《每當空姐抗爭時，就係畀人圍剿時...》
國泰空姐空少畀公司減 allowance cut 底薪，佢地搞工潮靜坐遊行準備罷工抗爭，每次工潮，佢地都會畀部份公眾人士圍剿。
我有幾個朋友仔做空姐，佢地解釋過人工點畀人cut，我計數係同王梓軒咁叻架，解釋左我都唔明。但明明佢地畀人剝削抗爭，點解圍剿人地？我諗一切源於「公眾點睇空姐空少份工」。
－－－－－－－－－－－－－－－－－
公眾點睇空姐空少份工...
「佢地份工唔係做野架，玩架渣」...
「空姐空少成日放假架，又環遊世界，風流工來架，應該減佢地人工」。我諗大家都聽過子華嘅魚蛋論，有D人總係唔抵得人地串魚蛋好食過自己個串，自己個串唔好食，要大家都唔好食先滿意。你份工辛苦，點解你唔jobsBB搵份冇咁辛苦嘅工，而係希望人地份工要同自己份工一樣咁辛苦？
點解assume空姐空少一定唔辛苦？
我呢D OL，每日除左返工放工搭車，基本上我成日只會郁到五官同對手，頂盡除埋鞋喺檯底用左腳腳指R右腳。空姐著住對高踭鞋，日日好似百萬行咁，可以由香港行去美國，我諗起都見攰。
全世界最辛苦個份工一定係「我」份工...
我明架，全世界最衰個間公司一定係自己個間公司架。聖誕節我公司座聖誕樹好似長洲太平清醮座包山咁高，我都睇佢唔順眼，覺得隔離公司座聖誕樹好似伯利恆星咁閃耀。根本你睇我好，我睇你好。工來講，冇一份係好架，只有冇咁衰架渣。你日日羨慕加藤鷹，可能加藤鷹最羨慕唐三藏，根本佢就受夠女人，日日搞野都覺得來回地獄又折返陰間。
－－－－－－－－－－－－－－－－－
空姐空少有得去旅行，就係佢地嘅原罪...
→ 「佢地有平機票架，減人工係佢地應該要付出嘅代價」，唔抵得就唔抵得啦，擺明就羨慕妒忌恨。人地員工福利係平機票，點解佢地冇啦啦要付出減人工呢個代價？地鐵員工夠有得免費搭地鐵，係唔係又要唔抵得人有免費地鐵搭，要減地鐵員工人工？
→ 空姐空少當然有為份工付出代價啦，日日飛被輻射射，過節冇得留喺屋企，生活作息亂哂龍，呢D都係人地嘅代價，個代價唔係好似麥兜個胎印咁明顯姐。
－－－－－－－－－－－－－－－－－
你撐碼頭工人，地盤外判工，但又唔撑空姐空少喎...
「空姐空少點夠碼頭工人，地盤外判工慘呀？」。辛苦係冇得量化架，係唔係要鬥慘先，係唔係要好似周星星同梁榮忠咁喺華府門口，申訴邊個夠我慘，鬥嬴先幫呀？
「空姐空少根本冇bargaining power ...」
「佢地冇技能可言，隨時畀人取代，大把人等住做，有咩bargaining power 先？」其實佢地都要接受專業訓練，又其實，係唔係只要你份工好易畀人替代，就應該畀人刻薄？咁掃街洗廁所保安看更係咪都應該畀人刻薄。
－－－－－－－－－－－－－－－－－
「空姐空少都唔團結，都唔係個個去靜坐...」
公司annual dinner 有獎抽，都有D同事死都唔參加，冇可能全間公司打工仔出席活動。空姐空少長期有班人喺外地，點齊人呀？
唇亡齒寒你地聽過嗎？
國泰員工畀人刻薄關我蛋治咩？大公司剝削員工 ，今日國泰，難保你公司見國泰成功剝削，有樣學樣。如果你依然覺得，真係關我蛋治咩，咁空姐空少抗爭又關你蛋治咩，仲咩插佢地抗爭呢？
暑假先來罷工，真係冇人性...
班仆街年年暑假先來罷工，好disturbing ，唔抵幫架。咪就係因為佢地年年畀人刻薄，佢先年年罷囉。如果你去旅行個日，撞啱佢地罷工，畀D同理心出來啦。你當時運低，旅行個日冇啦啦有颱風風眼喺你頭頂盤旋，「天氣不似如期，但要走，總delay」得唔得？
邊個夠我慘 在 周星馳| 唐伯虎點秋香| 經典電影片段對白金句| 邊個夠我慘 的八卦
最緊要開心！廢話少講，直接去片!【 歡迎大家成為我頻道嘅訂閱者。:) 】#周星馳#唐伯虎點秋香#周星馳經典電影片段#周星馳經典對白#周星馳經典金句#星 ... ... <看更多>