《洋紫荊璀璨開放》陳心遙
《信報》2017年6月28日《視線所及》專欄
如果唔係特登去查，相信身邊大部分香港人都唔會去分清楚邊種花先係「洋紫荊」。即使你有好奇心，凡事都上網查吓了解一番，你一樣會俾華文世界入面，一串天花亂墜嘅名搞到一頭霧水。咩「羊蹄甲」、「紅花羊蹄甲」、「宮粉羊蹄甲」、「艷紫荊」，頭都暈埋。
混亂其實因為喺大陸、台灣同香港嘅名稱唔同，而且有重疊，所以你用中文搵一定會亂晒籠，用英文理解就易啲。大家上網圖文對照可以用英文，咁就唔會咁亂。第一種就係Bauhinia Purpurea，香港叫「紅花羊蹄甲」、台灣叫「洋紫荊」、 大陸叫「羊蹄甲」；同另外兩種最唔同嘅地方係花瓣比較幼身而狹長，花嘅顏色呈粉紅色。第二種係Bauhinia Variegata，香港叫「宮粉羊蹄甲」、台灣叫「羊蹄甲」、大陸又叫番做「洋紫荊」喎，問你死未？呢種花嘅花瓣會圓潤啲，顏色係淺紫，開滿棵樹嘅時候真係有櫻花咁靚。花瓣都係有五片，但其中一片會零零舍舍深色咗，咁理解會易認好多。第三種係Bauhinia×Blakeana，即係香港正宗市花「洋紫荊」、台灣叫「艷紫荊」、大陸叫「紅花洋蹄甲」，花瓣圓潤度介乎前兩者之間，顏色較為深紫。我唔係植物專家，如果解錯歡迎大家嚟指正。
咁睇，即係話大陸、台灣、香港三個地方嘅洋紫荊係講緊三種花。Bauhinia × Blakeana中間個「×」即係雜種咁解；其實係「紅花洋蹄甲」、「宮粉羊蹄甲」溝出嚟嘅，係香港獨有嘅花，又稱「香港蘭」。洋紫荊係喺1880年一個神父喺薄扶林發現嘅。另一特色，或者你話係缺陷都得，就係洋紫荊係冇果實嘅，即係唔能夠自我繁殖，而家全香港嘅洋紫荊都係1880年嗰棵嘅子孫嚟。
又因為佢係近親繁殖而成，所以洋紫荊亦都唔會好似其他花咁開得好茂密，開到成棵樹都係，用嚟鑑賞一定冇其他樹咁靚，而且棵樹嘅抵抗力好弱，如果唔好好愛惜同保育，好易玩完。但係惟有洋紫荊，先係香港獨有嘅花，所以當年先會被揀做香港嘅「市花」，寓意同香港一樣稀有同珍貴。
同紅花、宮粉撈亂都算，最離譜嘅就係同「紫荊花」混淆，因為兩者都係喺外形、顏色、品種、樹木形狀係完完全全兩回事嚟，打醒十二分精神，如果整吓整吓由錯變做啱， 咁就悲劇喇。
咁啱，我最近寫咗一首歌用咗「洋紫荊」呢個詞：「無論明天好與糟/留守先看到/洋紫荊璀璨開放。」係呀，如果你唔想要「紅花」、「宮粉」或者「紫荊花」，而堅持要「洋紫荊」嘅話，你要留番喺香港先會見得到……
#洋紫荊璀璨開放 #洋紫荊 #紫荊花 #羊蹄甲 #香港市花 #七一 #廿年 #太極 #信報 #陳心遙
