不見五陵豪傑墓
世事嘅嘢，好難講嘅，同打麻雀一樣樣，見勢色唔對，判輸嚟打，自己安慰自己，戒急用忍，潛龍勿用，以守為攻，否極可以泰來。對手步步進逼，自己步步為營，無出沖當贏，守吓一盆，守吓一圈，守到北風尾執位再打過，開櫃桶發現，仲有些微銀兩，當堂笑哈哈，有賭未為輸，笑到尾至係贏家。
唐伯虎話齋：「別人笑我太瘋癲，我笑他人看不穿。不見五陵豪傑墓，無花無酒鋤作田。」做人嘅嘢，唔樂觀唔得，唔通日日悲觀負面死人冧樓咩，好容易癲㗎，做人處事，作最壞打算，但忌懷憂喪志，宜莫忘初衷，我咁渣都得，你妳您一定得。
後記：
上星期舊同事相約食飯，自斟自飲，一支公飲酒唔悶㗎，我同其中一位有過呢番簡短對話，值得寫低勉勵大家：
我：你精神麻麻，仲瘦咗㖭。
朋友：瞓得唔係幾好，你知啦，香港社會咁情況。
我：你覺得你唔開心，可唔可以令香港恢復正常。
朋友：我都唔想㗎，無辦法控制自己情緒。
我：學我啦，鍾意睇書就睇書，鍾意睇戲就睇戲，唔想睇新聞就一於唔睇新聞，完全無問題之至。食飯行街睇戲，食得瞓得痾得，生活如常，一切如常，至係保持長期作戰能力嘅最佳方法，等到對手恨得牙癢癢吹乒乓，自亂章法，我哋至有反敗為勝收復失地嘅可能。
希望同事領悟到呢番簡單道理啦。
香港人加油，堅持。
後後記：
近期睇緊哈維爾《無權力者的權力》，2003年中文版，上世紀70年代捷克，作者稱之為「後極權主義體制」，一切官僚規章法律標語意識形態，通通都係謊言，虛假過虛假，惡劣過香港百倍，哈氏本人鼓吹「真實中生活」，誓死捍衛異議者當然責任。蘇聯解體後，哈維爾榮登捷克第一任總統，一做十三年，國際聲譽頂瓜瓜，我誠意推介。
後後後記：
唐伯虎《桃花庵歌》
桃花塢裡桃花庵，桃花庵下桃花仙。
桃花仙人種桃樹，又摘桃花換酒錢。
酒醒只在花前坐，酒醉還來花下眠。
半醉半醒日復日，花落花開年復年。
但願老死花酒間，不願鞠躬車馬前。
車塵馬足顯者事，酒盞花枝隱士緣。
若將顯者比隱士，一在平地一在天。
若將花酒比車馬，彼何碌碌我何閒。
別人笑我太瘋癲，我笑他人看不穿。
不見五陵豪傑墓，無花無酒鋤作田。
開年飯推介 在 今日晚餐#開年飯#part1 #太多好菜 - YouTube 的八卦
今日晚餐#開年飯#part2 #條魚蒸得好好味. Chichi 冰•8 views ... 在深圳岗厦站，點都德吃早餐，大满足的一天！ . 振和推介 New 31 views. ... <看更多>