又到左令人期待嘅聖誕節啦！大地之友們會唔會好奇法羅人嘅聖誕節點過呢？等我同大家分享幾個法羅聖誕冷知識啦😊
1.聖誕禮物有得換
每到聖誕前一個月，法羅人都會出動買聖誕禮物。成個國家唯一一個商場SMS 最多人就係呢個時候。而最易破產又係呢個時候，我朋友老公有8兄弟姊妹，個個結晒婚又有小朋友，加加埋要買至少二十份禮物，所以佢屋企定左個規矩，結左婚既兩公婆只會得到一份禮物。一次過買咁多禮物，真係頭都痛埋，又未必知道個個人喜好，咁點算好呢？喺法羅群島買禮物，個售貨員會問你需唔需要貼上一張換貨貼紙。貼上左換貨貼紙嘅禮物，接受禮物嘅人如果唔鐘意份禮物，就可以去返同一間舖頭換返同等價值嘅商品，係唔係好貼心呢。
2.來自冰島嘅聖誕樹
每年嘅聖誕節，法羅群島首都Torshavn 都會有一個聖誕樹亮燈儀式。爸爸媽媽會帶住小朋友齊集聖誕樹下，睇住樹上嘅聖誕老人倒數三二一，然後將聖誕樹嘅數百燈泡亮起，正式踏入人人期待嘅聖誕月。而呢棵聖誕樹原來係空運過黎架，佢係黎自冰島首都雷克雅未克！由2013年起，雷克雅未克市長都會向Torshavn 送上一棵聖誕樹，表示兩個首都嘅友好。
3.每年平安夜嘅節目
法羅人聖誕有咩做？唔似得香港，聖誕節個個出街食飯睇燈飾慶祝，歐洲嘅聖誕節就好似中國嘅新年，基本上所有舖頭餐廳都關門，大家會去親戚朋友屋企互相探望，咁喺屋企有咩做？我喺法羅過左五個聖誕，每年平安夜同一時間，電視都會播同樣嘅節目，分別係《Merry Christmas Mr.Bean》同迪士尼嘅聖誕卡通。睇左五次，我已經可以背到d劇情，但係大家每次睇都哈哈大笑。
4.聖誕大餐
咁法羅人嘅聖誕節食咩東東？多數嘅法羅家庭都會預備一隻鵝同一隻鴨。再配上焦糖薯仔、紅椰菜同普通薯仔，淋上肉汁，咁就係一餐傳統嘅法羅聖誕大餐啦。亦有d法羅家庭選擇以法羅傳統食物風乾羊肉作為聖誕晚餐。而大地之家每年會準備米布丁作為甜品，然後大地之嫲會喺其中一碗米布丁放入一粒杏仁，食中杏仁嘅幸運兒會得到精美禮品一份😊
5.商場聖誕裝飾年年一樣
每年聖誕節，香港各大商場都會有大型裝飾吸引市民去消費，年年都唔同，吸引大家去打卡。但喺法羅群島，商場只有一個，而裝飾亦只有一款，睇左五年，五年都係一樣。不過無減小朋友嘅興致，小朋友一樣玩得咁開心😊
6.坐船嘅聖誕老人
大家對聖誕老人嘅傳統印象係，坐住鹿車喺天上飛。而喺法羅嘅聖誕老人係坐住木船，漂流到各個島，派禮物畀小朋友。父母會帶住小朋友，一早喺碼頭上等候聖誕老人嘅到來。小朋友望住載住聖誕老人嘅船從遠處慢慢駛至，停泊到岸邊，而一旁會有樂隊奏起聖誕樂曲，非常有聖誕氣氛。
大家覺得邊個冷知識最有趣？或者有無住喺其他國家嘅大地之友有當地有趣聖誕習俗分享下？留言話我知啦😊
最後，大地一家祝大地之友們聖誕快樂🎅🏻🎄
🎁
#merrychristmas #faroeislands #siumaiismybaby
年年一樣 在 某個商場的環保聖誕裝飾(年年一樣) _ 2013 - YouTube 的八卦
某個商場的環保聖誕裝飾(年年一樣) _ 2013. 509 views509 views. Nov 23, 2013. 1. Dislike. Share. Save. feideepking. feideepking. 2.99K subscribers. Subscribe. ... <看更多>