貼堂時間！
尋日天婦羅條片，收到好多不禮貌留言，教訓我食天婦羅一定要坐吧檯！
話說「是山居」對拍片同影相有嚴格規定，唔可以影到師傅同其他食客，喺吧檯set機，距離太近，光線又冇咁好，唔會拍得好睇，而且我本身唔想影響到其他食客；所以我地揀左上二樓坐私人房。有個留言，竟然嘲笑咁樣係「蠢」！話識食一定要坐一樓吧檯，首先呢點我只認同一半，坐吧檯氣氛係會好啲，又可以睇住師傅表演，但因為種種原因，好多人係唔會坐吧檯，你以為個個都方便同其他陌生人一齊食飯咩？仲有，全世界好多頂級餐廳，地方都好大，廚房行出黎都要走幾十步啦，用升降機運送食物喺好多酒店亦好常見。是山居個廚房喺正樓下，只係一條樓梯之隔，其實比好多餐廳送餐距離短，最重要一點，係天婦羅根本唔係「即炸即食」嘅食物，本來就要閒置，用餘溫做成「蒸」的效果。至於唔坐吧檯，睇唔到表演，係我地選擇嘅犧牲。邊個唔知阿媽係女人？最搞笑係有人睇左我個置頂，仲留言反駁我，話我坐二樓係「為左拍片而食」。真係攞命！我邊條片唔係為左拍片而食？唔通食飯嗰陣有cctv跟住我自動拍？
其實我都想比左錢好好嘆下！拍攝「有碗話碗」，本來就會影響用餐體驗，明明真金白銀出街食飯，又要做攝影師、燈光師、收音師，再做埋主持講食評。之前都講過，食自助餐、放題，好多時都唔夠時間，自己都食唔飽！又例如食拉麵，一上菜，我會趁熱先飲一啖湯再試一啖麵，之後拍特寫，到我自己真正食嘅時候，麵都淋晒湯又凍晒！唔怕醜講一句，「有碗話碗」，係粵語YouTube「自費」飲食片中，最多機位、最多運鏡、最多食物product shot嘅節目，如果要講「蠢」，做咁多未必有人理解嘅幕後製作仲「蠢」。目的只係想大家睇到清晰嘅真實餐廳評測，唔係電視、雜誌、製作公司做嘅廣告 / 鱔稿，亦唔係「鬆郁矇」影住自己個頭係咁講野嘅YouTube片。一堆人睇完條片然後講啲咁嘅說話，咁不如你直接同早乙女師傅講，做人梗係涼住冷氣坐喺度un un腳食天婦羅先正啦，邊有人咁蠢要企喺度炸野招呼人架？享受完人地嘅勞動成果再去嘲笑人地嘅付出？到底係咩心態？
食客所 在 食客所隱藏版巨無霸飯糰 - YouTube 的八卦
... <看更多>