深夜無人睇，靜靜雞講故仔......
《我女朋友係一個恐怖演員》上集
我女朋友係一個演員，一直夢想希望可以被人看見，做到一線主角。佢畢業後就不斷參演唔同角色，但一直都係做一啲路人配角嘅角色，姐係出到街你見到佢，你會有一種熟悉感覺但嗌唔出佢叫咩名。
長期喺演藝圈入面浮浮沉沉，阿靜佢一直都好唔開心，情緒唔係太好，經常無緣無故咁喊。
作為男朋友嘅我，雖然唔知呢一行究竟點先可以做到主角，但我仍然盡心去鼓勵佢加油，我相信以佢嘅實力，總有一日一定有人賞識，到時一定搵到一個合適嘅角色發揮出大家睇。
果然，個天真係聆聽到我地願望，阿靜終於得到一套電影嘅第二女主角色，而且個角色性格同行為上都好似阿靜，簡直絕配，於是佢好比機去演活呢個角色，全程百分百投入。
「如果你因為呢套嘢而紅，你會唔會想同我分手先？」我講笑咁講，但其實內心都幾擔憂。
「咁呀，咁就睇下到時有冇靚仔演員同我合作喇，可能拍拍下擦出火花……」阿靜見我講笑，都配合玩埋一份。
無論將來點都好，我都希望佢可以紅，佢等咗咁多年，係值得比人看見。
但係好景不常，導演決定將阿靜除去，換咗第二個人去頂替。導演批評阿靜做得好差，根本唔知道演技係咩一回事，無論點做都做唔好個角色。
阿靜因為呢件事而令到今晚情緒面臨崩潰，佢捉住我喊住問：「究竟點先可以做到個角色好似真嘅一樣？」
我感到難過，但我實在唔知點安慰佢，於是含糊應對：「你已經做得好好，只係人地唔識貨姐，個導演係有料嘅，佢一早紅喇，所以你唔洗聽佢講。」
對於呢個回應，阿靜似乎更加不滿，更加覺得問題係出於自己身上。
自從呢一晚，阿靜就無再返工拍戲了，一直喺屋企唔出門。我理解佢心情，缺少咗佢嘅收入來源，唯有我努力啲做多份兼職幫補下。但對於阿靜而家個狀態，我真係感到十分無力。
有晚我放工返屋企，見到阿靜竟然好開心咁拎住份劇本不斷行嚟行去，口中唸唸有詞。
「做咩拎住份劇本行嚟行去？」我問。
「我背緊對白呀！」
「對白？有工開喇？係劇定係廣告？」我興奮地問。
「係呀！今次你估錯喇，兩樣都唔係！今次都係電影！」阿靜笑笑口咁講。
「電影？」聽到依到我個心突然沉一沉，因為自從上次換人事件之後，我收到風唔少內行人都批評阿靜嘅演技，所以基本上已經無導演同投資者會再搵阿靜拍電影，那怕係一個路人角色都唔會再搵佢。
「你聽過鬼導未？個導演好出名好叻架，今日佢搵我試鏡，點知話我演技好得，如果我拍佢套電影一定會紅！所以佢岩岩即刻比咗第一份劇本我，叫我好好加油。」說罷，阿靜又繼續開心咁背誦對白，心情顯得十分興奮。
雖然我未聽過有個導演叫鬼導，但眼見阿靜有工開之餘，仲可以令到心情開朗咗咁多，作為男朋友嘅我總算鬆一口氣。
但當我以為一切都變得美滿時候，原來只係恐怖故事嘅開始。
有次見到阿靜不斷用把鎅刀鎅自己隻手，鮮血不斷流出，而且每條鎅痕又深又紅，睇見都覺得痛。
我急問：「你做咩事呀？做咩無啦啦拎把鎅刀鎅自己呀？」
阿靜痛苦地說：「我今次角色係做一個邊緣少女，鎅手係我平時會做嘅嘢，只要我唔開心，我就要鎅手！」
「角色還角色，你還你！拍戲之嘛！洗唔洗真係鎅手呀？」
「我唔鎅手，我又點可以感受到真實邊緣少女係點？」
「你以前練戲都唔會咁嘅……邊個教你架？」我問。
「鬼導教我，佢話真正嘅演技就係將自己投入到真係做緊個角色，咁先百分百演活個角色，如果自己都唔了解角色平時係點，咁就唔會係一個出色嘅演員。」阿靜而家個解釋正正就係令佢不斷投入角色平時做嘅事，先真正做到真實感覺。
結果，呢套電影爆紅，喺網絡上面勁多人討論，而且評價非常好，各大媒體都盛稱阿靜演技處於巔峰狀態，好比當今影后級演員。
雖然我好為阿靜爆紅而開心，但當我望住阿靜雙手已經被鎅刀鎅到數百條傷痕，我就覺得好唔舒服，亦開心唔落。
有次，佢喺屋企開始做運動，我見到佢忽然之間咁健康，於是好奇咁問：「你轉姓呀？無啦啦咁健康學人做運動呀？減肥呀？」
「唔係……今次……收到劇本係做一個運動員……所以我都要……做運動去了解個角色。」阿靜邊做運動邊喘住氣回應。
