真係有人覺得只係因為一串魚蛋？
魚蛋嘅背後係咩？係貪污無人查、港人突然失蹤無人理、人人唔想佢起果條橋夾硬要上馬、人人唔想佢做果條友偏偏去領導大學；暗角打人不了了之、想講番廣東話都要去悍衛。好，唔講政治吖嘛？搵啲娛樂放鬆下，免費台得一個，上網想話搵啲改圖改歌有啖笑啦，就搞個網絡廿三條。毛澤東話，敵人反對嘅就要擁護，敵人擁護嘅就要反對，咁根據呢個理論，香港市民一早畀管治者當做敵人。
以前新正頭嘅潛規則，官民各自識做，都係三日啫；夾硬嚟嘅結果，就係令雨傘革命積落嘅怨氣再加上一大堆不公義造成嘅民怨，一次過爆發，即係今日FB見得最多果四隻字：官迫民反。
非常時期嘅非常事件，唔可能係非黑即白咁一邊啱晒一邊錯晒；嘗試諗下背後嘅原因：點解要咁做？警棍扑頭㗎喎，咁點解要咁做呢？貪好玩呀？
今日人人討論，各有立場，兩邊都有人撐，兩邊都有人鬧，亦有人話兩邊都唔啱之類；想講嘅係，民主唔係天跌落嚟，睇下台灣之前係點嘅？咁香港都有號稱為港人爭取民主嘅政黨嘅；OK，而家有人行埋出嚟爭取嘞，你衝出嚟譴責？若果有人去為一啲我相信嘅價值而行出嚟嘅話，我覺得自己無資格喺屋企隔住個Mon指指點點；譴責自己人，但又衝去台灣「考察」兼為勝利歡呼，呢啲係咪叫輸打贏要？
今日喺FB見得同官迫民反四隻字一樣多嘅，就係「香港幾時變成咁」；冰封三尺，非一日之寒，民怨累積而從來無得過正視，就變成咁樣。尋晚成晚睇新聞，好沉重，而寫呢啲嘢，就一定會有人唔鍾意；但係，如果唔能夠忠於自己嘅睇法嘅話，我會更加唔鍾意自己。
唔識要睇 在 《又睇你識唔識Law：兼職財路》 - YouTube 的八卦
大學生做兼職，最緊要「唔好怕蝕底」,幫得到人就幫吓手，係咪？但係又唔能夠一概而論喎！幫人都要有個限度！今集《又睇你識 唔識 Law》繼續有iSir ... ... <看更多>