹淡適中，相比起湯頭材料近似嘅金色不如歸，Tsuta蔦拉麵飲落會再平衡一啲，醬油味同蜆味冇咁突出。麵條係直身幼麵，咬口正常，唔會太糊。呢種麵屬於掛湯能力高嘅麵，配合偏清淡嘅湯係合理嘅，我以前啲片有講過「掛湯」問題，有興趣又可以去睇睇我嘅拉麵片！XD 叉燒又瘦又乾，味道上冇令我留下深刻印象嘅地方。另一碗〈鹽味味玉叉燒拉麵〉$149，冇左醬油提鮮，味道就平淡左好多，二揀一一定係揀〈醬油味玉叉燒拉麵〉。最後要講下，佢杯水係室溫嘅，可能又要蘋果搵個專家去話畀佢知，日本拉麵店傳統都係畀冰水客人。香港黎講，佢算係一間高水準嘅拉麵店，但唔係我杯茶。
————————————-
Tsuta蔦拉麵
地址：尖沙咀廣東道3-27號海港城港威商場地下G111號舖
香港麵廠 在 長沙灣【福林#百年麵廠】香港味道款式琳瑯滿目（#蝦子麵/全 ... 的八卦
長沙灣【福林#百年 麵廠 】 香港 味道款式琳瑯滿目（#蝦子麵/全蛋麵/手打烏冬/即包餃子⋯）Hong Kong century-old noodle factory ! Hong Kong style! ... <看更多>