《瓊瑤都頂唔住 之 你沒有好結果》
(話說好多朋友都知，我係瓊瑤嘅fan 屎，瓊瑤的確係姣婆恩物。可能好多人都覺得瓊瑤寫嘅嘢非常嘔心，睇完炎夏都唔使涼冷氣，但如果你鐘意睇韓劇，我覺得你係無資格話瓊瑤嘔心，韓國所有oppa 都嘔心。今日真係無意比較咩作品係世上最嘔心...)
今日係想講一個聞風喪膽，駭人聽聞嘅江湖傳聞，就係女作者，千祈唔可以寫有關愛情嘅任何內容，因為所有寫愛情內容嘅女作者，自己嘅愛情都會荊棘滿途，無好下場。呢個「你沒有好結果」嘅江湖傳聞非常應棍。 好多專講愛情或者專寫言情小說嘅女作者都無好下場，著名代表有張愛玲。
咁多年來，我都以為瓊瑤係一個例外，可以逃過「你沒有好結果」嘅魔咒...
瓊瑤係成功搶走人哋老公，而且時刻表現恩愛，係搶人老公再live happily ever after嘅成功個案。我唔只一次睇到瓊瑤講述佢老公幾咁痛錫佢，一次林心如嘅訪問當中，林心如提及登門造訪瓊瑤嘅屋企，見到佢屋企非常夢幻，有間玻璃屋。間玻璃屋係瓊瑤老公特登起嚟 氹瓊瑤開心， 希望瓊瑤喺間玻璃屋入面寫作。送禮物都送得咁嘔心，我真係以為呢pair 人係可以繼續「嘔」落去。
近日睇到瓊瑤喺網上不停提及佢老公平鑫濤患病後，自己勞心勞力，悉心照料佢。同時瓊瑤前頭婆嘅三個仔女，反擊瓊瑤竟然唔畀平鑫濤接受治療，落手落腳照顧平鑫濤嘅其實只係工人同看顧，大家都質疑瓊瑤到底有幾鍾意佢老公。瓊瑤一夜之間成為千夫所指，好多人話瓊瑤嘅言行貫徹佢嘅嘔心小說，係一個senior綠茶婊。
瓊瑤嘔唔嘔心，我無咩興趣探討，我只係諗起「你沒有好結果」嘅江湖傳聞又再次應驗...
瓊瑤守左呢段愛情去到79歲，最終都係得唔到大眾祝福。需知道幸福對女人嚟講，係要全世界認同，去到79歲都得唔到外界嘅祝福同recognition，真係同打爛齋缽無分別，確係浪費多年嘅苦心branding。
******
有時諗，所謂嘅「你沒有好結果」魔咒，其實好有科學根據...
根本呢個世界上，愛情題材只有3個來源。自身嘅經歷，出賣朋友嘅愛情經歷，同埋作者自己嘅幻想....
如果選擇消費自身嘅愛情經歷，就等於將自己同愛侶嘅所有擺上台面，當真人show 咁俾人審視，批評同剖析。一個作者，無論幾理性，對自己嘅愛情進行公開剖析，其實都只係拉攏自己嘅讀者support 自己，數說伴侶嘅不是，喺讀者群中搵人強化自己立場，情況就好似一班八婆gathering，其中一個女人講自己男友壞話，所有呢啲 講壞話gathering 都唔會有任何得益。自己嘅愛情俾一班三唔識七嘅人，好似城市論壇咁做discussion，愛情點會唔遍體鱗傷。
消費盡自身嘅愛情經歷，再選擇出賣朋友嘅愛情經歷，到時就唔只愛情遍體鱗傷，友情都一鋪清袋。
如果作者嘅愛情題材係嚟自幻想，咁就大鑊啦，好明顯瓊瑤係活喺佢自己嘅愛情幻想當中，所有瓊瑤小說筆下嘅男人，都係為咗愛你，可以沒有生命事業財產，瓊瑤根本係創造呢個世界唔可能存在嘅男人，再好似花痴咁，自己J返自己創造出來嘅完美男人，長期活喺FF 中。
所以我好佩服個啲持續消費自己，消費自己朋友愛情經歷，甚或不停幻想愛情嘅作者，佢地真係好有冒險精神，罔顧自身感情，有捨己救人，斷送自己愛情嘅勇氣，去創作愛情故事畀大家睇架。
