一，醫管局職工經過大比數決議，宣佈罷工。發言人台上灑淚；睇得出都係一個困難嘅決定。其實經過沙士一役，我相信好多香港人都企響醫護嘅一邊。
二，當然，亦唔排除會有藍朋友會話：「做得呢份工，就預咗㗎喇。」我唔知佢哋係咪做醫護；係嘅，我都會尊重佢哋堅守前線嘅勇毅忠誠。不過，假如係唔關係嘅人，我只會講：「你都幾無良，迫人攞條命搏。」
三，道德，早幾日講過呢個題目；其實有一個好基本嘅原則：「己所不欲，勿施於人」呢句說話，出自《論語》。洋人語境，耶穌都講句一模一樣嘅：Do unto others as you would have them do unto you。當耶穌同孔子都不約而同，夠份量啦。
四，耶穌同孔子，唔係叫你做聖人偉人，亦唔係叫你大愛，而係叫你做返個人。好基本嘅要求就係，你當自己係人，就接受其他人都只不過係人。你會真係搵條命去搏咩？遠嘅唔講，暉明、麗晶、美孚嘅街坊點解咁燥？佢哋心裡面嘅問題係：Why me？
五，政府有冇人出來同佢哋傾？冇。好忙？真係咁忙？一個話得事嘅都唔得閒？唔好玩啦。驚就認咗佢啦。我嘗試代入政府官僚嘅角度去諗，負責搵地方嘅，又唔駛負責同社區溝通；要面對群眾嘅，又唔係搵地方個部門。結果，咪有部門話搵到地方，有部門話好吖，幾時搬；就係冇人會問：「咁有冇同地區人士傾過？」然後兩個部門就你眼望我眼：「傾，咁就 close 唔到 file。」如是者，大家當睇唔到，出事先算。
六，「你又知政府咁多嘢？」同我熟嘅朋友都知，我都算做過下大機構嘅十九管理層；其實大機構同政府，差唔多，分分鐘衰過。剛才講嘅現象，以前打工個陣，日日都見，個經歷都令到我唔想再做大公司。
七，講返正題。千錯萬錯，林鄭就係衰一樣嘢：「點解唔封關呀？不該！」
八，其實，我都係估，林鄭非不為也，實不能也。我唔係為佢開脫。佢要搵十九個理由去支持「死不封關」呢個決定，係因為呢個係佢唯一可以做嘅事。咁點解唔可以呢？最大可能性就係北京唔畀。
九，點解北京可以封武漢、封湖北，就係唔畀香港自封？其實你都可以想像個畫面：香港宣佈封關，大家額手稱慶；即係，行動上確認咗中港區格得人心。嘩，咁仲得了嘅，咪畀班反中亂港有位入囉。所以，澳門就可以，香港就唔得。（後補：讀者指正，澳門都冇全封，只係對曾經去過湖北嘅入境人士作出限制。）
十，封關，本來係特區政府彰顯「香港可以說不」嘅絕佳時機。依家先封，我睇香港人都唔會原諒佢；當然加埋之前幾個月嘅恩恩怨怨，呢個政府醫返都嘥藥費。
十一，不如，我又估下北京同香港政府，會點樣應對吖。大家可以 Save 低呢篇，過半年大家對一對。
十二，先講北京。很肯定，中央會不計後果咁，超級放水。又話說，近年大陸有個講法，叫「定向寬鬆」，意思係不但放水，而且可以對到準一準咁放。呢次嘅規模，點都會大過2008年嘅四萬億。即係話，衰足十年嘅 A 股，都有可能水浸。
十三，當然，北京放水，一定會同時吹水，講到係要發展乜乜物物。今年要公布「十四．五」規劃；其實上年底，發改委已經開工起草。 我睇過下啲文件，話「十四．五」呢，會將市場行為劃做「第二准則」，我嘅理解係會講到明有乜係市場唔可以做，剩底嘅，先至由得你去玩。
十四，我又見文件講咩「工業化後期」、「人工智能」、「城鄉人口雙向流動」、「高齡化」、「生態建設」同埋「社會治理」。究竟有邊啲股份受惠，大家仲有幾個月去慢慢研究。
十五，「區域協同」都似乎會係重點。咁，大灣區就一定會講，深圳就一定係主力，香港就金融中心乜乜物物，珠澳橫琴咩休閒旅遊，廣佛係行政文化⋯⋯非常之咁 predictable 。
十六，香港呢？香港一樣會係咁派錢。不過，香港真係距離結構性赤字冇幾遠喇，所以特區政府會派，但大多數嘢都唔會恆常化。
十七，不過，政府體制同負擔，已經超出呢個人口逐漸高齡化嘅社會可以承擔嘅程度。過去，我講緊十幾年前，香港特區政府會講咩吸引人才之類嘅，今日仲講呢套，真係難聽過粗口。至於叫退休人士返大陸養老，我諗講出口都一樣畀人吊起來啦，係咪？
十八，所以，可能呢個政府，乜春都唔講。但，唔代表唔做嘢。
十九，從香港公共財政嘅結構去分析，利得稅你唔郁得，一郁就真係拆去新加坡；再講，其實好多企業，根本就係要來 hold asset 之嘛，邊有稅交？來來去去，咪又係個一百幾十間大企業。
二十，今時今日嘅社會，尤其係服務業，你加我 1% 稅率，我肯定有人將基地外遷（我都講咗幾年）。政府稅收增加嘅比率，亦唔會等於稅率增加嘅比率；分分鐘收少咗都唔定。一刀切加利得稅，未必有著數。
