今天, 同老婆的朋友出來吃飯, 十幾人, 好熱鬧.
當中有位朋友, 帶了她的愛犬出來.
裝在手提袋中, 無人發現.
睹物思人, 想起離開了的狗狗----妹妹.
回到家, 睇番半年前那一天的記事, 還是眼濕濕.
沒有你, 還是愛你:
今天, 妹妹走了.
8年前, 獨居難耐, 打算養頭寵物為伴.
當時想, 與其到寵物店去買, 不如去領養, 既能物色狗狗, 也可做善事, 一舉兩得.
人人都說SPCA多遺棄動物. 但我記得去到旺角愛護動物協會時, 只得兩頭給我選擇.
一公一乸, 俱是唐狗.
職員叫我任選其一, 我選了那頭公的. 因為較令仔.
滿心歡喜, 等辦手續.
職員這時卻說, 公的有人認領了, 問我要不要那女的.
我那時真的有點猶豫, 因她無隻公咁令.
SPCA的人也說, 因為她不太令, 所以沒人問津, 如果再過多一段時間沒有人要, 我們便……
我望著狗女, 覺得她蠻可憐, 於是便領養了她.
這是第一天的事.
回到家, 她很害怕, 躲在牆角.
我也給好適應新地方, 不去騷擾她.
但發覺到了晚上, 她不眠不吃, 我想她會死嗎? 好歹妳也要小便吧.
聽人講狗狗會痾尿在報紙上, 於是便放了報紙在客廳.
果然, 她走過來, 痾尿, 好大篤!
執死我, 抹死我.
好辛苦才攪番乾淨, 再鋪報紙.
呢個時候, 佢又走過來, 痾屎, 好大舊!
我…… 未試過執屎!
連自己果D都未掂過, 而家要親手掂, 好噁心!
原來D屎, 硬中帶軟. 仲幾’聚手’!
這是第一晚的事.
妹妹從此便在這裡生活下來.
我煮野食, 開煤氣爐, 佢係咁吠!
原來, 佢從未見過火光.
我又試過如廁期間, 我嗌佢黎陪我, 但她用口咬住廁所卷廁紙頭, 拉出客廳.
我覺得好壯觀, 尤其是條好長嘅白色廁紙從廁所係咁拉出去, 都可以唔斷!
我係咁笑.
但後來佢拉晒條廁紙, 我無廁紙用, SHIT.
這是第一個星期的事.
我帶妹妹出街.
她不肯出. 哭泣著.
她以為我唔要佢了.
我說: “不要怕, 爸爸不會不要妳的!”
連拉帶扯, 才到了街上, 她猶有餘悸, 沒有便便.
後來, 熟習了附近街道, 也曾帶她到空地跑.
那時她還年幼, 跑輸俾我.
也帶她上後山, 那裡很多人放狗, 希望她認識一些狗朋友.
但後山的狗主人很白鴿眼, 經常不讓其狗狗和妹妹玩.
可能那些人覺得妹妹樣衰吧.
記得有個人更問我: “你點解領養唐狗姐? 地盤狗咋MA!”
無癮, 走.
一邊走一邊同妹妹講: “D人唔愛妳, 爸爸愛妳.”
這是第一個月的事.
在家為妹妹預備的糧, 有時幾日無郁過.
有一日, 俾我發現, 佢食屎!
我簡直晴天霹靂!
後來, 自我安慰:
咁都好, 慳番好多狗糧!
循環再食, 好環保!
但後來, 發覺佢有時都會用舌頭LAM我的臉, 但牙縫間有屎積, 非常噁心.
從此, 嚴密禁止她食屎.
雖然, 有時她都會忍唔住, 偷食.
這是第一年的事.
妹妹也曾咬我!
記得那日我懲罰緊另一隻狗LUCKY, 因為LUCKY食咗我隻鞋!
剩番個鞋底.
好! 我就拎個鞋底打LUCKY!
妹妹好有義氣, 係側邊猛咁吠, 叫我唔好打!
我話唔關你事, 係咁同佢解釋對鞋好貴云云……
再打!
突然大髀好痛, 妹妹咬咗我一口!
果晚, 入咗醫院, 期間發誓要殺咗妹妹祭旗!
番屋企, 覺得呢D先係義氣仔女, 又繼續養佢.
這是幾年前的事.
唔覺唔覺, 妹妹8歲了.
覺得虧欠她很多.
常沒有空帶她到街上行街.
每次我打開家的大門, 她總是盼望我有沒有喊她出街.
她很多句子聽不懂, 最懂的就是’街街’及’SIT’而已!
雖然失望連連, 但她從不發脾氣. 家中物件永遠安然無恙.
我回家時, 她總會叼著她的狗骨玩具給我.
因為, 在她心中, 她最珍貴的財產就是這個狗骨玩具了, 她要把最好的給我!
然後, 她繞著我團團轉, 歡迎我回來.
這是八年內每天都發生的事.
今天, 妳已走了半年.
和妳一起的日子, 是緣份.
我們之間, 曾有笑有淚
你聽到我在此和你說話?
你明白嗎?
如果不明白也沒所謂, 妳就當以上每個字都是’街街’吧!
因為,
妳每次聽到’街街’時,
是笑得最開心的.
唐狗 在 唐狗嘅優點 的八卦
... <看更多>