見到佢咁健康做運動，我個心都定啲，最起碼唔會亂鎅自己對手……
「呀！」深夜凌晨聽到阿靜喺客廳慘叫，將我從睡夢中驚醒。我即時起身出去睇下佢咩事，驚見阿靜跪喺地下喊得好勁，我留意到佢對腳屈曲咗，似係跌親跌到斷骨。
我嚇到慢慢扶起佢，但佢實在太痛，我輕輕郁少少佢已經痛到死去活來。
「唔得，我報警先。」我急緊拎起手機準備報警時，阿靜阻止我。
「唔好報警……我無事。」阿靜大力咁捉緊我手。
我一臉無奈咁望住佢問：「無事？你跌斷腳呀！我要送你入醫院先。」
「唔好呀！我專登架！」
「專登？你專登跌斷隻腳？」
「係呀……因為我個角色係演一個岩岩整傷腳嘅運動員，如果我唔試下整斷隻腳，我點可以扮演得好？我點可以做好呢個角色？所以我隻腳一定要斷。」阿靜一路痛苦地說，但一路為感受到個角色斷腳感覺而興奮。
我搖搖頭覺得不能接受，上次係鎅手，今次就跌斷隻腳，呢種所謂嘅演技方法根本就係自殘！阿靜再咁落去遲早出事。
但無論我點講都好，佢都聽唔入耳，就算隻腳腫到一舊舊，佢都一直忍痛堅持唔睇醫生，直到佢拍完套電影。
如事者，佢一直都扮演唔同角色，每套電影都爆紅，令到阿靜成為紅極一時嘅女演員。但我眼見佢之前扮演吸毒人士，佢真係去吸毒，最後我花咗好多心機同時間精神去幫佢戒毒。
眼見佢身體一日比一日差同消廋，我個心就更加心痛不安。
「打我。」有日，阿靜拎起支木棍沉重地叫我打佢。
「做咩要我打你？」
「我岩岩收到份劇本，係做一個被家暴嘅女人，你要日日打我，狠狠咁打我，咁我先可以感受到個角色諗緊咩。」阿靜笑笑口咁講，然後遞上一支木棍比我。
「你真係痴咗線……你叫我打你？Sorry，我真係做唔到。」
「做咩姐？點解做唔到呀？打我之嘛。」
「我點解要打你呀？！而家係咪得呢個方法先叫演技呀！」
「我叫你打我呀！你係咪唔想我紅呀？你係咪妒忌我搵錢多你好多呀？」
「我無咁諗過！我只係擔心你身體一日比一日差，我擔心你再拍落去遲早連條命都無埋呀！」
「我知喇，你個廢柴，你一直都唔想我紅，係呀！我搵錢多你好多，有好多靚仔追我，但我都唔會理人點講，但原來你個廢柴！喺到自卑！妒忌！想我死！」阿靜激動地說，開始罵我同入身攻擊我。
我緊握拳頭，心中一股怒氣一直湧現，然後說：「道歉，你即刻同我道歉。如果唔係我唔會就咁算。」
「道咩歉呀？我唔洗你打我喇，我而家行出去搵個聽教聽話，靚靚仔仔嘅人打我都得丫，唔洗你呢個廢柴呀！」說罷，阿靜轉身入房去執嘢走。
我見到佢背影就忍唔住火起，於是我拎起支木棍，不斷喘氣地說：「道歉呀！你唔好逼我打你呀？」
阿靜轉身慢慢行到我面前，一臉不悅：「打我呀！我叫你打我呀！廢柴！」
就係依句，我不斷用木棍毆落佢身上，愈打我就愈狠，狠到我真係打緊一個唔聽話嘅女人，打到支木棍斷開，我都繼續打，打到佢不似人形，打到佢收聲唔可以再話我係廢柴！
…………
最後，佢演活咗呢個角色，電影大賣。
而我，精神崩潰了。
我唔可以再咁落去，於是我決定反擊。
《上集完》
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
夠2000like，即快手出埋下集。
記得like and share 留言呀～～
我孔明極力推薦大家真係買本《失蹤》完整版，得返極少量。
亦係最後一次再印，記得好好珍藏呀
本書有齊《失蹤》第一季第二季／《失蹤》二／《失蹤》外傳喺入面～大把內容喺哂入面。
未入手讀者就快啲買喇 =] 係我覺得最好睇最好睇嘅書～
我嘅網店：https://homingming.boutir.com/
我嘅訂閱故事：https://www.patreon.com/Homing
網店入貨來源 在 批發商 - Dcard 的八卦
詢問衣服批發商. 請問有在經營服裝網拍或是常逛購物的卡友們～知道這張廠商圖是哪間批發商嗎？蠻喜歡這廠商的衣服近來想做網拍衣服，及開架式美妝，請各位推薦. ... <看更多>