廿一，不如加啲走唔甩嘅大財團啦！我都幾肯定，政府係咁諗。大財團亦都一定詐型。世界同北京大旋律之下，咩企業社會責任吖嘛，我估政府會有啲 plan 畀大財團：你一係交稅，一係就自己攞去做公益嘢。機會來喇飛雲！啲咩 NGO 社企之類，一定好好生意。
廿二，以上，都係解決唔到香港公共財政最根本嘅問題，就係越來越多人，甚至企業，佢哋最重要嘅財富來自資產價格上升。理論上，香港冇資產增值稅，但好似話為賺取收入而買賣資產，又可以收你稅喎。但係，呢啲技術問題，一定可以技術解決。我唔買賣資產，但搵方法變現金流得唔得呀？一定得。現金流收入，畀少好多稅。不過，呢啲玩法只限一百幾十億身家以上嘅人，我估呢度冇幾多個（有嘅，inbox 小弟，等我開心下，原來都有咁 high net worth 嘅讀者）。
廿三，最後，呢個政府除非放棄聯匯，否則唔可以賺好多，印以亦唔可以自己印錢買自己嘅債，所以唯一可以量化寬鬆嘅資產，就係⋯⋯登登登等⋯⋯土地！
廿四，明日大嶼，就係土地量寬。
廿五，唔熟地政嘅朋友，可能會以為，政府鬥地主要收農地，其實就係要迫發展商明日要用真金白銀支持明日大嶼嘅地。我反而更相信，政府要發出一個訊號，迫發展商盡快用更高嘅溢價提出轉換土地使用，如果唔係就搞你。某程度上，都係一種鬥地主。
廿六，發展商，其實都係睇住麵包幾錢就用幾多錢去買麵粉。政府當然唔理得咁多；喂阿哥，大家都等錢駛，唔係你窮就係我窮，咁梗係你窮好過我窮啦。
廿七，發展商同政府，我覺得，最終係沒有贏家。土地嘅量寬，唔係冇代價。我見到未來嘅香港，窮人一世住公共房屋，係一世。以前仲有流動性，至少跨代有流動性。未來，階級會世襲，流動性大減。
廿八，土地經濟鏈崩解，可能有社會棟樑拍晒手。但係我想提醒一下大家，發展商嘅資本係流動嘅，唔響香港賺錢，佢哋都會將重中轉移。事實上，過去十幾年，好多都已經到處投資；甚至乎佢哋嘅私人投資，早就散佈世界各地。佢哋可以十幾代人都唔做嘢，都過得比我地富庶。但從前香港，由基層晉身中產，得兩條路：入大學神科同置業。
廿九，我曾經聽過一個故仔。有位仁兄，佢中環有一幢大廈咁多。有次佢話，每個月收租嘅錢，夠買一架法拉里；買得多，都厭啦。最終，都要搵地方投資，結果買埋買埋的大藍籌科技股，又倍倍聲咁賺。重點係，呢位仁兄響個有錢人圈子入面，根，本，唔，入，流。
三十，就係咁，香港真係一個好顛倒嘅地方。富不與官爭咩？咪唔好爭囉。冬天去下滑雪，夏天就巡下酒庄，咁又一年。官，日日畀人吊到開花，但真係好慘咩？佢哋閒閒地有幾千萬，仔仔囡囡又可以結交下啲新貴，咁又一世。
三十一，無權無勢嘅，我知佢哋嘅積怨。早幾年，大家都發下夢，以為可以做隻咩 App 畀騰訊阿里收購，就有十億八億。發夢就冇咁早。事實係，搵兩餐晏仔，唔難；發達，就可以慳返。
三十二，講真，今時今日搵十萬八萬一個月，都真係算窮。你無聽錯。係窮。搵幾百個一年，有資格做中產。有幾千萬身家，大把人。過億，都先至剛剛叫做有個錢。我有時覺得，只係可以出得起兩、三萬請個同事幫下手，真係唔好意思開口叫佢哋做咁多嘢。
三十三，香港咁嘅狀態，好大程度係因為量化寬鬆。其實量化寬鬆，唔單止令香港扭曲晒，甚至乎世界各地發達國家，多少都係咁。不過，你去美國，大不了搵個鄉下地方，過田園生活，一定餓你唔死，等閒打下機，上 Facebook ，上 Amazon 訂下嘢，咁又一日。
三十四，但又話說回頭，搵幾世都用唔晒嘅錢，又點？咪用唔晒囉。我知我咁講好似有少少阿Q，但實情係，歷史上有錢人不嬲都係極少數，科學家都係，運動員都係。不過，偏偏香港有一段日子，演變出一種以身家論身份嘅文化；咁當其時又真係做大學教授嘅十個八個，非常咁見駛。做大企業管理層，十個廿個，已經住紅山半島陽明山莊。呢個係上世紀八、九十年代，我哋稱為香港黃金時代最好嘅日子。
三十五，其實自從亞洲金融風暴到沙士，香港已經內傷；我越睇就越覺得，近年香港係故事嘅尾聲。對社會，我係悲觀嘅；甚至對人類文明，我都好灰。我唔擔心自己，我擔心嘅，係下一代人面對嘅世界。
三十六，唯一希望係，我哋嘅下一代，可以平安咁過自己嘅人生。正如一開始所講，道德其實好簡單，做人，就係對身邊嘅每個人嘅要求，就好似對自己嘅要求一樣；唔好睇唔起自己，亦唔好睇唔起其他人。好人一生平安，亦應作如是觀。
資產增值稅 在 增值稅- 維基百科，自由的百科全書 的相關結果
增值稅 （英語：Value-added tax，縮寫VAT）或加值型營業稅是一種消費稅，屬累退稅，是基於商品或服務的增值而徵稅的一種間接稅。 在澳大利亞、加拿大、紐西蘭、新加坡 ... ... <看更多>