【蛋卷叉能廚 · Egg Roll Fork Can Cook】
距離奶奶廿公里，但卻這麼近那麼遠，等咗兩個月終於可以喺母親節前相見。我見到奶奶同個心肝寶貝仔四目交投嘅神情，可遠觀而不可相擁，真係心酸。奶奶邀請我哋食母親節午餐，可恨因為意大利仍未完全解封，所以我哋要推飯局俾檸檬奶奶食，奶奶係咁問點解，點解唔可以通融一次？最多分枱食吖？個仔忍淚同佢阿媽講：「對唔住，我哋咁做都係因為想保護你......」
劇情太催淚，我要諗辦法補償奶奶。知佢好鍾意食香港嘅蛋卷，而喺意大利幾乎唔會見到有得賣，於是乎我決定自己整！
要做到香脆鬆化嘅蛋卷原來一啲都唔容易（可能係我技窮啩😅）！兩日內我足足試咗5個食譜、3種焗法、麵糊唔同嘅厚度、打哂成屋嘅蛋白......終於都鍊成蛋卷術！
除咗意佬阿媽，仲有意佬姨媽啊、姑媽啊...派少一個佢哋都會呷醋呢！為咗應付媽們，琴晚試到半夜，今朝未雞啼已起身再作戰，趕及要喺媽媽節送出蛋卷。
奶奶收過我嘅自家製蛋卷，拆都拆唔切食唔停口🤣佢準備收埋驚俾其他姨媽姑嗲見到會嚟搶，我就攞埋其餘嘅蛋卷禮品包出嚟，叫奶奶唔洗擔心班師奶會嚟爭，人人有份永不落空。
奶奶終於笑返，仲大讚我知佢心意，我心諗：「咁都抵我逐條蛋卷熱住咁用手捲，捲到就嚟水泡都起埋都值回票價~」。希望下年母親節可親手整俾我母親啦！
意佬見我試到成面牛油，焗到自己成條蛋卷咁都唔成功，叫我放棄，但我堅持堅持再堅持，最終得咗！💪
如是者，我今趟又領略到一點點：
「人生同焗蛋卷一樣，唔脆試到脆，唔得試到得。
只要你唔怕跌倒，唔好放棄，努力勇於嘗試，成功就會出現喺你面前。」
依家鬆一口氣，下一個叉能廚：要諗諗如何清哂雪櫃嗰15隻蛋黃🙈
#嫁到意大利
#港女焗蛋卷
#阿媽要氹
#奶奶都一樣要氹
#堅持
#EggRollChallenge
#TheFartherWeStay
#TheCloserWeAre
