港女+洋腸一直都係香港一個極為被貶義嘅花生議題，好多人都偏向用好火滾嘅角度去討論佢哋。而小妹曾經亦有小小經歷，希望同大家分享一下。
同好多港女一樣我都係本地土生土長，一直同華人共處。直到大學畢業之後去咗美國LA同NYC dance training一段日子，然後同一個鬼仔date過之後(Asian喺外國係超受歡迎)，文化嘅差異令我覺得非常新鮮。加上如果你真係認識我本人，白淨斯文小鳥依人從來同我都係兩條直直嘅平行線互不相交，我呢種性格豪邁大女人，而且膚色”充滿東南亞熱帶風情”，去到東南亞個個都以為我係本地人，並唔係一般港男心目中嘅女神，所以由港男覺得並不起眼嘅女人，突然榮升洋人超級babe，滿足感突然滿滿決定”湊鬼”。所以返到香港之後，我眼裏只會見到外國人嘅面孔，而土炮嘅面全部都係唔知點解blur咗。
我承認，拖著個鬼佬男朋友的確比一般情侶被朋友同途人投射更多目光，連自己都以為變咗西洋菜。而to be fair，我認識嘅鬼仔真係gentlemen得多，而且佢哋好多時不拘小節，生活節奏比較chill，係的確曾經令我以為”返唔到轉頭”。
回憶總是美好的。兜兜轉轉，我都曾經有過兩段各同居咗年半，見過父母嘅official人鬼戀，可惜最後都係有緣無份和平分開，而以下係我理性嘅小小愚見。
好多人覺得洋腸成日呃蝦條，我反認為佢哋嘅相處文化係屬另一種遊戲規則。退貨係外國人一個日常嘅習慣。喺外國生活你咩都可以退，甚至你開封過粉底嘅色覺得唔啱都可以退。所以add to cart嘅時候唔需要太認真，試用嘅時候就反而要大大力試，啱就珍惜留起唔啱嘅就一次退晒佢。講真，你平時買鞋都會喺鋪頭着住佢試行好L多次，確保佢應該唔刮腳先買啦。你唔會喺window見到對鞋，試都未試過就俾錢。所謂洋有洋規，有啲女急住拋個身出黎，然後一直無名份就話俾人玩話人哋係衰人，其實係洋規唔適合某啲港女深層次需要，而某啲囡囡亦玩唔起。
好啦，當我正式上任有名有份之後，卻開始發現溝通係令大家卻步嘅原因。 就算我英中畢業，高考Oral攞A都好（暴露年紀系列)，始終英文唔係mother tongue就係難咗溝通。我真係無可能每一句都要諗過度過先講，完全唔自然。你講一句”it’s ok”同一句”帽事嘅”個幽默位係爭幾遠啊你明唔明!? 過去有時凌晨做完嘢返到屋企，就算工作上有啲委屈，一諗起要用腦翻譯返做英文，就不如依家瞓覺聽日起身同朋友傾訴算啦。當你發現佢唔知咩係周星馳ETV童年回憶，我亦聽唔明佢同朋友談話之間嘅slang同外國人物名，以前每次我都係坐喺度扮識聽喺度笑好無癮。而且香港本土仔女就係天生工作狂節奏急，我之前認識嘅鬼都係崇尚chill嘅生活節奏慢到不得了，而且亦未必會想儲錢買樓做投資比較難看到將來(因為佢哋都未必真係會定居香港)，而且對屋企人嘅看法亦有輕重差異。
所以到最後，我都係順其自然，無再強求想要人定鬼。
當然又係time to wear a helmet，我有好幾個local好朋友都係嫁鬼，佢哋感情好smooth有幾個小朋友移民走埋，當然係好事我亦真心祝福佢哋，而且好多嘢都係講緣份，有啲人夾到有啲人就夾極都夾唔到。但係對於嗰啲盲目追求洋腸嘅女仔，我明白你哋諗緊乜，所以真係好想同你哋講：
我覺得鍾意鬼佬唔係罪，但係如果你係純粹虛榮，連蕃茄同薯仔嘅英文都分唔清，為食洋腸而食，唔好好去了解洋人文化最後俾人玩就真係你on膠。世上有啲嘢叫自知之明，如果你未能夠調節到適當嘅心理同未有足夠嘅語言能力，我勸你都係無謂勉強放手啦。如果你話唔係呀鹽姐，嫁鬼一直係我畢生夢想呀，咁就麻煩你首先學好啲英文(我指嘅唔係日常英語運用，而係整個溝通文化)，然後去外國生活一下明白多少少人哋外國嘅culture同想法。唔係話着得好小布，啲頭髮九一分界，間唔中講一兩句well就係真西洋菜。
一個人如果唔願意改變唔願意增值，再多嘅苦衷都係藉口。共勉之。
#要找對的人首先要令自己成為對的人 #已經講咗一萬次 #真係唔係個個可以食㗎 #衷心祝福真嘅人鬼戀 #女人像鹽
真係唔係個個可以食㗎 在 [Bacardi 特約] MC $oHo & KidNey -係咁先啦ft. Kayan9896 的八卦
你話轉頭先啊？ 吓 佢地頭先 唔係 係咁留住我既咩？ 點解 而家 個個 醉哂 冇人理我嘅？ 來讓我跟你走回程順路 8折可享有如唔順路就請放手無謂尷尬啦好友 ... ... <看更多>