今日想同大家分享一個關於恐怖小丑嘅故事。
點入去可以欣賞全文，鍾意就俾個 like 同 share 呀～會睇大家嘅反應決定寫幾長。幅小丑圖係由 Pei Chung 皮忠 所畫，好掂呀！！
／／唔知各位有冇聽過「小丑目擊潮」（Clown Sighting）？自從八月美國開始出現恐怖小丑發現個案後，呢件事慢慢形成一鼓蔓延全世界嘅風潮。訪間嘅分析主要認為係有班人想借小丑形像去進行惡作劇同犯罪……但其實嘅真相係遠超於大部分人嘅想像。／／
有心無默
【#專欄大合奏】小丑魔潮（一）列車裡面的恐怖小丑
#絕默心跡
精文： 有心無默
精圖： Pei Chung 皮忠
唔知各位有冇聽過「小丑目擊潮」（Clown Sighting）？自從八月美國開始出現恐怖小丑發現個案後，呢件事慢慢形成一鼓蔓延全世界嘅風潮。訪間嘅分析主要認為係有班人想借小丑形像去進行惡作劇同犯罪……但其實嘅真相係遠超於大部分人嘅想像。
你哋可能話我喺度生安白造，認為萬聖節之後所有嘢都會恢復正常，甚至會「唓」一聲之後講：「香港都未出現過恐怖小丑，小丑女嘅cosplay就大把！」點都好，我今日分享呢段經歷，就係想更多人瞭解到呢件事背後嘅可怕真相，盡可能遠離危險。更何況……
……邊個話香港未出現過恐怖小丑？你會咁諗純粹係因為你太天真……
好記得我第一次遇見恐怖小丑，係十月十三日嘅晚上。因為加班收夜，我同公事同事A君要趕頭趕命先搭到地鐵嘅尾班車。
「嗄……好彩趕得切，唔係搭的士又要洗成百蚊……」A君喘住氣講。
「其實搭唔到都冇所謂喇，最多咪開返張單。」我邊抹汗邊回應。其實如果唔係A君強烈要求我已經上咗的士。
「咪搞，財政部嗰邊做嘢慢手慢腳，我呢排手頭又緊……唉，死腦細胞都算，仲要成日走嚟走去，個客今次再唔收貨我真係會直接同大老細投訴。」
「咁你諗定點同佢講都得喇。」我笑住講，「我見過咁多個客，呢個真係極品……」
我講到一半冇再講落去，因為注意到有乘客由車尾嗰邊快步行緊過嚟。照計尾班車大把位坐，根本就唔需要周圍行去搵位，仲要唔係一兩個人咁簡單，神情仲顯得相當緊張。
「咩事？」等到啲人走哂之後，A君一臉不解咁問。
「唔清楚……」
我企起身望向後排車廂，馬上就注意到有位赤裸上身嘅小丑企咗喺車尾。佢手上面握住四個氫氣球，目光亦都係注視住我哋呢邊。
「嘩。」A君表示吃驚，「萬聖節提早咗咩？」
「唔係，條友可能係模仿班外國人喺度扮小丑嚇人。」
「哦……新聞有提過呢單嘢。真係搞笑，點解啲職員冇阻止到佢入閘嘅？」
「可能太夜留意唔到，又或者條例本身都冇禁止，點都好……佢行緊過嚟。」
實際上，佢已經行咗差唔多兩個車卡。我可以開始睇清楚佢嘅樣貌，鮮綠色嘅頭髮、白臉配上黑色眼繪、紅鼻子加上裂開嘅嘴唇，形象上有少少似蝙蝠俠入面嘅小丑。雖然睇落冇武器喺身，但佢嘅身材相當健碩，萬一真係發生肢體衝突，一對一佢應該係會佔盡優勢。
「喂，阿Ray，點做好？」A君問，「洗唔洗報警？定好似其他人咁過去前面車卡先？」
「過去先，有咩事都可以互相照應。」我回答，「或者我哋喺下一個站落車。」
「唉，咁即係要飛的返去……」A君嘆氣一聲。
我邊退邊望實隻小丑，雖然氫氣球因為車廂強風起勢咁飄嚟飄去，但我勉強可以睇到上面分別寫住「D」「E」「A」「D」四個英文字。
──發生咩事？──
列車廣播突然響起，車長應該係同緊前排嘅乘客通話緊。
──先生你冷靜啲講，我聽唔清楚──
「阿Ray。」當我專心聽緊廣播嘅時候，A君突然拍向我右肩嚇咗我一跳，「你睇唔睇到地上面個攤……」
「我見到……」
呢刻，小丑身上面開始不停流出血紅色液體。因為佢一直行緊，令到地板出現咗一條血路……
