【長文慎入】上年11月，決定挑戰自己，參加6月2號呢個健美比賽，目的係想專心致志有明確目標做好一件事，無論點都要係限期完成目標。
今次比賽，得著好多好多好多，無論身心都好似經過洗禮咁，首先7個月時間準備以為好多(比我3年前生酮減肥多出4個月左右)，但其實對於新手黎講(特別係我懶同埋忍耐力比普通人Weak 3倍以上)，要經歷由準備到上台比賽「增肌。減脂。脫水」三個階段，7個月時間係完全唔足夠，我1月增肌到略有進步，2月就已經要開始減脂同時肌肉量增長都大大下降，最後修身期到脫水後除左生理同心理極度痛苦，感覺連肌肉都流走了……我有幾次想放棄比賽嘅念頭，但每一次都同自己講:「就算輸，都要完成佢，我唔係為左贏人，我係為左戰勝自己！」 因為我知道完成唔到比賽，我之後做咩事都好，都一樣會逃避，就好似我呢幾年困住左自己面對唔到Youtube嘅環境改變、自己拍片無大進步、面對唔到Haters、同行之間比較等等問題，我一直想突破呢堆框框，一直都突破唔到，輪迴左差唔多兩年時間，庸人自擾……但今日上完台我知我終於突破左。
肯定狀態唔夠好，The show must go on，照去！比賽前一晚過磅，覺得23個對手起馬會有一兩個跟我差不多「等級」，點知今日預賽上台前見到其他選手個個狀態都好似上曬SSR級神裝咁，每個都極度專業！唯獨我係鶴立雞群，異常突出……地弱，自信心即時負左已經唔緊要，因第一次參加好多野自己準備不足，上台前抽筋到上台做指定動作時都抽筋，果一刻好想晚上嘅正式比賽No Show，落台即刻食餐M記算數，但一諗到我唔頂埋佢，辛苦食兩個月烚雞胸為乜？一日飲10L水飲足5日屙尿屙通宵脫水發冷頭暈為乜？潛水咁耐無曬Follower，為求生計接拍廣告勉強維持財政狀況但條數好差難以交代，又為左乜？No Show我就輸左比自己！輸一世！乜經驗都攞唔到！
最後我都咬牙切齒忍痛上台，不幸嘅係，我又抽筋，萬幸嘅係，今次連擺Pose機會都無就好快落番台完成比賽(因為時間關係只挑選最強10位選手作賽)🤣🤣真係唔知好嬲定好笑…… 7個月，都比唔上比賽呢一日得著嘅多，預賽時我灰左，我覺得自己唔合格，雖然身邊好多朋友不停安慰「當初諗住你會放棄，脫水咁辛苦都行到呢一步好叻」「上台已經叻過話上台又無上台既人」，「你短時間瘦左咁多都已經好好」「你之前真係好L肥」等等，但我都係好唔開心，直到我決賽上台，只求贏自己心態(都無可能贏到任何一個對手……因為無人當我係對手……🤣🤣🤣)無壓力底下，台上Spotlight尤如一道靈光打通左我任督二脈，我終於明白，其實我點解要同人比？我係用7個月時間玩，目的係挑戰自己，一早就知越級挑戰，其他選手用左3，4，5年什至10年時間玩，但10年嘅又未必贏到個3年嘅，4年嘅又未必輸比個8年嘅，好多因素，咁點比呀？咁點解呢班人又要繼續操練呀？因為愛囉！因為堅持囉！
就好似Youtube咁，我紅過，有新人紅過我叻過我搵到好多錢，咁又點呀？咁我咪繼續做好自己囉，其實呢幾日有啲過磅相流出左，有啲專業嘅健身群組笑我，我都好唔開心架，但係……咁又點呀？唔通因為佢地笑，我就唔行埋最後一步呀？我就係明知輸比23位對手(計埋我總共24位選手)，都要上台展現自己最光輝嘅一剎那，笑完，咪各自修行囉。
我諗起我平時每拍一條片比人笑，係人地影片客串又比人罵(從來唔知做錯乜得罪人)，唔識我嘅一群無知嘅人個個鍵盤戰士得個首講字，其實，我努力你唔知，你有你講，我享受我做緊嘅野，熱愛我嘅行業，咪得囉！就算我失敗比你恥笑，但至小我都嘗試過，好多人連踏出果一步都未行到呀！咁多時間理啲令自己唔開心嘅言論，不如諗下聽晚食乜好過啦…… 就係咁，我覺得道行昇華左，真心鍾意一樣野，就算有咩人反對你，話你，恥笑你，侮辱你都好，只要你堅持過，試過，踏出過第一步，你已經成功，戰勝左昨日嘅自己，下一步，就要戰勝今日嘅自己。
📸多謝 司徒夾帶 等左3個鍾影既靚相！仲一直鼓勵支持我完成整個比賽！
🎞多謝 Billy2046老友全日幫手拍野！
今次我盡力了，看著這篇文到最後的你，有盡力完成自己目標嗎？
#條片爭住先 #忍唔住出相 #求唔好反彈 #贏過昨天的自己 #我上水啦 #手上只係大會紀念品 #不要誤會 #私圖 #佩服所有參賽者長年累月的堅持同努力
#Reborn #gym #fitness #physique #menphysique
條片爭住先 在 '爭住先'在粵語廣東話係咩意思(什麼意思) - 粵語在線發音字典 的相關結果
攬住laam2laam2laam2laam2laam2laam2laam2laam2zyu6zyu6zyu6zyu6zyu6zyu6zyu6zyu6. 笠住. 短語：. 爭住先. 拼音：. 暫無,待編輯. 編輯拼音 edit jyutping. 解釋：. 先欠著. ... <看更多>