話說法國人只有三件事是認真做的，第一件是美食、第二件是接吻，這兩件事我領教得多，如果你有異議，我建議你自己試一次，行家一出手，就知有沒有，呃... I mean 美食，ok?
第三件事，係示威。
適逢最近法國燃油稅同價格加完又加，累計加左差唔多兩成。你知啦，法國呀、英國呢啲第三世界國家，真係無辦法可以好似香港咁，乜都加價但啲人都頂得順架！所以全國各地都發起唔同大細啲Yellow Vest(黃背心）運動，全國各地透過慢駛同埋圍堵超市和道路，以宣洩不滿。
今日人妻先生就咁岩去法國買餸、而又咁橋Calais就搞黃背心運動（你話我真係幾黑仔），簡單啲黎講，即係全區的大超市都正式癱瘓... 今次呢一場Calais區示威，並無政黨背景支持和統籌（據佢地自稱啦下），係由一個只有兩萬幾人嘅Facebook page 發起，響應全國各地的黃背心運動，名副其實的「無大台、遍地開花」。
係呀，兩萬五人的page，likes數仲少過我，但係成功吹到雞癱瘓晒全城所有的大超市。這種深度和受支持度，香港的政工作者們，很想要吧？
咁我聽到呢個消息，梗係第一時間gel靚個頭，著返件飲衫，諗住肯定會有法國電視台型男主播瘋狂扑我... 咪，訪問我作為遊客點睇。我又終於可以講返佔中時班大陸遊客「好失望、行程受阻、下次考慮不會再來法國消費」，再加多句「要不是有我們來法國消費，你們早就完蛋了。」不過，好可惜，法國人的腰板比很多人要硬也要直（真心推薦），竟然在民意調查裡大部份民眾都支持呢場運動，正常的電視台也不會訪問一個遊客而不是先採訪自己人，所以我係無機會出鏡。
喂！大佬，封超市買唔到野食，口腔期的人類怎樣活下去？封路會搞到返工遲到，某產婦去唔到冇婦產科的醫院產卵，咁點算啊？
示威就是這樣、就是要令人不便啊！如果示完都係大家無感覺，那是示弱好不好？法國人明白示威是需要犧牲的，明明法國人平均壽命也沒香港人的長，不過似乎佢地比較願意接受「唔方便」。無計啦，香港人時間好寶貴，有好多重要嘅事做，示威要繞路又塞車，浪費半個鐘時間，大佬啊，慳埋慳埋啲時間要排梳乎厘pancake同埋黑糖珍珠奶茶架！我打唔到卡影唔到相你賠返啲like俾我啊？
另外，你睇下第二張圖，呢班法國酥皮（法國無粉皮嘛）點樣示威同封路？係呀，就係咁擺幾個車軚，成班友齋企就封左條路架啦！打卡位呢？無！大台呢？無！唱K節目呢？無！籌款箱呢？都無！咁示威示黎把鬼呀？仲要近乎得十度的天氣下狂食海風，傻架？
係呀，我講過法國人只會對三件事認真：美食、接吻和示威。法國人為左呢三樣野傻起上黎，絕對超乎你的想像。今日就有一個女人在示威時被車撞死，唔係講笑，真係死左。人地係用條命晒政府冷，我不敢講所有法國人都是視死如歸，但佢地行左出黎，係賭上一定程度的覺悟。正因如此，政府才不敢輕舉妄動，更不會隨便武力清場，你婊我更婊，你敢亂來，下次選總統就給你票債票償。
The Blood of the Martyrs Will Water the Meadows of France — 《Do you hear the people sing 》
我嘛... 作為一個資深港豬、又作為一個咩都唔識嘅師奶仔，人間的瘡疤，我看得通透卻又不能理會；作為一個「我討厭政治」的遊客，我沒辦法管人家的內政，所以只能不置可否地觀察著。當然，要買的生蠔和種種食材，到最後我還是買得到，只是多了點不方便，就算真的沒買到，我也不會生氣。倚著窗，在橫渡英倫海峽之際，讀姐姐的飲食書，累了就抬頭遠目萬里瀚海的光波粼粼，這個旅程已經值回票價。
#地圖炮
#我真心唔知香港啲政工作者去外國考察考左啲咩返黎
#好多人同你講香港咁係正常
#講笑咩
#一點都不正常
#革命不是請客食飯
#_你給果我今日真係搵唔到餐廳食午餐
#差點餓死在遍地洋腸的法國
#陰功豬
#仲要讀飲食書
#害我全日都好想食流心蛋黃同拉麵
#唔好以為去法國買餸呢件事好貴婦
#搭船一個半鐘頭都唔駛
#同你去長洲咁上下之嘛
#快過你去廣州
