《大叔的愛》終於大結局了♥️
記得初初公司考慮緊我接唔接拍哩部劇嘅時候，我淨係想像都覺得係會有一定嘅壓力，因為睇過原劇日版實在有太深刻嘅感受，每一個角色都好獨特又岀色，每一個場口都好自然但有趣，每一段關係都好虐心但溫暖。自己一開始係好擔心演繹唔到日版嘅精神，甚至會糟蹋咗日版，令大家失望。但心裏知道哩個係一個好好嘅機會去試練，去測試一下自己繼《男排女將》Bobby一角之後可以做到幾多，所以最後同花姐講「我想拍」。
喺之前嘅IG Live同訪問其實都分享咗好多關於拍劇嘅情況同趣事，所以今次分享多一啲「阿牧」嘅成長吧。
坦白講，對我嚟講嗰兩個幾月嘅拍攝喺精神上係幾疲累幾demanding嘅感覺。好記得第一次由頭到尾睇晒成份劇本之後，第一個感覺係：阿牧最開心時嘅energy level都唔及Carmen姐嘅一半😆成套劇佔咗三分二嘅場口都係比較負面嘅情緒，劇本上好多時岀現嘅一句演員指引就係「阿牧不是味兒反應」。拍攝頭幾日我都仲摸索緊「不是味兒」哩個指引係一個咩情緒；但隨著拍攝日子愈來愈長，我就開始明白阿牧嘅不是味兒喺每一場都可能有少少分別，可能係失望？失落？妒忌？心煩？寂寞？
哩兩三個月，我自己有種感覺覺得「Anson Lo」喺哩個世界彷彿消失咗咁。好多時拍攝完返到屋企係好攰，但會有個意識叫自己執下嘢、做下家務。有時搭車返劇組開工嘅車程途中，聽住「阿牧歌單」，望住車窗岀面嘅天空都係灰灰暗暗。可能係絕大部份嘅場口情緒，令自己好似被好多重寂寞嘅氣圍包圍住。
最近好多親戚朋友問我「你喺大叔的愛每次唔開心或者喊嘅時候係諗緊咩？」當時因為有好多場口都係跳拍，全部都唔係跟劇本正常timeline拍，即使拍緊「分手」嗰一場，其實係仲未拍過任何阿牧同阿田sweet、拍拖嘅場口，所以好多時自己只能靠幻想。「分手」嗰一場拍攝之前，我同呂爵安喺間熄晒燈嘅房入面醞釀情緒。當時我不斷幻想嘅係，阿牧同阿田未發生過嘅拍拖日常畫面、阿田同梓芊一齊咗嘅畫面、阿牧提出分手之後入房執行李離開嘅畫面。或者未必係一個好正確嘅方法，但係我當時唯一依賴嘅做法。
好感謝每一位觀眾支持大叔的愛，支持阿牧哩一個角色。哩三個星期收到好多大家嘅留言，見到大家都好代入每一位角色去分析劇情，你地會跟住我地笑、跟住我地喊。哩三個星期就好似每晚都同大家一齊睇電視咁，大家唔單止會聽主題曲同片尾曲，仲會同阿牧一齊聽阿牧嘅歌單，一齊去感受阿牧嘅內心世界，好感恩可以同你地每一位有一個咁大嘅bonding。
感謝ViuTV令到港版嘅大叔的愛誕生。多謝監製Tommy同導演CK對我嘅信任，兩位由頭到尾都好相信好鼓勵我。好記得拍攝中段我成日問兩位我有啲咩要調整，佢地異口同聲答我：「如果你做得唔好我地一定會同你講，但首先你要俾多啲信心自己，唔好下下覺得自己一定會做得唔好。」你地嘅鼓勵係俾咗好大嘅勇氣我。感激製作組、拍攝組同埋台前幕後所有工作人員成就哩一套劇，冇你地每一位嘅汗水都唔會有依家大家睇到嘅每一個場景、畫面。辛苦晒大家🙏🏻
今次同到自己嘅戰友同埋各位前輩合作，好似多咗一個大家庭咁，好懷念大家一齊有講有笑開工，係好有愛嘅一個工作crew♥️
多謝「阿牧」教咗我好多嘢。好早前我講過「每個人都需要一個阿牧」，因為佢令我明白日常生活上待人處事可以再多啲企喺人哋角度諗、多啲照顧身邊嘅人、佢對愛情嘅執著，同埋提醒我係時候要認真學下煮嘢食😆 感激大家對我嘅包容，演戲上有太多地方要學習同努力。希望大家感受到港版大叔的愛嘅認真同埋背後意義，感受到每一個角色嘅投入。
Anson Lo會繼續努力，因為我知道我真係好享受演戲！希望下一次再畀大家睇到Anson Lo唔同嘅一面💪🏻
#大叔的愛
#感恩
#辛苦大家睇千字文
唔單止 在 a bit唔單止少少意思？「唔使喇唔該！」英文點講？ - YouTube 的八卦
Welcome to Miss Tiffany's YouTube Channel, where you can discover secrets to mastering the English language with engaging YouTube videos. ... <看更多>