［第三次世界大戰！］Tora！Tora！Tora！LET THE WAR BEGIN！！！！
1. 天花亂墜系列，唔好太認真，雖然一定有人發癲又要鬧人又要unlike．
2. 美國YouGov做嘅花生醬喜好調查。一成人唔食花生醬（咁少？），4%唔肯定。但超過一半人鍾意Creamy（幼滑），得三成日鍾意Crunchy（粗粒）
3. 美國佬冇文化冇品味，又一例證。但冇所謂，侵侵都當選啦。BTW，睇埋碧丹（https://bit.ly/2JUb3YQ）。
4. 咩人傾向鍾意幼滑？女人啦！共和黨啦！老嘢啦！同埋，低收入嘅人！是真的！！！
5. 同魚肉燒賣唔同（！），食幼滑唔使落地獄，但有得揀梗係粗粒！粗粒先係真道，道路同生命。
6. 原因好簡單，口感，質感，層次豐富好多（＊）。
7. 即係同一個道理（！），埃汾係鍾意女仔穿耳環（好多女仔都會），甚至穿臍環的—我梗係知你之後想問乜啦，但我好似真係冇見過（睇片唔計啦，睇片我見過恐龍添）
8. 放心，埃汾太係冇穿臍環的，命運嘅嘢。正如我不能接受有人打邊爐叫午餐肉，但埃汾太就係個叫午餐肉嘅人，而家我有時都食埋一份
9. 講返，粗粒花生醬先係王道。沒有補充。
10. BTW，如果你仲未掟爆mon或者檢舉我，講多啲更offending 嘅嘢你知：
11. 西多士，係唔應該有花生醬的，亦唔應該有煉奶。
12. 只有糖漿先係王道，最好係傳統有個壺嗰種。但如果大家樂大快活之類，得獨立包裝嘅，可接受，但記住要做「道德的抗戰」，放迷得越少越好，仲有搵機會收復呢個「道德嘅失地」！點收？例如自己拎壺糖漿去大家樂大快活！應該唔會阻止你掛？（＊＊）
13. 仲有，西多士係切九塊的。沒有其他切法。切十六塊，六塊，八塊都係異端。不過我估好快縮水到可以切四塊。
14. 雖然，其實我有一排係切七塊，當七巧板咁切，然後砌嘢出嚟，觀眾唔好學。有次對面個細佬有樣學樣，就畀老母鬧。所以唔好問香港點解冇STEM。有圖有真相（https://bit.ly/2RoQzvA）。
15. 仲未掟爆電話？咁講多樣嘢你知：
16. 埃汾認為，西多士，係唔應該有餡的！乜餡都唔應該有。唔應該有花生醬！乜話？午餐肉？傻的嗎？
17. 劍心係拉麵塔利班，一定要有冰水。蔡瀾係叻沙塔利班，一定要有螄蚶。咁我就係西多塔利班，一定係糖漿，同埋冇餡。
18. 歡迎留言鬧。但，你不可能改變我。
19. 埃汾李轉過身子，拿起一截粉筆，使盡了全身力氣，在黑板上盡可能大地寫下幾個字：「粗粒花生醬萬歲！」然後，他呆在那裏，頭靠著牆壁，一句話也不說，只是用手向我們示意：「食完了……你們走吧」（＊＊＊）
（＊）但，應該唔少現實朋友知道，埃汾食嘢好多時係唔點任何醬的。例如燒鵝嘅酸梅（？）醬，我三十年（即係由我可以反抗我老母開始）都冇點過。你話，喂，矛盾喎，層次豐富喎。人就係矛盾的。
況且人會變，埃汾細細個到而家，麥當勞都係食雙層芝士孖堡（所以食到咁肥），而足三兩亦係佢嘅變種（我話係就係）。但，我細個係唔食酸瓜嘅，但細個怕醜唔敢同姐姐講，或者細個冇咁好服務，或者唔記得，咁我就會揀出嚟。仲要係用手（！），因為我連含佢出嚟都唔會，唔可以沾有呢啲味。但而家呢？我係照食嘅，甚至開始鍾意食。人會變。
另一偏好係，我好似三十歲前，都係要餐餐有飯落肚的，粉麵意粉都唔得，英國讀書時更加不能理解啲鬼仔可以Cold Sandwich做午餐（有個仲勁，食包利是薯片，後來退埋學）。但好似三十歲後，就開始鍾意食粉麵了，甚至一個星期食三四次金色不如歸（舊幾水一次的說）。所以人會變。
所以，Never say Never，但我而家都係不能接受魚肉燒賣。魚肉燒賣唔係燒賣，正如人造牛油唔係牛油。
（＊＊）其實唔係好痴線啫。多年前因為我打邊爐鍾意混醬有麻油，但舖頭冇，所以囡囡特登星期五晚帶枝麻油出街（！！！）。後來老細因為咁買咗麻油，「可惜冇under我個名咁放住」。
（＊＊＊）都德嘅《最後一課》，極之咁國民教育，阿爾薩斯自古以來是法蘭西不可分割的一部份。法語是世界上最美麗的語言。飛機打到成地係。不過，「斯特拉斯堡」就擺明係德文地名啦，朋友。
———————
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
