堅持係為咗乜？ 其實有時我都唔知。
2014年開始發病，到2021年，足足要7年，我先叫好番八八九九。
最初，好幾個所謂名醫斷定我患上什麼「唔exactly知係咩病但冇得好返」嘅奇難雜症，我堅持搵出自己究竟發生咩事。
到終於知道原來係焦慮同抑鬱誘發所有身體情緒問題，我堅持要搵一套真正適合自己嘅療癒方式，又花咗一段好漫長嘅日子。
大家以為我呢幾年嚟好優哉游哉，其實我每一日都好堅持地做緊我嘅功課，每日都抽時間練氣功、冥想、定時同治療師對話。到呢一年，我身體終於可以應付較劇烈嘅心肺運動，我就堅持游水操塘。到呢半年，身體進步到可以行山，我就堅持行山，到宜家甚至可以跑吓山添。
由見到人會驚恐到神經抽搐抖唔到氣、行步快路都氣喘周身痛，到宜家咁，除咗靠堅持，都諗唔到其他。
當然，我亦都無數次跌入一啲覺得一切都好似冇進步過、再努力都係嘥氣嘅dark days，會發自己脾氣問：「仲堅持為乜呢？ 有意義咩？」
大家真係咁恨我復出咩？我真係好鍾意唱歌表演咩？我真係咁需要話俾人知我跌低可以起番身咩？大家真係care咩？我好返重要咩？世界會因為我康復而好啲咩？
其實，可能所有以上問題嘅答案都係No。我做嘅一切都可能真係無意義架。大家亦可能真係無理過你架。咁又點呢？
去到呢啲位，人自然會諗，放棄。其實放棄真係好tempting因為比堅持容易一萬倍。我經歷過無數呢啲不如一了百了算罷嘅時刻。
亦都係呢啲時候，你會忽然諗起唯一一樣最實際最襟計嘅嘢：你放棄，你就將你之前嘅所有努力白費。你之前嘅堅持就功虧一簣。簡單啲講：嘥L晒。
作為一個精打細算甚怕浪費嘅人，諗到呢度，我就死死地氣，繼續鍛鍊，繼續所有無意義嘅堅持。我繼續死死地氣相信某朝一日，我回頭一望可以講一句最老土的「堅持係冇白費架」。
踏入六月份，我覺得係時候分享呢個心路歷程俾大家。係架，堅持為乜？如果放棄就係浪費之前所有努力兼且死路一條，咁堅持就算幾無意義、幾咁漫長、幾無前景都好，起碼令我仲感覺到自己仲生存緊。活著，本身就不是最大意義嗎？
#香港人
#加油
#你明我真正想講咩嘅
#藍奕邦歸位
#別忘掉原是靠堅持醫好每個傷患
別忘掉原是靠堅持醫好每個傷患 在 青春頌（許廷鏗演唱的歌曲） - 求真百科 的八卦
大好青春要盡耗. 記住要共最美的人分享每個夜晚. 別忘掉原是靠堅持醫好每個傷患. 既是有力挺起胸膛即管好好作反. 無懼雨水沾濕兩眼. 無用聽誰來勸告. 一街的人言滔滔. ... <看更多>