#今次我寫嘅係非常認真的報道「每5秒鐘，就有1個小生命無奈離世」「今晚，瘦弱嘅阿伊莎又要捱餓」「科菲會因為飲用唔乾淨既食水而死亡」「只要你每月捐出50蚊，就可以令佢地喺絕望中重見曙光！」睇到香港救助兒童會（STC），一個又一個令人悲痛嘅悲慘兒童故事，配以震撼嘅畫面，相信已令唔少人慷慨解囊。
捐錢當然係好事，不過你「每月捐出50蚊」背後，佢不單抽起16蚊做行政費，當中仲有啲錢，有可能已經成為「豪食Ritz-Carlton擦鞋基金」了。
上星期二《蘋果日報》頭版報道，STC大花筒，每花費100元，只有67.7元作公益用途。根據2015年報，全年總支出1.27億元，其中有4088萬元用於籌款或行政開支。
機構當然例牌否認自己亂揈錢，不過事實係點？用一個例子答你！話說，STC喺2016年底搞咗個籌款晚宴，當日星光熠熠，當然呀STC大金主徐子淇、大使甄子丹都有出席。
你可能以為：
話晒慈善機構，晚宴會場頂盡都係普通酒店宴會廳？
咁你就錯了！當日晚宴假座Ritz-Carlton鑽石廳舉行！冇錯，呢個「慈善機構」晚宴仲豪到擺40圍！如果擺婚宴去講，Ritz-Carlton一圍入場費最少16000蚊起跳，假設買17000蚊一圍，粗略計呢度都近70萬元，未計台、燈、聲、佈置使費。
你又可能會話，係咪有酒店Sponsor？
絕大部分慈善機構，搞晚宴時，都會搵肯贊助嘅酒店。不過，據消息人士透露，救助兒童會的確曾經同Ritz Carlton傾過Sponsor，但酒店唔制！
據悉，救助兒童會真金白銀拎咗一大筆經費去搞豪華晚宴，以70萬元計，每月50蚊嘅話，可以用到1.4萬個月，即係1166年！冇贊助都仲堅持喺極度奢華嘅Ritz-Carlton搞！點解？
咁就要講多次，STC大金主係徐子淇，如果以商業機構去類比，徐子淇等同老闆。當然，徐子淇本人就梗係冇要求要去Ritz Carlton搞活動啦，之但係世上有唔少「識撈」嘅打工仔，為同老闆打成一片，都會投其所好；至於徐子淇呢，佢就一向都係Ritz Carlton粉絲！
聽聞慈善晚宴當晚，加插一個超奇情嘅特別環節，就係唱生日歌！籌款唱Happy Birthday係咩玩法？晚宴喺11月23日舉行，而11月29日就係徐子淇生日！明晒啦，當晚救助兒童會總幹事方曉明，仲喺台上領唱生日歌！認真「同根，同心」真開心。
世界上擦鞋仔多的是，老闆生日，喺公司大Show同佢賀壽，討好老闆零成本，何樂而不為？係嘔心啲啫。之但係…如果喺慈善機構出現咁嘅事，應該唔止覺得嘔心咁簡單。
查實呢，消息人士就話，上星期報道一出，STC一日內就收到超多電話要求退回捐款；方曉明本人都趕緊救火，親自打電話畀唔少捐款機構負責人解釋，有收到電話嘅負責人就話，救助兒童會方面講：香港人「記憶好短」，只要大家不再回應傳媒，大家就唔記得。
香港人冇錯係善忘，不過一個人或一個機構，只要衰過一次，都會喺Google「永留青史」；依家一Search機構名，第一版就有蘋果嘅STC報道了。至於《蘋果日報》呢，貴為香港網上傳媒龍頭，唔好以為冇人睇，當日報道點擊有12.4萬次；蘋果Facebook兩個Post加埋超過4800個Like，885個Share，仲未計其他傳媒轉載報道。
當然，作為《蘋果日報》記者，我係有打電話去救助兒童會，就上述問題查詢，噚日救助兒童會方面，就話會再搵同事回覆我；至下午12時19分，我一個電話都收唔到，然後救助兒童會兩條熱線，成朝都冇人聽。
【補充】當晚晚宴籌得約950萬元。
【跟進】佢地3點半左右終於有人聽電話，話收集我問題先，晚上7點幾主動打俾我，話正收集資料，會晚些回覆。
【再跟進】救助兒童會晚上回覆指，「本會於2016年11月13日，在香港麗思卡爾頓酒店 (Ritz-Carlton Hotel Hong Kong)舉辦的年度籌款晚宴，成功籌得港幣九百五十萬元善款，較2015年籌款晚宴籌到的港幣六百五十萬元多出46%，成績令人鼓舞。我們已盡力控制晚宴開支在較低水平，而香港麗思卡爾頓酒店亦以慈善優惠價出租場地，並豁免部分場地佈置費用。該晚宴共有六個主要贊助單位，較2015年的一個為多，他們所贊助的善款已足以抵銷晚宴的全數開支。因此，當晚所有籌款項目(包括賣枱、拍賣、賣奬券等)不須扣除成本，將全數用作慈善用途，例如：中國新生兒復蘇和基礎保健培訓、中國母嬰及幼兒基本醫療保健服務、地中海難民救援船、泰國難民營等。」
回應冇提過生日歌事件，但有一段大讚徐子淇，在此省略。
【再再跟進】我追問幾條問題：
1:「慈善優惠價」係幾優惠？
2:950萬，係點計？係計晒6個贊助單位、賣枱、拍賣、獎卷？
3:「籌款項目全數慈善用途」，係咪即係950萬係全數用喺慈善用途
4:如果唔係，即係950萬有幾多用於慈善用途
5:咁到底晚宴成本係幾多呢？
STC隨後回應指：無補充
蘋果日報1月3日報道：
慈善機構開支無王管 救助兒童會抽1/3捐款做營運費
http://bit.ly/2i8dETB
by千頌C＠堆填區
http://fb.com/winbigwok
stc公司 在 STC (香港標準及檢定中心) | 公司背景 - YouTube 的八卦
STC (香港標準及檢定中心) — 香港人嘅測試、檢驗及認証機構總部設於 ... 更多資訊請瀏覽www. stc.group可以Follow埋我哋其他嘅社交媒體 公司 ... ... <看更多>