自從知道咗西營盤站延遲嘅秘密之後，我就再唔敢搭港島綫。（２）
上年四月，喺機緣巧合之下，我去咗西營盤站做一星期嘅夜更。同更嘅係一個非常鍾意講鬼故嘅達叔，本來看守第一晚都好地地，點知去到第二晚，當達叔同我講咗個有關西營盤站延遲嘅「故事」之後，奇怪嘅事情發生了。
空無一人嘅月台上，毫無預兆咁出現咗一排混有泥漬嘅濕腳印。雖然估計係乞丐嘅可能性好大，但為咗保險起見，我都係決定搵埋達叔先一齊過去睇係咩情況，有咩事都可以互相照應。你地知喇，乞丐同醉酒漢係可以好危險，萬一撞到持刀嘅南亞人就更大獲。
－－－－－
上回連結
http://bit.ly/1PNfvRX
－－－－－
但講起上嚟真係幾奇怪，記得返工之前仲係好好天冇落雨，點解會係「濕」嘅腳印？仲有，凌晨時份所有出入口都已經封咗，到底呢條友係點樣入嚟？帶著一大堆疑問，我壓低腳步聲走返轉頭，好快就去到月台嘅職員休息室，但達叔並唔喺到。之後我試過打俾佢，但一樣係冇人聽。
「應該仲同緊老婆傾緊電話？」我低聲自語，「係啦……記得佢話要過食煙，咁肯定係行咗出去。」
根據尋日嗰情況，達叔好大機會係去咗 B3 出口地盤嘅天井位到食煙（嗰陣仲未開通）。記得佢話嗰度近奇靈里，食都食得特別有氣氛。當時，我並冇追問到點解……
雖然行嚟行去好似好浪費時間，但既然個「乞丐」係為咗避雨或者訓教先落嚟，咁佢一時三刻應該係唔會走。而其實走咗就仲好，間接免去咗唔少麻煩。打呢啲臨時工都係求財，唔洗搏咁搏嘅。
就係咁，我行返上去上層，向住 B3 出口進發。經過壁畫嘅時候刻意望多眼，入嚟嘅時候真係唔覺，但一聽完達叔嘅故事，開始覺得畫面裡面嘅人大多都面目猙獰，越睇就越覺得詭異，到底當初點解要咁樣設計？
終於，距離地盤天井位只係得返一個轉角，雖然聽唔到達叔傾電話把聲，但我估佢應該喺坐咗喺一邊，食住煙喺到思考人生。
然而，一到步，馬上就被眼前嘅畫面所震撼到……
喺月光嘅照耀下，我見到達叔背對著我跪咗喺到，而佢嘅全身都充滿住血漬。
「達叔……？」見狀，我顫聲咁嗌出佢嗰名。
達叔並冇回應到我，當我鼓起勇氣行前一步，諗住睇清楚發生咩事嘅時候……居然俾我見到達叔身上滿佈住密密麻麻嘅血紅色屍蟲，不斷蠕動，不斷啃食達叔嘅身體，鮮血就係因為咁滲出嚟……
見狀，我終於忍唔住大嗌出嚟，轉身起勢就跑，離天井位……離達叔有咁遠走咁遠。有刻諗過跑去最近嘅出口解開門鎖離開，但馬上就醒起自己將鎖匙留咗喺職員休息室，要拎就要落返去月台……
「嗄……嗄……」
衝返落去，我已經唔理自己嘅喘氣聲同腳步聲會唔會嘈醒月台嗰位「乞丐」，只係想盡快離開呢到，終於順利走返入休息室，燈都無開摸黑咁搵返條鎖匙。一放鬆落嚟，突然感到好噁心，忍唔住就嘔咗出嚟……
到底點解會咁？點解達叔會好地地就死咗？冇可能架……？
「嘩，弘仔，」就喺下一瞬間，我身後響起一把熟悉嘅嗓音，「我知你要返正職好辛苦，都唔洗嘔出嚟嘛？」
我震住咁擰轉身，喺我面前嘅，係確確實實嘅達叔本人。
「唉，」達叔打開休息室嘅燈，喺燈光照耀下，佢身上並冇血漬，亦冇任何屍蟲喺到蠕動，同離開傾電話嗰陣完全冇分別，「要清潔就麻煩啦。」
「你……點解……」我開始覺得好頭暈，真係隨時暈低都唔出奇。
「嘩，」達叔對我嘅反應感到好意外。「我去食枝煙啫，點解你會搞成咁？面青口眉白嘅？」
面對眼前呢個達叔，我應該作出咩反應好？
（待續）
互動時間，請投票，你地嘅決定將會影響故事的發展，甚至主角的人身安全（？）
<3 (Love) - 同達叔講返成件事
>:O (Haha) - 搵機會鎖住達叔，叫其他人同自己返去現場睇發生咩事
:O (Wow) - 隱瞞呢件事，當冇事發生過
Like - 隨便一個（盡量唔好啦～）
票數夠 150 繼續，夠 250 以上會加速。
＝＝＝＝＝＝＝＝＝＝＝＝＝＝＝＝＝＝＝＝＝
鍾意嘅可以share開去架～有咩都可以留言，我會盡量覆！
（帶定頭盔先：本故事純屬虛構，如有雷同應該巧合。）
FB： 有心無默
個人ac：（歡迎 follow）
https://www.facebook.com/myechoofheart
IG：echoofheart
一齊解鎖主角啦 在 無題 的八卦
You're offline. Check your connection. Retry. ... <看更多>