［孔令成年代人工加得快過收入，點維皮？］大鑊飯輸咗實有人填氹就係原罪啦
1. 對上篇文寫過海洋公園，齋up冇數字，反應不錯（https://bit.ly/3bsenGd）。之後有篇講過，海洋公園，人工佔咗收入45%，似乎相當高，反應更好。似乎大家對呢啲最敏感（https://bit.ly/2WtqAWI）。如果盛智文係米老鼠殺手，我就係海洋公園殺手了。
2. 結果我係入晒過去廿年嘅數，就在呢度，畀你睇。循例講返，海洋公園係6月年結，2019 即係「2018年7月至2019年6月」。亦都分返盛智文年代（橙色）同孔令成年代（紅色）。
3. 建議你Save低個圖慢慢睇，或者另外開個tab 或 window
4. TL;DR 嘅：盛智文年代的確渣數渣得緊，睇餸食飯，唔會畀個人工亂咁上。而家就開唔到源，孭住一身利息同折舊，做乜仲要不停加人工？但其實就算你人工／收入去返盛智文年代，都係輸錢的，只係冇咁難睇大家條氣順啲。始終洗濕個頭，呢舊嘢一早就唔應該存在。
5. 海洋公園冇人去係咪死因？我認為唔係主因，首先講收入（行4）同入場人數（行13）。你見孔令成年代，入場人數係咁跌，但有好多原因（例如你而家一年去幾次日本，大陸人都係）。至少見到一樣嘢，就係段人頭計每位入場客人嘅收入（行14）仲升緊，當然因為加價，或者啲汽水貴咗。至少你見到近年收入（行4）都係有升嘅。
6. 至於話公園聚焦係大陸人出錯，應該吸香港人，我相當有保留。好簡單，睇返陳南祿年代，亦即係自由行之前（盛智文食正自由行第一浸水），一年都不過二三百萬人入場。簡單數學，你自己諗下呢個數字可唔可能維到而家嘅皮。更何況，我相信如果扣走大陸人，而家根本冇可能有二三百萬人人場。
7. 唔好忘記，陳南祿嘅前自由行年代，未有得上Facebook，去日本仲要簽證，仲未有迪士尼。都只係得兩三百萬人。而家只靠本地客仲會唔會有咁嘅數？你話呢？而最重要係，陳南祿年代，公園都係蝕錢多，只係手作仔唔蝕得多。
8. 到你最關心嘅嘢：公園主要死因，相信就係人工。甚至唔使深究佢請咗幾多人，我地睇大數。上文講過，而家公園人工開支佔咗收入45%，唔少人嘩然。但公平地，睇返以前係點。結果係維持原判：而家係相當高嘅
9. 盛智文年代，人工佔收入，從來冇超過41%。就係33-41%，平均37%。特別留意最尾幾年呢個比例特別低，去到33%左右（綠色），相信因為其他開支大（下面詳講）。所以除咗話盛智文有諗頭，更重要留意佢摙數都好緊，唔係大花筒。
10. 孔令成年代，比例係35-44%，平均40%。仲要只有第一年接手係35%，之後每年都大過40%。我甚至可以懷疑第一年咁低，只係因為上手留低嘅數，佢未話到事。但未有證據。你可以疑中留情。
11. 公平咁講，我計過，其他東西不變的話，就算孔令成年代，人工佔收入減到盛智文年代嘅33%最低都好，公園都仲係年年蝕，但會蝕少好多，每年蝕少一兩億（自己計到啦，不難），大家條氣都順啲—但當然啲高層條氣就唔順—而反正佢唔使向你問責，理撚得你條氣順唔順，蝕錢有人填氹。信我，冇其他束下，人性貪婪永遠prevail 。你同我都係，「不過你同我入唔到去做高層咁解」。
12. 冇心機嘅，睇到呢度已經可以扮專家。有心機嘅，睇埋落去。
13. 再學術少少，就要睇埋其他嘢。講過（14行）係收入除入場人數，即係斷人頭計嘅收入。同樣理念，（行16）就係人工開支除入場人數，斷人頭計（遊客人頭，唔係員工人頭）嘅人工開支。黃色嘅（行15）同（行17），就係呢兩樣東西嘅按年增長。
14. 理想嚟講，例如其他上市公司嚟講，股東呀分析員呀會睇呢兩個增長。你人均（再講一次，遊客人均，唔係員工）收入升得多，咪justify你加多啲人工，no matter 係請多啲人定係唔加人但加人工。
15. 所以，理論上呢，人均收入增長（行15）應該大過人均人工開支（行17）嘅。另一講法係，睇個個JAW（行18），即係（行15）減（行17），呢個JAW應該係正數的。
