《黃金兄弟》短評
「被遺忘的《古惑仔》道德觀」
-
唔知大家有無期待，
而我就等咗《黃金兄弟》好耐。
—
先君子後小人，《黃金兄弟》嘅表現已經比我預期中好，製作認真，動作華麗，為咗幾幕爆破場面不惜工本，絕對唔係一套呃錢嘅電影，我甚至見到唔少台灣影評盛讚呢套作品。
—
但我作為《古惑仔》電影系列嘅fans，對於故事嘅編劇就有好唔舒服嘅感覺。
—
所有角色變曬，背景亦唔同，我明白《黃金兄弟》係唔應該係《古惑仔》電影系列有直接嘅比較，但既然選擇用「江湖再聚」，班底陳浩南、山雞、大天二、包皮同大頭仔都喺度，而電影亦會用番舊作嘅配樂同直接引用歌曲《友情歲月》，消費舊情懷，咁又避免唔到比較。
—
一直以嚟，《古惑仔》好睇嘅地方喺邊呢？第一集嘅副題已經講咗，係「人在江湖」。幾位主角喺徙置區成長，客觀條件令佢哋好難讀得成書，只係踢波姐，就比o靚坤「一人一支可樂，見一鑊打一鑊」，所以就跟咗大佬B，行古惑好大程度上只係為咗自保，身不由己，一步一步咁行上揸FIT人之路。
—
《古惑仔》電影入面一個極其核心嘅道德觀係「盜亦有道」，陳浩南一干人等雖然撈偏，但大抵都係開吓酒吧，做下生意咁，就算有涉及黃同賭，都唔會直面去寫佢哋為咗賺錢不擇手段（反而多數係比人搞）。主角從來都係好人，而好人得嚟又唔代表無缺點，例如山雞衰咸濕，包皮又細膽，大天二貪玩等等。佢哋有好多襯家，但呢啲襯家大多窮兇極惡，例如《人在江湖》開首就做低「巴閉」，「巴閉」非禮骨妹，罪該萬死，而之後有好多奸角，例如烏鴉、耀陽、丁瑤等等都係死有餘辜，電影營造咗一個既灰色，但又忠奸分明嘅世界，每次惡人伏誅，就係睇《古惑仔》最爽嘅時候。
—
但《黃金兄弟》呢？由刀光劍影去到槍林彈雨，故事整體嘅視野大咗好多，離開香港遠赴歐洲同日本等等國家，而睇得出編導仍然係想將[盜亦有道]嘅精神延續落去。例如電影嘅開頭五位主角係僱傭兵，聽住曾志偉同上司嘅命令行事，為咗兄弟可以放棄行動，但其實喺每次行動入面總係會牽涉住好多無辜嘅人在內。
—
例如片末五子喺黑山共和國嘅大戰，謝天華請咗大量外國人做佢嘅守衛，而鄭伊健、陳小春、林曉峰同錢嘉樂四個人就去攻島，攻島途中殺咗大量外國士兵。但外國士兵又有何罪？我只係感覺到一眾黃金兄弟視人命如草芥，同以往只有惡人當災嘅精神已經相去甚遠。
—
可能有讀者會質疑，其實《黃金兄弟》同《古惑仔》嘅精神未必要係一樣，但故事嘅其中一個主線其實係鄭伊健希望偷藥送比有需要嘅小朋友治病。一邊做善事，一邊屠殺無辜嘅人，編劇嘅邏輯就會變得非常矛盾，實為「義氣行先，你死你事」。
—
喺責怪編劇嘅背後，其實更大嘅制肘係嚟自電影嘅類型。唔爆唔炸，又點吸引到大量觀眾入場？抵睇嘛！大量動作場面之下，犧牲嘅仲有有關幾位兄弟性格上嘅描寫，除謝天華之外，唔同角色嘅描寫只淪為服務動作場面嘅工具，例如錢嘉樂係車手，林曉峰係電腦天才等等等等，失去咗古惑仔系列人物描寫精彩嘅靈魂。
—
雖然花咗頗多篇幅去批評《黃金兄弟》，但係無可否認當幾個「古惑仔」行埋一齊有互動嘅時候，就算只係無無聊聊，電影自然就會變得好睇，有好好嘅化學作用，亦之不過，呢類互動嘅時間，比更多嘅動作場面掩蓋了。
