冇諗過自己寫鴨腿湯飯，竟然搞到自己心思思，真係走咗去蓮香食鴨腿湯飯。
鴨腿湯飯似乎係廣東人嘅飛佛。而我就真係記得細個嘅時候，夏天唔想食飯，阿媽就會搞好多湯飯出嚟，最常見嘅就係冬瓜粒湯飯！所以出咗嚟做嘢，喺夏天但係又要喺戶外做騷嘅時候，就最鍾意喺附近搵間餐廳，歎番碗湯飯，而大個咗識搵錢，就梗係要嘆番碗鴨腿湯飯喇！
有陣時做嘢做到熱辣辣，真係放唔到一啖飯入口，但係湯飯就唔同，好容易入口。而鴨腿湯飯因為有陳皮，所以個湯特別醒胃順喉。
咁好嘞，講返蓮香樓呢個鴨腿湯飯先。個湯非常美味，肉汁香濃，可惜嘅係佢並冇加入陳皮，取而代之嘅係中芹，無錯佢都有一股特別清香，但係始終都唔及陳皮甘香！
另外佢用嘅冬菇亦都只係鮮冬菇，所以個湯亦都唔係好香冬菇味。不過佢除咗鴨之外仲有用排骨嚟㷛湯，令到個湯更加香濃兼有肉味，呢點係加分嘅。可惜佢只有一條菜心而冇冬瓜，就真係失真啦。
不過算啦，鴨腿湯飯加一盅好靚（對比其他酒樓）嘅普洱，兩個人加埋都不過係百幾蚊，抵食。
#何嘉麗callmegaga #何嘉麗 #為食路上 #蓮香樓 #鴨腿湯飯 #蓮香樓鴨腿湯飯的食後報告
