萬聖節之夜
文：薯伯伯
尋日坐車去到銅鑼灣一帶，再行路返屋企。
忽然有兩個女人過嚟，用普通話問：「不好意思⋯⋯」
我當時戴住耳塞，聽唔清佢哋講乜，就除低耳塞，問佢哋有乜可以幫到手。
點知呢兩個女人，一開口就問：「你不要介意啊，我們有件事想找您幫個忙。是醬子，我們有點困難，想您在附近找個餐廳，請我們吃點東西。」
當時我心情就唔太好，本來諗住萬聖節去蘭桂芳，又封晒路，無得上去飲兩杯。而家忽然見到有兩個三十歲操普通話的華籍外地女子，心想可能是問路，尤其近來多交通改道，遊客問路，當然要幫手。
自己本身好喜歡去旅行，喺外地經常受到陌生人幫助，返到自己家鄉，當然都想幫番其他旅客。即使係中港矛盾好熱烈時，其實我對內地遊客，都算係好幫忙。
點知呢兩個女人，一開口，居然就係典型街頭騙案嘅開端！
我當時忍唔住笑咗出嚟，倒吸一口涼氣，用普通話同佢哋講：「你們真的挺不要臉。」
佢哋大概無估到我咁直接，先係呆咗一下，問我：「甚麼？」
我再講一次：「你們真的完全不要臉！」
然後呢，佢哋就開始逃跑。一個跑向九如坊方向，另一個過咗對面馬路。
我就攞個相機影佢哋，但無影到正面，佢哋繼續咁跑，我都無追上去，只係鬧佢哋：
「你跑嘛！你好意思嘛！要不要臉的！」
當然重有呢一句：
「（你們）把中國人的形象都丟乾丟淨！」
有一個女人跑咗入後巷，我就離開，點知最好笑係，呢個女人沿著後巷逃跑，兜咗個圈，由巷仔另一邊出嚟。我見佢由巷尾出嚟時舒一口氣咁，點知一擰轉頭，又見到我，咁佢又慘豬豬咁即刻跑番轉頭！
完。
注一：如果有人問我，點解確定佢哋係行騙，咁就正如你收到尼日利亞遺產騙案時，係唔需要真金白銀被呃咗錢，先知道佢哋係行騙一樣。但願唔好有人真心膠咁問：「萬一佢哋真係落難異鄉，咁咪好慘囉？」
注二：其實我當時重講咗一句話嚇佢哋，我話：「我要抓你們去報警！」佢哋一聽「報警」，果真嚇到跑得再快啲，證明佢哋真係唔太知道香港嘅情況。
萬聖節快樂！
———
照片：相片中呢個女人想呃錢，其實有兩個人，但另一個逃生能力較強，跑咗去好遠。
———
* 想追看薯伯伯的文章，請設定本 Page 為「搶先看 / See First」*
Instagram 🥑🥭🍉🍌: pazu
新博客：http://pazu.com/blog
另外還要提一提大家：
【新書速報】Pazu 薯伯伯《不正常旅行研究所》（白卷出版社）——從西藏拉薩到神州大地；由亞洲各國至中東地區。非常人般玩轉奇異世界、紀錄精彩故事文化習俗。
在旺角序言、北角森記、誠品書店及各大書店，均有代售！其中在旺角序言及北角森記，有少量簽名版本。
九如坊 在 Kau U Fong 九如坊Hong Kong Ground 香港地(01257) 的八卦
Kau U Fong 九如坊 Hong Kong Ground 香港地# 九如坊 #香港地#central Like our Facebook Group Hong Kong Ground 香港地Group ... ... <看更多>