有日一對情侶嚟到診所，女嘅面都青晒頭髮又濕，佢一入到嚟診所就即刻趴咗喺櫈上嗌『好痛呀』。
男朋友行埋嚟登記處同我講：「又係我呀」
我：「咁快又一個月嗱？咁唔掂喎，佢咁痛法好唔正常喎，淨係食止痛藥好似幫唔到佢啲咩咁，之前咪轉介咗佢去婦科嘅，佢有冇去睇㗎？」
男朋友：「睇咗啦，超聲波話係子宮唔知咩嘢異位…朱古力瘤呀」
我：「子宮內膜異位啊…然後呢？婦科應該有俾藥佢？定係已經約咗期做手術呀？」
男朋友細細聲講：「佢冇再食婦科開俾佢嘅藥呀，就咁擺埋一二邊咋！我有帶黎」
點解要咁樣做呢？啲藥就算升上神枱日日參拜廿次都唔會起藥效喎。
我：「點解呀？婦科開嗰啲藥先真係幫到佢㗎，我哋嗰啲止痛藥佢自己都識講冇用㗎」
男朋友：「佢話唔想食荷爾蒙藥，話上網啲人話會傷身呀影響第時生B呀blablabla喎，但係我諗醫生開得俾佢嘅應該唔會係害佢呀？」
我：「吓？好多婦科病都係靠荷爾蒙藥去醫，有咩嘢唔明嘅應該直接問醫生呀嘛，網上啲人講嘅佢信到足？反而唔信醫生？唔食可能仲傷身呀，痛到差唔多個個月要你抬先落到嚟睇醫生，見到佢過樣都覺得痛，婦科都話埋你聽係咩病都唔食藥，由得啲內膜異位組織增加周圍走，到時個瘤塞埋輸卵管就真係影響生B啦！」
其實無論係咩嘢藥都要寫明有可能引起咩副作用，婦科醫生開嗰啲藥幫你控制緊唔正常既內膜組織，身體都要時間適應下，正常過咗頭幾個月就OK。唔通痛痛吓就會自己好咩，咁呢個世界唔駛要醫生啦…
男朋友：「佢自己嗰日睇默默奉獻的灰姑娘都喺度喊呀，嗰集咁啱就係講中佢嘅問題，佢一路睇一路喊住話『係呀係呀冇人明我有幾痛』」
我：「我都有睇，但係人哋最後有食藥喎…劇入面藥劑師開嗰隻都係Dienogest，人哋都起碼肯接受治療呀，你女朋友而家咁樣同放棄治療冇分別呀！淨係諗食藥可能有咩唔好，諗下如果唔食藥可能好快要開刀做手術， 醫生建議得都係想你好」
女朋友繼續趴喺度嗌『好痛呀…』，男朋友望望佢，翻個白眼同我講：「我講過好多次都冇用…」
真係講到口水都乾，藥係要用嚟食，唔係用嚟睇。針對子宮內膜異位，婦科醫生一般都會處方專治藥，口服黃體素主要作用係抗炎、抗子宮內膜內膜增生等，有效縮細子宮內膜病變或體積同減輕痛楚。通常病情較輕或者暫時唔想做手術都會先試食藥控制住。甚至有人做完手術都係繼續食藥，因為會大大減低復發機會。
唔好成日諗住忍忍吓就冇事就一世，喺你忍緊嘅同時個瘤可能已經慢慢變大，到時就只能夠開刀做手術，若果內膜組織癡埋其他器官，就更難搞。唔係嚇你㗎，真係有CASE症狀惡化到肛門都痛！亦有人因為唔食婦科醫生藥，自行尋求偏方治療，就喺三個月內囊腫足足大咗8CM，最後更加要立即做手術。千其唔好錯過治療嘅黃金時期呀！受苦嘅真係自己呀～
子宮內膜增生手術時間 在 開刀時間縮短3倍!婦科手術進化"冷刀手術"更精準降低風險 非凡 ... 的八卦
... <看更多>