──列車好快就會埋站，我已經聯絡咗駐站職員同保安，佢哋會即刻上車處理──
正如車長所講，列車開始有煞車跡象，即將就會到達尖沙咀站。
「嘩啊！」
但就喺下一瞬間，恐怖小丑突然咆哮一聲，隨即拔腿向我哋呢邊跑過嚟。
「喂，阿Ray走呀！」A君嘅聲音從身後傳嚟。
原來佢早就拋低咗我跑緊去車頭。見到咁嘅情況我都冇猶豫追上去。透過車廂玻璃窗，我已經可以見到尖沙咀站嘅月台，注意到有幾位黃衫嘅職員經已準備好上車……
「哈，哈哈哈！」但小丑完全冇停低嘅打算，一邊狂笑一邊追緊過嚟。
列車完全煞停嘅一刻，幾乎所有人都已經走到去車頭，而恐怖小丑即企咗喺第二卡車廂。但可能係見我哋多人，所以就冇再走過嚟。
「你玩夠啦喎！」有個中年大叔大嗌，佢喺袋裡拎出一把縮骨遮傍身。
「咔咔咔咔咔咔咔……」恐怖小丑繼續發出令人心寒嘅笑聲，有兩位女學生驚到縮埋喺車廂角落。
唔知係錯覺抑或係化妝特技，我注意佢頸到係有血流出嚟……
車門一打開，即刻有三位黃衫職員喺第三卡車廂走入嚟。同一時間，有乘客把握機會邊嗌邊走出月台……
小丑嘅笑聲喺呢刻終於停咗。就喺黃衫職員幾乎捉到佢嘅一刻，小丑一個急轉身跑出月台，唔知係想追逐嗰班乘客，抑或係打算逃走。
──列車服務受阻，敬請原諒──
「Ray，我哋而家點做好？」
等到場面差唔多受控之後，A君終於忍唔住問。呢刻車廂裡面計埋我同佢只係得返五個人。
「既然隻小丑都走咗……」我隨便搵個位坐低，雖然表面裝作好鎮定，但其實內心依然猶有餘悸，「咁當然係繼續坐返去。」
「嗯……」A君跟住坐埋嚟，我哋兩個不約而同望返去血路嗰邊，呢刻已經有警察到場，搵職員同乘客錄口供同埋檢查地上面個攤血。
「唔係血……亦都唔係蕃茄汁，」其中一個警察彎低身分析，「……到底呢攤水係咩嚟？」
突然發生，又突然咁結束。留下一大堆疑問，呢晚就係咁結束咗。
*
第二日朝早，我喺返工途中同女朋友思瑜傾電話傾返起呢件事。
「你話搭地鐵嗰陣……遇到恐怖小丑？」
「嗯，條友拎住氣球、又帶咗啲不明嘅紅色液體流到周圍都係，好彩冇帶武器咋……都唔知啲職員係點俾佢入閘。」
思瑜聽完之後並冇回應。
「思瑜？」
「吓？係……」思瑜回過神嚟，「阿Ray，你今晚又係要加班？」
「睇怕都係㗎喇，今次呢個客真係好麻煩。老細又見錢開眼，咩都要我哋就哂佢……」
「喂，阿Ray。」突然有人從後拍向我背脊，原來係A君。
「喂，早晨。」我點咗下頭，「思瑜，我到公司樓下喇，一陣放飯再打俾妳。」
「嗯，拜拜……」
其實我係注意到思瑜嘅語氣同平日唔同，但我並冇深究落去。若果當時我願意追問一下，或者就可以避過之後嘅一劫。
「尋晚真係幾驚險可。」一入𨋢我即刻同A君講。「講起又奇怪，新聞竟然完全冇報導到。」
「驚險？」A君皺起眉望住我。「你講咩呀？」
「尋晚喎……你唔係咁快唔記得咗嘛？」我有少少錯愕。
「你係指老闆差少少就撞車嗰單？唔係上星期嘅事咩……」
「唔係呀，我講緊尋晚放工搭地鐵見到嗰隻恐怖小丑呀！」我開始加重語氣。「你係咪玩嘢呀？」
「小丑……？」A君眉頭皺得越嚟越深，「阿Ray，冇錯我哋係一齊搭地鐵，但根本就冇見過咩小丑……」
「吓？」
恐怖小丑嘅故事，就由呢度開始。
（待續）
好睇想繼續睇落去，請支持作家插畫家：按Share，就係咁簡單。
#精圖文 #專欄 #有心無默 #皮忠
絕默心跡 在 【Zion MV】《神恩惠驚喜心跡處處》｜ZNS 1743 - YouTube 的八卦
【Zion MV】《神恩惠驚喜 心跡 處處》｜ZNS 1743｜基督教MV｜敬拜讚美｜錫安新歌｜432Hz人生，如像坐上過山車般，時起時伏，患得患失，風波， ... ... <看更多>