《有名有姓，提及作者嘅重要性》
對我來講，今日發生左兩年事。
一. 有關一個仆街...... BuzzHand
我FB今日畀 BuzzHand 洗左版。BuzzHand 網以及佢嘅 FB，經常一字不漏，連文帶圖偷網上作者嘅文，隻字不提作者名同出處，當自己網站寫。我 FB add 左好多網上作者，大家都好似「萬眾同心公益金」咁，齊心合力，呼籲大家停止share BuzzHand 任何post。BuzzHand 真係好似禮義廉話成功爭取為地球提供氧氣咁，唔係自己網站寫，居然厚顏無恥偷文呃 like 呃網上廣告費。(最近，作者史兄嘅網上熱門文章《仆街磁石》再次被偷了)
Copy & Paste 偷文，真係好想頂你個肺...
我有畀人偷過，深深明白個種難受，個種難受等於你發現中左六合彩，但畀人偷左你張飛，唔畀返張飛你一樣。我冇誇張，見到有人偷文，真係好想改用毛筆寫完先擺上網。
我寫字真係花左時間架，時間貴過錢呀...
雖然我打字真係好快，呀媽都話見到個 keyboard 好似畀我打到出煙，但點快都要時間。其實我條 to do list 真係長過條青山公路，作文係要抽公餘時間。「時間係好似事業線咁，可以擠出來嘅，哂得你幾多時間呀」，時間係可以擠，但你需知我係 A cup 佳麗，我真係擠得比其他人吃力。
－－－－－－－－－－－－－－－－－－－－
我的文字不要活得偷偷摸摸...
→ 寫字付出心血同時間，寫字嘅人絕對「值得擁有」你有名有姓地提及。
→ 寫字係搵唔到食架，微薄嘅稿費，只夠我一個月食多次魚柳 bell chan，或者去譚仔食野可以叫多個餸。用我嘅文，有名有姓提及作者，係一份尊重同肯定。尊重我畀心機寫作，肯定亦認同我寫嘅野。已經冇咩錢，仲連呢份尊重同肯定都唔畀我地寫字嘅人？
提及姓名真係重要架...
→ Bunsen burner 點解叫 Bunsen burner ，咪就係因為 Bunsen 發明個舊野囉。呢個名都係畀Bunsen一個肯定。
→ 正如誠哥捐完錢，都要棟樓有佢個名。
→ 梵高都因為死前唔出名，冇人提佢個名，冇人欣賞佢先抑鬱同痴線。所以提及姓名真係重要架。
講咁多，我都係想呼籲大家唔好 share BuzzHand，我真係好想呢個謝絕 BuzzHand 行動可以好似東華咁，有100條線，齊心合力打擊呢個無恥之徒。
－－－－－－－－－－－－－－－－－－－－
今日嘅第二件事，就係有唔只一個朋友仔，通知我蘋果日報嘅陳沛敏於佢嘅文章，引用了我於《「呢咁hea」嘅香港電影金像獎頒獎禮》篇文嘅說話。
真係好開心...
→ 當你欣賞嘅人提及你，件事好難以置信。好多謝陳沛敏提及我。You see，呢件事充分反映到有名有姓，提及作者嘅重要性。
→ 我真係好多謝各位朋友仔嘅關注，可能咁講好假，但對我來講，每一個like 同share 都一樣可愛，每個 share 同 like 嘅份量係均等架，我唔會因為有出名嘅人share 同 like 而更開心。大家三唔識七，你地都認同我，個份開心......好開心。記得杜汶澤喺頒獎禮提及，外國一個頒獎禮嘅新人獎係用冰造，過左頒獎禮個獎就會溶，目的係提醒得獎人唔好得意忘形。所以由呢刻開始，又從新投入我寫字嘅工作。
－－－－－－－－－－－－－－－－－－－－
PS. 我其實好憎人share文，用好間接嘅方法提及作者，有時見到有人引文用兩條斜線，唔 share 原post，引文用兩條斜線，個兩條斜線對我來講，係好似小丸子面上出現個兩條「標冷汗線」一樣尷尬。
叫多個 在 什麼？！連台灣人都不知道的叫計程車方式！？｜知識宇宙船 的八卦
初到貴境，還未來得及買車，難免要叫計程車往來。但走在路上， ... 觀看影片了解叫計程車步驟，助你輕鬆在台生活沒煩惱！叫計程車更多其他方... ... <看更多>