有日一位公公帶住個孫嚟到診所。
公公登記後，叮囑孫仔：「一陣阿公入去睇醫生，你可唔可以好乖咁坐喺度等阿公出嚟呀？」
孫點頭：「我唔睇醫生，我坐喺度」
公公：「係呀，今日唔係你睇，你坐喺度等阿公喎。」
公公入醫生房前同我講：「姑娘，唔該你同我睇一睇住佢呀」
我：「好呀」
孫仔坐喺櫈上腳揈揈，揈呀揈～佢望吓我。
之後落地，行埋嚟。
我：「小朋友，做咩事啊？」
佢指住登記處嘅一個玻璃盤：「姨姨，呢個我可唔可以食呀？」
我：「梗係可以啦」
玻璃盤上係一堆糖果朱古力，來源係...每年大時大節前後都會有好多禮盒送俾醫生，我哋食唔晒就會擺出嚟俾人清晒貨。
我拎住個盤行出去俾小朋友：「你想食邊啲呀？自己揀啊」
佢「嘩」咗一聲。
我：「做咩呀？」
佢望住我：「姨姨點解你咁有錢嘅？」
我：「我？我冇錢呀」
佢：「呢度好貴㗎，你有好多錢呀！」
我笑笑：「呢啲係其他人送俾醫生食㗎，你想食都可以攞呀～」
佢：「我真係可以攞？」
我：「係呀」
佢拎咗粒金莎，再拎粒瑞士糖，之後再望住粒LINDT。
我：「唔緊要喎，想食就攞啦」
佢：「我可唔可以攞埋俾婆婆食呀？婆婆好鍾意食朱古力」
我：「你咁叻記得婆婆鍾意食咩～攞啦」
佢：「婆婆話佢以前好鍾意食朱古力，所以佢個口入面冇晒啲牙㗎。我都好鍾意食朱古力，但係公公婆婆話呢啲要好多好多錢嘅人先有得食，佢哋話而家我哋冇錢呀」
我：「你等等呀」
我行返入房打開儲物櫃拎咗兩個朱古力禮盒。
我：「呢兩盒俾你拎返屋企呀」
佢再『嘩』一聲，將雙手收喺背後，唔敢拎禮盒。
我：「做咩呀？」
佢：「你俾咁多錢我，我唔可以要㗎」
我：「呢啲朱古力嚟嘅，係人哋分享俾我哋，之後我再分享俾你～」
佢：「分享？」
我：「因為我哋食唔晒，所以就擺出嚟同其他人分享，其他人拎咗食咗會開心嘅，咁呢個分享係咪一件好事呀？」
佢諗諗：「我食朱古力好開心㗎」
我：「婆婆要唔要開心呀？」
佢：「要」
我：「咁呢兩盒就係我分享俾婆婆同你嘅～你哋新年要開開心心咁食朱古力啊，知唔知呀」
佢：「我可唔可以同同學分享㗎？我嗰班有個叫乜乜乜，仲有個乜乜乜都鍾意食。」
我：「可以呀～」
佢低頭望住禮盒，摸摸禮盒。
公公出嚟，孫仔拎住兩盒朱古力跑向公公：「公公，我有朱古力呀」
公公：「你喺邊度拎㗎？」
孫：「姨姨」
公公望住我，我：「送俾你哋食㗎，我哋自己都食唔晒，所以俾啲佢食呀」
公公：「唔好意思呀，真係多謝你，可唔可以幫我多謝醫生呀？」
我：「好呀冇問題呀」
公公同孫仔坐埋一邊，孫仔問公公：「公公？婆婆冇晒牙仲可唔可以食朱古力呀？」
公公笑笑：「都冇晒牙囉，仲怕咩食呀？」
孫仔掩掩口：「我仲有牙，我係咪唔食得呀？」
公公：「食少少啦，唔好食晒呀」
孫仔點頭。
朱古力意思 在 今集攪攪新意思老友朱古力百力支亂入介紹限量768隻JLC 1968 ... 的八卦
... <看更多>