「乜嘢係母語？」其實我真係諗極都諗唔明 - 乜呢樣嘢有討論空間㗎咩？
喺香港，絕大部份人用廣東話做第一語言，呢個係人都知；香港人同香港人溝通，用嘅主要係廣東話，呢個直頭唔講都知 - 算嘞唔好搞到咁複雜嘞：廿年前政府話搞「母語教學」吖嘛，咁母語教學嘅學校上堂主要用咩語言呀？已經講完啦係咪？
引用一個普通話中心學者對廣東話(粵語)嘅評論，其實有啲似搵網球專家講羽毛球 - 係，兩樣都係波，兩樣都係用塊拍打嘅，不過，就唔係同一樣嘢囉；同埋最大問題係：咁有咩參考價值？
點解要引用呢段評論呢？冇憑冇據就咁估好似唔多公平，不過矮化廣東話嘅跡象，近幾年又似乎唔難見到；嗰段將廣東話形容成「壞人」嘅片段，早排網上都傳過下。有關廣東話同普通話，其實已經寫過唔少，唔係要比較孰優孰劣，不過事實係，普通話四聲，廣東話九聲，講發揮空間同想像力，後者比前者多咗唔止一倍；形容顏色，紅噹噹、黑媽媽，係廣東話嘅獨有玩味；講踢波，收山腳、打毽腳、通坑渠，齋聽已經成個畫面出咗嚟。
好似講遠咗，想講嘅並唔係廣東話有幾好；其實點解咁多人有咁大反應？因為喺認知入面，大部分香港人嘅母語就只有廣東話；由幾時開始，一件正常過正常嘅事都搞到要捍衛？母語係乜要問人㗎咩？如果唔係引咗篇文章出嚟夾硬係要「證明」廣東話唔可以叫做香港人嘅母語，呢件事 - 正如一開頭所講，根本連討論嘅空間都冇；你唔會每日去睇下個海究竟係咪由水組成㗎係咪？
最後講隻舊式爛Gag吖：
「你講咩話？」
「聽唔到呀？廣東話呀！」
香港人嘅母語，就係廣東話，就只有廣東話。
#廣東話係我母語
#我撐廣東話
粵語爛gag 在 暗藏廣東話文化和逐漸消失的講法！｜粵語中字 - YouTube 的八卦
這幾天我回顧了一下，一些經典的廣東話 爛gag （冷笑話）。顧名思義，經典的 爛gag 就是有時代感，就是有一定的日子沉澱。那麼在我回顧這些 爛gag 時， ... ... <看更多>