16. 盛智文年代，個JAW多數時間都係正數，即係人均收入升得快過入均人工。有一兩年只係僅僅負數。2009年係唯一一年個JAW去到10%（藍色），人均人工升快過收入好多—你見到，打後幾年個人工佔收入即時壓返低好多的（綠色）。
17. 好啦，孔令成年代，就當然係相反。你見個JAW差不多年年負數（藍色），人均人工加得快過人均收入，正數嗰年都只係剛好差不多。好簡單嘅問題：點解人均收入冇乜加到，人均人工可以不停加呢？講唔通喎。
18. 另外，有個講法話，係盛智文年代借落唔少錢，而家還息都還死。一半半啱。睇表，（行9），的確盛智文年代早期，海洋公園係冇貸款，冇利息開支。到孔令成接手時，係每年還息都差不多2億。不過睇返，盛智文後期，一樣係咁樣孭住一年2億利息開支，但佢盤數一樣靚仔。
19. 關鍵除咗係盛智文開到源，亦因為節到流—就在呢啲利息開支大升嘅幾年，你見到盛智文年代末期，個人工佔收入比率，咪壓到好低（綠色）。有其他開支，人工咪冇得加咁多，有幾難明？但到孔令成年代，似乎就係開源又不濟，但其他開支就明知係大，做乜人工仲要畀到咁高？都唔好忘記，其實呢，計及通脹，而家年年還2億利息，負擔應係輕過盛智文年代的。等於你開頭做嘢一個月供五千蚊樓吃力，但到你十年廿年後應該就冇咁吃力。
20. 講多樣嘢，折舊（行8）。唔知咩係折舊嘅，最簡單話你知，買啲PPE（Property Plant and Equipment）返嚟，唔會一年計晒入開支，係逐年咁搣，計入折舊。
21. 對主題樂園嚟講，折舊的確係好Q大嘅成本。睇返（行7），公園一路都有「經營盈餘」，即係收入減咗餦高層餵企鵝水電煤後係正數的，孔令成年代都仲係—但，未計利息同折舊嘛！即係類似EBITDA易必打嘅概念。留意香港迪士尼所謂「賺錢」，都只係易必打迫伊汾，NOW台亦都係，計埋利息開支同折舊就死得
22. 利息，頭先講咗，一年2億左右，冇得減的（唔通叫銀行收順啲？）。折舊都係。但你見孔令成年代，一年孭嘅折舊係4億，盛智文年代開頭講緊1億唔夠喎。呢度係分別。
23. 點解而家大升？就真係因為盛智文中段，PPE升咗好多（行23）。盛文智接手時係5億，到佢起身時係50億，十倍，仲要係扣走咗折舊嘅淨值。當然係因為啲翻新同擴張大計。有冇成效就難啲判斷，但都係睇大數。盛智文後期一樣係孭緊一年4億嘅折讓，但佢一樣交到數—同利息嘅情況一樣，正係因為呢啲開支大，你見個人工佔收入，咪壓低咗。
24. 個壞消息就係，你見就在最近一年（T23），個PPE又係爆升，58億升到69億。當然都係啲新玩意。有冇成效唔知，但好粗略計，你啲折舊應該由4億升到6億咁上下—更加係維唔到皮的，就算你減人工都好難。
25. 事到如今，已經玩到太大。我相信你叫盛智文返嚟玩都唔會點救得到。好粗略講，一年畀息都2億，折舊又6億，即係你個經營盈餘（行7）要有8億—盛智文任內都冇試過做到，我亦都唔信佢會返嚟同你顛。
26. 本人同信報高天佑算係朋友，十分同意佢講 (https://bit.ly/35VemcG) ，而家嘅玩法，一定冇得玩落去。如果你將佢縮為一個水族館咁，可能仲有得玩。畢竟啲魚食唔到你幾多。最緊要炒晒啲人。同埋正如高兄所講，啲機動遊戲就應該摺晒佢。你睇到係過時的，而年年食住6億折舊 – 不過頭已洗濕，又可以點呢？
27. 千錯萬錯，根本政府去搞個主題樂園就係錯。四十年前可能啱，而家絶對冇咁嘅需要。而根本呢啲咁嘅怪胎機構，係最藏污納垢，仲衰過政府的—政府都仲要跟公務員薪水嘛，呢啲唔使。
------------------------------
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
陳南祿 在 【馬會與香港特區跨越25載特輯】香港賽馬會前主席陳南祿先生 的八卦
一齊收睇香港賽馬會前主席 陳南祿 先生的專訪。 更多詳情: https ... 「駿步人生」 陳南祿 每當變幻時. HKJC•1.1K views · 0:41 · Go to channel · 【馬 ... ... <看更多>