《濁水漂流》中的「寧化飛灰」
（含劇透，慎讀）
—
喺香港回歸之前 ，
末代港督彭定康喺最後一份施政報告上，
烙印咗呢句由作家JACK LONDON
所寫嘅信條：
「寧化飛灰，不作浮塵。」
“I rather be ashes rather than dust”
呢句說話同《濁水漂流》遙遠相呼。
電影題為「濁水」，
但作品迸發嘅，
卻係燃燒殆盡嘅無限怒火。
—
「政府做撚錯嘢就要道歉啊！」
主角何奇輝如是說。
—
點解一句道歉咁重要？喺男主角，由吳鎮宇飾演嘅輝哥放監重返街頭嘅當晚，2012年2月15號，食環署同警察就喺無事前通知嘅情況下，喺通州街天橋底「清場」，將露宿者嘅家當全部丟棄。喺一般人，甚至政府眼中，警察扔掉嘅只係影響市容嘅垃圾，但對於長期露宿街頭嘅街友嚟講，佢哋被摧毀嘅，係自己嘅家。
—
「深水埗係啲窮人住嘅地方嚟架。」
—
有頭髮，又有邊個想做癩痢；有屋企返，又有邊個想做露宿者。《濁水漂流》嘗試以住屋見眾生，而呢一樣嘢，恰恰就係香港人其中一個核心價值。生活喺香港，點樣先為之成功？住洋樓，養番狗當然係毫無疑問嘅「人生勝利組」；初出茅廬嘅年青人，工作幾年死慳爛抵然後上車，可謂「事業有成」；甚至比你因為唔同原因而排到公屋，或者有公屋戶籍，「麻雀雖小，五臟俱全」，亦可以惹嚟其他人艷羨嘅目光。住屋、上車，仿佛就係一般香港人人生嘅一大目標，而《濁水》裡面嘅街友，就係社會底層入面嘅最底層，連劏房都住唔起，要瞓街。
—
作品圍繞電影入面一眾露宿者角色向政府因為無理清場索償嘅一場訴訟，最後政府開出條件，向每位露宿友賠償2000蚊。2000蚊，對一般人嚟講可能無乜大不了，但對露宿者而言就係天降甘霖，本來無一物，2000蚊可能係超過幾個月嘅伙食，可能係毒癮發作時候嘅救命草，亦可能係緊急紓困嘅最後憑依。一眾露宿者對呢2000蚊持正面嘅態度，但唯獨係輝哥，寧願唔要錢，堅持要政府嘅一句道歉，而呢一個道歉，亦成為咗電影最大嘅戲劇張力。
—
《濁水漂流》，並無刻意美化街頭上嘅露宿者，反而以一個較寫實嘅角度切入，佢哋雖然唔算大奸大惡，但亦可以稱得上係「爛泥扶唔上壁」。喺露宿者嘅互動入面，我哋可以隱隱然理解各個主要角色嘅背景，例如另一主角「老爺」，係由謝君豪飾演嘅越南難民，因為居留問題而淪落；李麗珍演嘅陳妹，曾經係風塵女子，朱栢康演嘅大勝，就係典型嘅「老同」，每個角色都著自己嘅過去，然後聚首，共同漂流於香港無依無靠的濁水之中，互相扶持，互相折磨。
—
觀影期間，思緒萬千。政府肯向露宿者賠償，但唔願意認衰。根據參考資料，《濁水》開拍時間時值2019年11月，當時香港仍然處於劇烈嘅社會動蕩當中，做錯事肯暫緩轉軚，但唔肯撤回同認錯，好難令人無任何嘅聯想。一句道歉，喺呢個聯想嘅基礎上就變得極為複雜，簡單一句認錯，可能就需要牽涉極大嘅社會成本同犧牲，於此，雖然導演未必有好仔細交代輝哥擇善固執嘅原因，但我哋亦會有一定程度上嘅理解，啱就係啱，錯就係錯，點解要解釋?
—
電影嘅結局，可能會引嚟兩極嘅評價，而我個人就認為係畫龍點睛。對輝哥嚟講，堅持唔走，引火自焚可能係一個解脫，作為咁多年嚟無目人生嘅一個出口，亦可以視為攬炒，你可以趕走我嘅肉身，但你唔可以毀滅我嘅靈魂，以熊熊烈火作為對政權最後嘅控訴。但我嘅觀點好簡單，電影以結局言志，你唔道歉，我亦唔會妥協，寧化飛灰，不作浮塵。
—
畫作：
塵阿力映畫
（同ALEX已經好耐無合作，但只要有好電影，我們都在。）
—
濁水漂流 Drifting
濁水漂流結局解釋 在 濁水漂流Drifting - 劇透影評丨兩極化評論？丨多角色敘事太散？ 的八卦
《 濁水漂流 》影評我來了！睇完優先場後覺得若有所失再入場睇多次之後感受多咗電影嘅節奏同味道坊間對呢部電影嘅評論都兩極化今次呢條片就同大家講吓我 ... ... <看更多>