《今日係我last day，計劃多時嘅裸辭終於付諸實行，之後我會全職寫作... 講笑吓嘛， 全職寫野食風咩?》
「裸辭好型呀你？」... 食穀種有咩咁型？
話說我講俾身邊任何一個同事或者朋友聽，我裸辭，佢哋都串我，覺得我講大話，「咪玩啦，唔想講我知有咩新路數，喺度扮哂野」。香港地好鬼痴線，好似一畢業做野就唔俾停，一裸辭就好似有精神病咁，我真係無精神病，真係無呃大家，我堅係裸辭。然後終於有啲朋友相信你係裸辭，佢會話「好型呀你...」，其實食穀種有咩咁型？
「裸辭好勇呀... 我唔敢呀」...辭職唔需要勇氣架，上網google 封resignation letter print 出來得架啦...
「你呀媽有無鬧你呀？如果我呀媽知鬧死我呀」，其實我一直都係一個不屈不撓嘅死女包，呀媽知道我裸辭，佢話「有咩叻呀你？最叻就係辭職架啦」，我覺得大家都over estimate 「如果裸辭，呀媽鬧你」嘅威力，其實無咩野，佢話得兩話，知道改變唔到咩，就會放棄。呀媽知你無錢洗就會死死地氣搵工，就好似政府知你佔中訓街，訓訓吓終歸都會散水一樣。睇死你最後都會搵份工，所以呀媽都唔再嘈。
老實講，喺好多人眼中，我係絕對唔應該辭職嘅...
好多親戚朋友同事甚至三唔識七嘅人都話「你公司有買樓優惠，點可以resign？」的確，我公司有買樓優惠，有meal allowance，有車船津貼，甚至我有同事每日都唔使帶錢返工，因為只要你早到遲走不停OT，就會可以claim 哂的士錢，claim 埋三餐。「resign opportunity cost 好似好高，點解仲resign？走就無買樓優惠架啦...」，因為我有信心，我走咗會發達，發到唔使優惠都買到樓... 講笑，其實係我唔想做到可以claim 哂所有錢，我覺得如果生活只剩返衣食住行，呢啲野赤柱啲 監犯都有啦。生命除咗層樓，meal allowance同車船津貼，應該仲有好多「其他」。
我唔想再連續返18 日工，唔想再同地產商打工，想有時間訓教，想有時間寫作，所以我諗，不如try try 全職寫作...
大家見唔見我個page 置頂個個post，我仲未收到份freelance job條尾數架，全職寫作加做freelance，喺香港地應該係比買樓更難，但明知山有虎，偏向虎山行，我呢啲熱愛高風險投資嘅人，try try 啦。
我知要食飯架，我知世界艱難架...
我唔可以依靠光合作用維生，我知道搵食艱難，呢個世界亦唔存在不勞而獲。如果全職寫作加freelance真係搞唔掂，到時，我再搵一份我鐘意嘅工，sustain 我嘅生活，同時可以work life balance…um，咁到時先算啦
大家可以點協助我哋呢班「明知不可為而為之」嘅寫作人？
今日我睇到 藍橘子話佢好現實架，佢睇like 做人... 我想話，咁啱嘅，我都係好恨有人like 我架喎。我覺得寫作同音樂好相似，音樂有古典音樂，表達社會議題嘅非情歌，情情塔塔嘅k歌等等等，可能音樂人嘅心目中，有啲係有藝術味，有啲只有商業味，而藝術味往往係high culture，商業味往往係low culture。有時寫文嘅人，都會互相討論，邊邊個文筆好，邊邊個垃圾稿，邊邊個寫埋哂啲垃圾都咁多人like… 但我覺得，文化創作，無高低等之分，我支持寫作多樣化，只要係impress 到人嘅文章，都有值得欣賞嘅地方，而我哋寫作嘅人，就係好想人哋認同，亦所以好需要like。寫野已經係無咩錢賺嘅時候，點解唔可以「開聲話」希望得到like呢？
我準備好食風架啦，以後就請大家俾啲憐憫心，多多支持我啦...yeah...
講大話精神病 在 經常說謊可能係「病態說謊」！長期讚自己有多了不起大多自信 ... 的八卦
很多人都會說過「美麗的謊言」，但如果患上病態說謊，就不容忽視。精神科專科醫生張漢奇認為，病態說謊者，一般是長時間刻意捏造謊言，說自己有多 ... ... <看更多>