我有一個好短暫嘅同事，大家共事咗個半月左右啦，不過我哋好friend嘅，因為佢成日請我食飯，有次出去食晏，隨口講咗句：「嘩！呢度個lunch都幾貴喎！」然後佢就二話不說走去埋單。
最初我以為佢只係普通麻甩佬嘅慷慨。
又有幾次，大家一齊喺office睇online shop，我成日隨口話個袋幾襯你喎、件衫幾襯你喎、條褲好啱你喎，然後佢就add to cart and then check out。
最初我以為佢只係一個冇乜主見嘅人。
佢遞信辭職嗰日，公司要佢賠一個月人工（之前都講過我間公司只要一年內resign就要賠一個月，話之你9個月前通知），只見佢不痛不癢即場開咗張cheque畀人事部，就好似人類識得呼吸咁從容，我忍唔住講：「聽講有同事好聲好氣同上司爭取，真係可以個別處理唔使賠錢，因為你開過一張單，公司有機會無條件比你走㗎，唔使咁快開cheque喎！」
「唔緊要啦，費事煩。」
我：「搞咩突然辭職啫，搵到新工要即刻on board呀？」
「唔係啦，同老竇好返，之前同佢嘈交吖嘛，佢淨係比零用錢我細妹，斷我糧喎，雖然有積蓄啫，都要搵份工做下，唔想比老竇睇死。」
我：「吓，咁大個人唔使畀家用，仲有零用錢收返呀？佢比幾錢你呀？」
「個個月唔同㗎喎。」
我：「其實你都做得幾開心吖，第一個月假假地都開到一張單，話唔定適合喺headhunt呢一行發展呢，不如唔好resign啦！」
「唔喇，想唞下去個長旅行先，返嚟再諗啦！」
我：「嘩！輕描淡寫咁喎，積蓄始終會用完㗎，你老竇畀得幾多你吖，唔通買得起一層海之戀咩！」（當時荃灣海之戀啱啱公開發售，我哋日日笑個名改得好白痴）
「海之戀幾錢？」
我：「千幾呎啲大單位要成二千幾萬。」
「咁又真係買唔到，買到半層咋。」
…………
最初我以為佢係慷慨，最初我以為佢只係冇主見，但原來唔係呀，佢只係有錢，嗰啲都係散紙嚟咋……
點解突然提起佢？因為前兩日佢WhatsApp叫我出嚟食飯，我講笑咁話：「我去咗東京睇個friend簽紙結婚，另外有公事，唔喺香港呀，一係你飛嚟食啦！」
其實我講笑㗎咋，然後佢真係飛咗過嚟，而家坐喺我對面，但佢嚟到係冇嘢搞㗎，後日又會飛返香港。
我成日問佢老竇係做咩生意，不過佢死都唔肯講。唉，如果我努力啲做嘢，第日唔知可唔可以好似佢老竇咁有米呢？我諗都有機會嘅，希望在明天吖嘛，俗語有云條條大路通羅馬，做headhunt同埋寫稿都可以發圍㗎啫！
條條大路通羅馬，有啲人直接出生喺羅馬。
#唔知佢個妹有男朋友未呢
#直接食軟飯會唔會容易啲
荃灣海之戀 在 海之戀- 维基百科，自由的百科全书 的相關結果
海之戀 （英語：Ocean Pride）位於香港新界荃灣區大河道100號，為荃灣西站（五區）灣畔發展項目（Tsuen Wan West（TW5）Bayside Development）。按港鐵於2011年已獲批的 ... ... <看更多>